AA ဖမ်းထားတဲ့ တပ်နဲ့ ရဲတပ်ဖွဲ့ဝင်များ

၂၀၁၈ ဒီဇင်ဘာကစလို့ ရခိုင်ပြည်နယ်မှာ ရက္ခိုင့်တပ်တော် AA နဲ့ တပ်မတော်တို့ တိုက်ပွဲတွေအတွင်း AA က စစ်ဘက်နဲ့ ဆက်စပ်လို့ဆိုပြီး သံသယနဲ့ ဖမ်းဆီးထားသူ အရေအတွက် ပိုများလာနေပါတယ်။

ရက္ခိုင့်တပ်တော် AA ရဲ့ ထုတ်ပြန်ချက်တွေအရ တပ်မတော်သားတွေ၊ ရဲတပ်ဖွဲ့ဝင်တွေ အပါအဝင် ဖမ်းဆီးထားသူ ၃၀ ကျော်လောက်ရှိတယ်လို့ ခန့်မှန်းရပါတယ်။

ပြီးခဲ့တဲ့နိုဝင်ဘာ ၁၂ ရက်စွဲနဲ့ ထုတ်ပြန်တဲ့ AA အဖွဲ့ရဲ့ ကြေညာချက်မှာ ရဲတပ်ဖွဲ့ဝင် ကိုးဦး၊ တပ်မတော်သား ခြောက်ဦး၊ အကျဉ်းဦးစီးဝန်ထမ်း တစ်ဦး၊ တပ်အင်ဂျင်နီယာ တစ်ဦး စုစုပေါင်း ၁၇ ဦးကို သုံ့ပန်းချင်း လဲလှယ်လိုကြောင်းထုတ်ပြန်ခဲ့တာပါ။

သုံ့ပန်းလဲလှယ်ရေးနဲ့ပတ်သက်ပြီးတော့ အစိုးရနဲ့ တပ်မတော်ဘက်က လက်မခံနိုင်ဘူးလို့ ငြင်းဆိုထားပါတယ်။

AA ရက္ခိုင့်တပ်တော်ရဲ့ လုပ်ရပ်တွေဟာ ဥပဒေနဲ့မညီတဲ့အတွက် AA က ကမ်းလှမ်းထားတဲ့ သုံ့ပန်းလဲလှယ်ရေး အစီအစဉ်ကို လက်ခံမှာမဟုတ်ဘူးလို့ နိုဝင်ဘာလ၁၅ ရက်နေ့က ပြုလုပ်တဲ့ သမ္မတရုံး သတင်းစာရှင်းလင်းပွဲမှာ သမ္မတရုံး ပြောခွင့်ရသူ ဦးဇော်ဌေးက ပြောဆိုထားပါတယ်။

ဒါ့အပြင် AA က ဖမ်းဆီးသွားတဲ့ စစ်သည်တွေ၊ ရဲတပ်ဖွဲ့ဝင်တွေ၊ ဝန်ထမ်းတွေ ပြန်လွတ်မြောက်ရေးအတွက် AA နဲ့ ဆွေးနွေးပွဲတွေမှာရော၊ ငြိမ်းချမ်းရေးကော်မရှင်က တဆင့်ရော၊ AA အပေါ် သြဇာလွှမ်းမိုးနိုင်စွမ်းရှိတဲ့ အဖွဲ့အစည်း လူပုဂ္ဂိုလ်တွေကတဆင့်ပါ ကြိုးပမ်းခဲ့တယ်လို့လည်း ပြောကြားထားပါတယ်။

တပ်မတော် သတင်းမှန်ပြားကြားရေးအဖွဲ့ ဗိုလ်မှူးချုပ် ဇော်မင်းထွန်းကတော့ နိုင်ငံအချင်းချင်း စစ်ဖြစ်ပွားခဲ့ပြီး စစ်ပွဲအတွင်း ဖမ်းဆီးခဲ့တဲ့ သုံ့ပန်းအချင်းချင်း လဲလှယ်တာတွေရှိခဲ့ပေမယ့် ဘယ်နိုင်ငံ ဘယ်တပ်မတော်ကမှ အကြမ်းဖက်သူတွေ ဖမ်းဆီးသွားတဲ့သူတွေနဲ့ လဲလှယ်တာမျိုးမရှိသလို ညှိနှိုင်းပြီး ဆောင်ရွက်ခဲ့တာ မရှိဘူးလို့ နိုဝင်ဘာလ ၁၂ နေ့က RFA ကို ပြောပါတယ်။

