သိမ်းဆည်းခံလယ်ယာမြေ ပြန်မရသေး၍ အိုင်အယ်အိုကို ထပ်မံတိုင်ကြား

ဒီကနေ့ နေ့လည် ၁ နာရီလောက်က အောင်လံ လယ်သိမ်းခံ လယ်သမား ၁၀ ဦးရဲ့ ကိုယ်စား လယ်သမား ဦးသန်းစိုးက ရန်ကုန် အိုင်အယ်အိုရုံးကို လာရောက်ပြီး အိုင်အယ်အို အရာရှိ မစ္စတာ စတိဗ် မာရှယ်ကို တွေ့ဆုံ အကူအညီ တောင်းခံခဲ့ပါတယ်။

မြန်မာစစ်အစိုးရနဲ့ အိုင်အယ်အိုအကြား နားလည်မှု စာချွန်လွှာကို နှစ်စဉ် သက်တမ်းတိုး သဘောတူ ထားပေမဲ့ စစ်အစိုးရအာဏာပိုင်တွေက လိုက်နာခြင်း မရှိတဲ့အတွက် အဓမ္မခိုင်းစေမှုတွေ ဆက်ခံနေရသလို လယ်ယာမြေတွေလည်း ဆုံးရှုံးနေရဆဲ ဖြစ်တယ်လို့ ဦးသန်းစိုးက ပြောဆိုခဲ့ပါတယ်။

“ILO နဲ့ အစိုးရနဲ့ နားလည်မှု စာချွန်လွှာတွေကို တနှစ်ပြီး တနှစ် ချုပ်ဆိုခဲ့ပေမဲ့ ဆုံးဖြတ်ချက်တွေကိုတောင်မှ ဒီနေ့ထက်ထိ ကျွန်တော်တို့ ဘာမှ ခံစားခွင့် မရဘူး၊ ကျွန်တော်တို့ အဓမ္မ ခိုင်းစေခံရတယ်၊ ကျွန်တော်တို့ လယ်ယာမြေတွေကို ငြင်းဆန်တဲ့အတွက် ပြစ်ဒဏ်အဖြစ် အသိမ်းခံရတယ်။ ဒါတွေဟာလည်းပဲ အစိုးရနဲ့ ILO နဲ့ကြားမှာ ညှိနှိုင်းဆုံးဖြတ် ပြီးပါလျက်နဲ့ ကျွန်တော်တို့ ဒီနေ့ထက်ထိ ဆုံးရှုံးနေဆဲပဲ။ ကျွန်တော်တို့ ဘဝတွေဟာ လယ်မဲ့ယာမဲ့ ဖြစ်နေဆဲပဲ။”

၂၀၀၇ ခုနှစ်က အမှတ် ၅ သကြားစက်ရုံမှူးနဲ့ မြိုနယ် မယက ဥက္ကဋ္ဌတို့ကနေ ဦးသန်းစိုးအပါအဝင် လယ်သမား ၁၀ ဦးထံကနေ စီမံကိန်းသီးနှံ ကြံ စိုက်ပျိုးခိုင်းတာကို မစိုက်တဲ့အတွက်ဆိုကာ လယ်ယာမြေဧက ၇၀ ကျော်ကို သိမ်းယူပီး အခြားလုပ်ငန်းရှင်တွေကို ပေးအပ်ခဲ့ပါတယ်။

ဒီအမှုကိစ္စကို ၂၀၀၈ ခုနှစ်မှာ အိုင်အယ်အို တိုင်ကြားခဲ့တဲ့အတွက် အိုင်အယ်အို အရာရှိ မစ္စတာ စတိဗ် မာရှယ်နဲ့ မြန်မာစစ်အစိုးရ အရာရှိ ဗိုလ်မှူးကြီး ယုနွယ်အောင်တို့ ဆွေးနွေးသဘောတူချက်အရ လယ်ယာမြေတွေကို လယ်သမားတွေထံ ပြန်ပေးဖို့ ဆုံးဖြတ်ခဲ့ပါတယ်။

ဒါပေမဲ့ ဒီဆုံးဖြတ်ချက်ကို အောက်ခြေမြို့နယ်နဲ့ ခရိုင်အဆင့် အာဏာပိုင်တွေက ဒီကနေ့အထိ လိုက်နာ အကောင်အထည် ဖော်ခြင်း မရှိတဲ့အတွက် အခုအထိ လယ်ယာမြေတွေ ပြန်မရသေးပဲ ဆုံးရှုံးနေရတဲ့အတွက် အခုလို အိုင်အယ်အိုကို ထပ်မံ အကူအညီ တောင်းခံရတာ ဖြစ်ကြောင်း ဦးသန်းစိုးက ပြောဆိုခဲ့ပါတယ်။