AA ထိန်းချုပ်ရာ ကျောက်တော်မြို့ ဗုံးကြဲခံရပြီး လူ ၂၀ ကျော်ဒဏ်ရာရ

RFA Burmese
2025.04.19
AA ထိန်းချုပ်ရာ ကျောက်တော်မြို့ ဗုံးကြဲခံရပြီး လူ ၂၀ ကျော်ဒဏ်ရာရ ရခိုင်ပြည်နယ် ကျောက်တော်မြို့ကို ၂၀၁၇ မတ်လ ၈ ရက်နေ့က တွေ့ရစဉ်။
RFA

အာရက္ခတပ်တော်(AA)ထိန်းချုပ်ရာ ရခိုင်ပြည်နယ် ကျောက်တော်မြို့ လူနေရပ်ကွက်တွေထဲကို စစ်ကောင်စီက ဧပြီလ ၁၉ ရက် မနက် ၂ နာရီခွဲကနေ ၃ နာရီကြားအချိန်မှာ ဂျက်တိုက်လေယာဉ်နဲ့ ဗုံးကြဲခဲ့တာကြောင့် အရပ်သားတစ်ဦးပွဲချင်းပြီးသေဆုံးပြီး နောက်ထပ် ၂၁ ဦးဒဏ်ရာရသွားတယ်လို့ ဒေသခံတွေကပြောပါတယ်။

လူတွေအိပ်မောကျနေချိန် လူတွေရပ်ကွက်တွေထဲကို ဗုံးကြဲချခံရတာလို့ လုံခြုံရေးအရအမည်မဖော်လိုတဲ့ ကျောက်တော်မြို့မှာ နေထိုင်သူတစ်ဦးက RFA ကိုပြောပါတယ်။

“ဗုံးကျတာက ပြည်တော်သာမှာကျတယ်။ ရှမ်းရွာမှာကျတယ်။ ပြီးရင် မြို့သစ်မှာကျတယ်။ အဲဒီရပ်ကွက်တွေက လမ်းတွေကို ဗုံးတွေချသွားတာ”

ဂျက်တိုက်လေယာဉ်နဲ့ လေးကြိမ်လာရောက် ဗုံးကြဲသွားတာလို့ သူကပြောပါတယ်။

သေဆုံးသူဟာ အသက် ၃၈ နှစ်အရွယ် ဦး‌ကျော်ဇောချေ (ခ) မောင်ငယ် ဖြစ်တယ်လို့ ဒေသခံတွေကပြောပါတယ်။ ဒဏ်ရာရသူတွေထဲမှာ အသက်ဆယ်နှစ်အောက် ကလေးသုံးယောက်ပါဝင်ပြီး အသေးစိတ် အချက်အလက်တွေကိုတော့ မသိရသေးပါဘူး။

ဒီဖြစ်ရပ်နဲ့ပတ်သက်လို့ စစ်ကောင်စီဘက်ကတစ်စုံတစ်ရာထုတ်ပြန်တာမရှိသေးသလို စစ်ကောင်စီပြောခွင့်ရသူ ဗိုလ်ချုပ်ဇော်မင်းထွန်းကို RFA က ဆက်သွယ်ခဲ့ပေမဲ့ ဖုန်းလက်ခံဖြေကြားတာမရှိပါဘူး။

ပြီးခဲ့တဲ့ ဧပြီလ ၁၃ ရက်နေ့ကလည်း ကျောက်တော်မြို့ပေါ်ကို စစ်ကောင်စီက ဂျက်တိုက်လေယာဉ်နဲ့ ဗုံးကြဲခဲ့တာကြောင့် အရပ်သားအမျိုးသမီးသုံးဦးဒဏ်ရာရပြီး နေအိမ်အချို့ ပျက်စီးခဲ့ပါတယ်။

ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။