အလားတူ AA အဖွဲ့က နိုဝင်ဘာ ၁၉ ရက်နေ့က တပ်မ (၇၇) လက်အောက်ခံ ခမရ(၃၁၃)က စစ်ကြောင်းက အရာရှိ  နှစ်ဦးအပါအဝင် ၁၃ ဦး လက်နက်ချလို့ ဖမ်းဆီးထားတယ်လို့ AA က သတင်းထုတ်ပြန်ထားပါတယ်။

အဲဒီထုတ်ပြန်ချက်နဲ့ပတ်သက်လို့ အနောက်ပိုင်းတိုင်း စစ်ဌာနချုပ် တိုင်းဦးစီး ဗိုလ်မှူးကြီး ဝင်းဇော်ဦးကတော့ မဟုတ်မှန်ကြောင်းနဲ့ ၂၀၁၇ ခုနှစ်က အကြောင်းအရာကို ပြန်တင်ထားတာဖြစ်ကြောင်း RFA ကို တုံ့ပြန်ထား ပါတယ်။

AA လက်ထဲမှာ ဖမ်းဆီးခံထားရတဲ့ အရေအတွက်ကိုတော့ လတ်တလောမှာ တပ်မတော်က စုဆောင်းထားခြင်း မရှိသေးဘူးလို့ တပ်မတော် သတင်းမှန်ပြန်ကြားရေးအဖွဲ့က ဗိုလ်မှူးချုပ် ဇော်မင်းထွန်းက ပြောပါတယ်။

အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီး ဝင်းဇော်ဦးကတော့ နယ်မြေရှင်းလင်းရေးတွေ ဆက်လုပ် သွားမှာဖြစ်သလို အဲဒီလို ရှင်းလင်းရေးဆောင်ရွက်ရင်း  ဖမ်းဆီးထားသူတွေကို ပြန်လည်ကယ်တင်သွားမယ်လို့ ဗိုလ်မှူးကြီး ဝင်းဇော်ဦးက ပြောပါတယ်။

“ကျွန်တော်တို့ကတော့ ဆက်ပြီးနယ်မြေရှင်းလင်းရေး လုပ်နေမှာပဲလေ။ သူတို့ခေါ်ထားတဲ့နေရာတွေ ဘာတွေနဲ့ ကျွန်တော်တို့ နယ်မြေရှင်းတဲ့အခါတွေ့ရင်တော့ ပြန်ပြီးတော့မှ ခေါ်နိုင်မှာပေါ့။ ကျွန်တော်ကတော့ ရအောင်တော့ နယ်မြေရှင်းလင်းရေး လိုက်လုပ်မယ်။ ကျွန်တော်တို့ရဲ့ တာဝန်ကိုက နယ်မြေရှင်းလင်းရေးပဲ”

AA ကလည်း သူတို့ ဖမ်းဆီးထားတဲ့ သုံ့ပန်းအရေအတွက်ကို ထုတ်ဖော်ပြောဆိုဖု့ိ ငြင်းဆိုပါတယ်။

ရက္ခိုင့်တပ်တော် AA ပြောရေးဆိုခွင့်ရှိသူ ခိုင်သုခ ပြောတာက …

“စစ်သုံ့ပန်းအရေအတွက်ကတော့ ကျွန်တော်တို့ လုံခြုံရေးကိစ္စဖြစ်တဲ့အတွက်ကြောင့်မို့ လောလောဆယ် မှာတော့ အားလုံးပြောလို့ မရသေးဘူးဗျ။ အရေအတွက်ကိုတော့ ပြောလို့မရဘူး။ ဒါပေမဲ့ သူတို့ကိုတော့ ကျွန်တော်တို့ ကောင်းကောင်းမွန်မွန်ပဲ ဆက်ပြီးထိန်းသိမ်းထားမှာဖြစ်တယ်”

AA ဘက်က ဖမ်းဆီးထားသူတွေနဲ့ တပ်မတော်က ဖမ်းဆီးအမှုဖွင့်ထားသူတွေကို လဲလှယ်ဖို့ အစီအစဉ်ဟာ အစိုးရနဲ့ တပ်မတော်က ငြင်းဆိုထားတဲ့အတွက် အကောင်အထည်ပေါ်လာမယ့် အခြေအနေ မရှိသေးပါဘူး။

