ကြားဖြတ်ရွေးကောက်ပွဲ လုပ်မည့်ကိစ္စ နိုင်ငံရေးပါတီများကို အကြောင်းမကြား

နိုင်ငံရေး ပါတီတွေကိုတော့ ကြားဖြတ်ရွေးကောက်ပွဲနဲ့ ပတ်သက်လို့ ရွေးကောက်ပွဲကော်မရှင်က အသိပေး အကြောင်းကြားတာ မရှိဘူးလို့ ဒီမိုကရက်တစ်ပါတီ-မြန်မာရဲ့ ဥက္ကဋ္ဌ ဦးသုဝေက ဒီကနေ့ ပြောကြားပါတယ်။

ရွေးကောက်ပွဲမှာ ပါဝင် ယှဉ်ပြိုင်မယ့်သူတွေအနေနဲ့ ဇန်နဝါရီ ၃၁ ရက် နောက်ဆုံးထားပြီး အမည်စာရင်း တင်သွင်း လျှောက်ထားကြရမယ်လို့ သိရပါတယ်။

အခုကျင်းပမယ့် ကြားဖြတ်ရွေးကောက်ပွဲမှာ ပြည်သူ့လွှတ်တော်အတွက် နေရာ ၄ဝ၊ အမျိုးသား လွှတ်တော် အတွက် ၆ နေရာနဲ့ တိုင်းဒေသကြီး လွှတ်တော်အတွက် ၂ နေရာ လစ်လပ်နေပါတယ်။

ဒါပေမယ့် ၂ဝ၁ဝ ရွေးကောက်ပွဲမှာ ရွေးကောက်ပွဲ မကျင်းပဖြစ်ခဲ့တဲ့ မဲဆန္ဒနယ် ၁၇ ခုရှိတဲ့အတွက် လာမယ့် ရွေးကောက်ပွဲမှာ နေရာ အားလုံးအတွက် ကျင်းပမယ်ဆိုရင် ဝင်ရောက် ယှဉ်ပြိုင်နိုင်တဲ့ မဲဆန္ဒနယ်မြေ ၆၅ ခု ရှိမှာ ဖြစ်ပါတယ်။ ဒါပေမယ့် လောလောဆယ် အထိတော့ မဲဆန္ဒနယ် ဘယ်နှခုမှာ ကြားဖြတ် ရွေးကောက်ပွဲ ကျင်းပမလဲဆိုတာ ပြည်ထောင်စုရွေးကောက်ပွဲ ကော်မရှင်က တိတိကျကျ ထုတ်ပြန်ကြေညာတာ မရှိသေးပါဘူး။

ဒေါ်အောင်ဆန်းစုကြည် ခေါင်းဆောင်တဲ့ အင်န်အယ်လ်ဒီ ပါတီကတော့ ကြားဖြတ်ရွေးကောက်ပွဲအတွက် လစ်လပ်နေရာ အားလုံးမှာ ပါဝင်ယှဉ်ပြိုင်မယ်လို့ ကြေညာထားပါတယ်။