မြန်မာ့ဒီမိုကရေစီရေးအတွက် ဆက်လက်ကူညီမယ်လို့ ကနေဒါပြော

မြန်မာစစ်တပ်ကို လေယာဉ်ဆီတင်သွင်းမှု ပိတ်ဆို့တာ အပါအဝင် မိတ်ဖက်နိုင်ငံတွေနဲ့ ပူးပေါင်းပြီး ပိတ်ဆို့အရေးယူတာတွေ ဆက်လက်လုပ်ဆောင်နေတယ်လို့ ကနေဒါနိုင်ငံခြားရေးဝန်ကြီးဌာနက ပြောလိုက်ပါတယ်။

ကနေဒါနိုင်ငံခြားရေးဝန်ကြီး Mélanie Joly ကိုယ်စား ဝန်ကြီးဌာနရဲ့ လွှတ်တော်အတွင်းရေးမှူး Robert Oliphant နဲ့ အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီး ဒေါ်ဇင်မာအောင် တို့ အွန်လိုင်းကနေ တွေ့ဆုံဆွေးနွေးခဲ့တဲ့အကြောင်း ‌မြန်မာနိုင်ငံဆိုင်ရာ ကနေဒါသံရုံးက ထုတ်ပြန်လိုက်တာ ဖြစ်ပါတယ်။

မြန်မာစစ်တပ်ရဲ့ အကြမ်းဖက်မှုတွေနဲ့ အရပ်သားတွေအပေါ် ပစ်မှတ်ထားတိုက်ခိုက်မှုတွေ များလာတာကိုလည်း ရှုတ်ချတယ်လို့ ထုတ်ပြန်ချက်မှာ ဖော်ပြထားပါတယ်။

တဆက်တည်းမှာပဲ မြန်မာနိုင်ငံမှာ တရားမျှတမှု၊ လူ့အခွင့်အရေးနဲ့ တာဝန်ယူမှု၊ တာဝန်ခံမှုတို့ ရရှိဖို့ ကနေဒါနိုင်ငံက ဆက်လက်လုပ်ဆောင်နေတယ်လို့ ဆိုပါတယ်။

ဒါ့အပြင် မြန်မာပြည်သူတွေရဲ့ ဆန္ဒနဲ့ကိုက်ညီတဲ့ ဒီမိုကရေစီနိုင်ငံ ပေါ်ထွန်းလာဖို့ အာဆီယံ၊ နိုင်ငံတကာအသိုင်းအဝိုင်း၊ NUG အပါအဝင် ဒီမိုကရေစီလိုလားသူတွေနဲ့ ဆက်လက်ပူးပေါင်းဆောင်ရွက်သွားမယ်လို့ လွှတ်တော်အတွင်းရေးမှူး Robert Oliphantက ပြောခဲ့ပါတယ်။