ရခိုင်ပြည်နယ် ဝန်ကြီးချုပ်ဟောင်း ဦးမောင်မောင်အုန်း ကတော့ အခု AA က ဖမ်းဆီးထားသူတွေ ပြန်လည် လွတ်မြောက်ဖို့ ကြားဝင်ညှိနှိုင်းပေးသူရှိရင် တစ်မျိုးတဖုံဖြစ်လာနိုင်ပေမယ့် လက်ရှိအနေအထားအရ ဒီကိစ္စဟာ ကိုင်တွယ်ရခက်မယ်လို့ သုံးသပ်ပါတယ်။

“ကြားကနေ ဝင်ရောက် ဖြန်ဖြေညှိနှိုင်းပေးမယ့်သူ ရှိရင်တော့ တစ်မျိုးပေါ့နော်။ အခုအနေအထားက  တစ်ဖက်က တောင်းဆိုတယ် တစ်ဖက်ကလည်း မဖြစ်နိုင်ဘူးဆိုတဲ့အခါကျတော့ ဒီကိစ္စဟာ နည်းနည်းလုပ်ရ ခက်မယ်လို့ထင်တယ်။ အပေါ်မှာဖြစ်နေတဲ့ ဒီနိုင်ငံရေး အခင်းအကျင်းအရမှာ သူတို့တွေက ကြားထဲကနေ သားကောင်တွေဖြစ်ရတဲ့ အနေအထားတွေ ဆိုတော့ကာ ကျွန်တော်တို့ကတော့ လွှတ်တော်ကိုယ်စားအပါအဝင် အားလုံးက သားကောင်တွေဖြစ်တဲ့အတွက် ဒါက အဲလိုလုပ်ကြေးဆိုရင်တော့လည်း ဟိုဘက်ဒီဘက် လုပ်လို့ဆုံးမှာ မဟုတ်တော့ဘူး။ ကျွန်တော်အမြင်ပြောရရင်တော့ ဒါဟာနောက်ဆုံးအကြိမ်ပဲ ဖြစ်စေချင်တယ်။ ဒါလေးတွေကိုတော့ ထိန်းထိန်းသိမ်းသိမ်း လုပ်စေချင်တယ်ပေါ့ဗျာ”

တပ်မတော် အငြိမ်းစားအရာရှိ နိုင်ငံရေးလေ့လာသုံးသပ်သူ ဒေါက်တာအောင်မျိုးကတော့ AA အဖွဲ့ကို အကြမ်းဖက်အဖွဲ့လို့ သဘောထားတဲ့အတွက် လဲလှယ်တဲ့ကိစ္စဟာလည်း ဖြစ်လာနိုင်စရာမရှိဘူးလို့ သုံးသပ်ပါတယ်။

“သူ့ကို အကြမ်းဖက်အဖွဲ့ သတ်မှတ်ထားတယ်ဆိုရင်တော့ ဒီလဲလှယ်ရေးဟာ ဘယ်တော့မှ ဖြစ်လာမှာ မဟုတ်ဘူး။ AA ကတော့ ဒီလူတွေ သွားလေရာမှာ ပါသွားပြီးတော့ အခြေတကျမရှိတဲ့အခါကြတော့ သူ့အတွက်က ဝန်ထုပ်ဝန်ပိုးဖြစ်လာမယ်။ သူတစ်ခုခု နည်းလမ်းနဲ့ လက်လွတ်အောင်ကြိုးစားရင် ကြိုးစား၊ မကြိုးစားရင်လည်း ဒီလို ဓားစာခံလိုဖမ်းတဲ့လုပ်ရပ်တွေက မှားတယ်ဆိုတာကို တဖြေးဖြေးနဲ့ စိတ်ပျက် လာမယ်။ ကြားထဲက လူတွေအနေနဲ့တော့ တော်တော်လေးတော့ သနားစရာပေါ့နော် အဲဒီလိုလေးတော့ ဖြစ်နေတာပေါ့”

AA အဖွဲ့နဲ့ဆက်စပ်ပြီး အစိုးရနဲ့ တပ်မတော်က ဖမ်းဆီးထားသူတွေကို တည်ဆဲဥပဒေနဲ့အညီ စစ်ဆေးအရေး ယူနေပြီး သူတို့ကို သုံ့ပန်းအဖြစ် မသတ်မှတ်ဘူးလို့ ဦးဇော်ဌေးက ပြောထားတာပါ။

တပ်မတော် သတင်းမှန်ပြန်ကြားရေးအဖွဲ့ကတော့ ပြီးခဲ့တဲ့ ဇွန်လမှာ ကျင်းပတဲ့ သတင်းစာရှင်းလင်းပွဲမှာ ၂၀၁၈ ခုနှစ် ဒီဇင်ဘာလကနေ ဇွန်လဆန်းပိုင်းအထိ နှစ်ဖက် တိုက်ပွဲတွေအတွင်း တပ်မတော်က AA အဖွဲ့နဲ့ ပတ်သက်တယ်ဆိုပြီး သံသယရှိသူ ၉၀ ဦးကို ဖမ်းဆီးစစ်ဆေးခဲ့သလို လက်ရှိစစ်ဆေးနေဆဲ ၃၆ ဦး၊ ပြန်လွှတ်ပေးခဲ့သူ ရှစ်ဦး၊ အမှုဖြစ်ပွားနေသူ ၄၅ ဦး၊ ပြစ်ဒဏ်ချမှတ်ပြီးသူ သုံးဦးရှိတယ်လို့ ပြောဆိုထားပါတယ်။

ရသေ့တောင်မြို့နယ် မေယုမြစ်ထဲမှာ ပြေးဆွဲနေတဲ့ ရွှေနဒီအမြန်ရေယာဉ်ကို အောက်တိုဘာ ၂၆ ရက်နေ့က AA အဖွဲ့က ရေယာဉ်ပေါ်လိုက်ပါလာတဲ့ အရပ်သား ၂၅ ယောက်ကို ပြီးခဲ့တဲ့ နိုဝင်ဘာ ၅ ရက်နေ့က ပြန်လည်လွှတ်ပေးခဲ့ပါတယ်။

ပြီးခဲ့တဲ့လတွေအတွင်း AA အဖွဲ့ ဖမ်းဆီးခေါ်ဆောင်တာ ခံရသူတွေထဲမှာ ပြန်လွတ်လာသူ အများအပြားရှိပါတယ်။ အထင်ရှားဆုံး ဖမ်းဆီးမှုတွေထဲမှာ မီးသတ်သမား အယောက် ၂ဝ ခန့် အဖမ်းခံရတဲ့ဖြစ်ရပ်နဲ့ အိန္ဒိယနိုင်ငံသားတွေ ဖမ်းဆီးခံရတဲ့ ဖြစ်ရပ်တွေဖြစ်ပါတယ်။

အဲဒီထဲက မီးသတ်အရာရှိ တစ်ဦး၊ အိန္ဒိယနိုင်ငံသား တစ်ဦးတို့ဟာ အထိန်းသိမ်းခံထားရစဉ် သေဆုံးသွားပါတယ်။ AA အဖွဲ့ကတော့ အဲဒီ နှစ်‌ယောက် သေဆုံးမှုဟာ နှိပ်စက်ညှဉ်းပန်းခံရလို့ သေဆုံးတာ မဟုတ်ဘဲ အမောဖောက်ပြီး နှလုံးရောဂါနဲ့ သေဆုံးသွားတယ်လို့ ပြောထားပါတယ်။

တဖက်မှာလည်း AA နဲ့ ပတ်သက်ဆက်နွယ်တယ်ဆိုတဲ့ သံသယနဲ့ တပ်မတော်ကဖမ်းဆီးပြီး အမှုဖွင့်ခံထားရသူ လက်ရှိမှာ ရာနဲ့ချီ ရှိနေပြီလို့ ရခိုင်လူမှုအဖွဲ့အစည်းတွေနဲ့ ရှေ့နေတွေ၊ လွှတ်တော်ကိုယ်စားလှယ်တွေကလည်း ပြောကြပါတယ်။

နှစ်ဖက်အပြန်အလှန် ဖမ်းဆီးထားသူတွေ ပိုများလာတဲ့အပြင် တိုက်ပွဲလည်း စိပ်လာသလို ထိခိုက်ဒဏ်ရာရသူ၊ သေဆုံးသူနဲ့ စစ်ဘေးတိမ်းရှောင်နေရသူတွေလည်း ပိုများလာနေတာကြောင့် ရခိုင်ပြည်နယ်အတွက် စိုးရိမ်စရာဖြစ်နေပါတယ်။