အထွေထွေအကျပ်အတည်းကြောင့် လူငယ်တွေ ပြည်ပထွက် အလုပ်လုပ်ဖို့ အပြင်းအထန် ကြိုးစားနေ

ပြည်ပအလုပ်အကိုင် ဝန်ဆောင်မှုလုပ်ငန်းရှင်များအဖွဲ့ချုပ်ရဲ့ စာရင်းတွေအရ ဂျပန်နိုင်ငံ ကနေ မြန်မာအလုပ်သမား ပြန်လည်ခေါ်ယူတဲ့ ၂၀၂၂ မတ်လကစပြီး မေလအထိ သုံးလ အတွင်း ဂျပန်မှာအလုပ်လုပ်ဖို့ တိုင်းပြည်ကို စွန့်ခွာသွားတဲ့ မြန်မာလုပ်သား ငါးထောင် ကျော်ရှိနေပါပြီ။ ဒါဟာ အရင်နှစ်တွေကထက် နှစ်ဆပိုများတယ်လို့ အဲဒီအဖွဲ့ တာဝန်ရှိ သူတွေက ပြောပါတယ်။

စီးပွားရေးဖွံ့ဖြိုးမှု အားနည်းတာကြောင့် နဂိုကတည်းက ပြည်ပထွက် အလုပ်လုပ်ချင်သူတွေ များလှတဲ့ မြန်မာနိုင်ငံမှာ ၂၀၁၉ ကိုဗစ်ကပ်ရောဂါ ကူးစက်ချိန်ကစလို့ ဂျပန်အပါအဝင် ပြည်ပနိုင်ငံတွေက ပြည်ဝင်ခွင့်ဗီဇာနဲ့ ကျွမ်းကျင်လုပ်သား ခေါ်ယူစစ်ဆေးတဲ့ စာမေးပွဲတွေ ကို ယာယီပိတ်ထားခဲ့ပါတယ်။

၂၀၂၁ ဖေဖော်ဝါရီ ၁ ရက် စစ်တပ်က အာဏာသိမ်းလိုက်ချိန်မှာတော့ ပြည်ပထွက်အလုပ် လုပ်နိုင်မယ့် အခွင့်အရေးအားလုံး အချိန်အတော်ကြာ ရပ်ဆိုင်းသွားခဲ့ပါတယ်။ အခုနှစ် မတ်လထဲမှာမှ ဂျပန်နိုင်ငံက ကျွမ်းကျင်လုပ်သား စာမေးပွဲတွေ ပြန်လက်ခံလာသလို ပြည် ဝင်ခွင့်ဗီဇာလည်း ပြန်ဖွင့်ပေးတာမို့ ဂျပန်နိုင်ငံကိုထွက်ချင်တဲ့ လူငယ်တွေ အပြင်းအထန် ဂျပန်စာ သင်ယူနေကြပါတယ်။

"ကျနော်တို့ ဒီနိုင်ငံမှာ ကျနော်တို့ရမယ့် ဘွဲ့လေးနဲ့ ဆက်ပြီးအလုပ်လုပ်နေမယ်ဆိုရင် ဘယ်လိုမှအဆင်မပြေဘူး"

လုံခြုံမှုရှိပြီး လုပ်ခလစာများတာကြောင့် မြန်မာလူငယ်တွေက ဂျပန်ကို ထွက်ခွာဖို့ ရွေးချယ် ကြတာလို့ ရန်ကုန်မြို့က ဂျပန်စာသင်တန်းဆရာမ မသင်းသဇင်က ပြောပါတယ်။

“မြန်မာနိုင်ငံက လူငယ်အများစုက ကိုယ့်ကိုယ်ကိုယ် Safe ဖြစ်တဲ့ နိုင်ငံကိုပဲ သွားချင် တာပေါ့နော်။ အဲအပိုင်းဆိုင်ရာမှာဆိုရင်လည်း ကလေးတွေ တော်တော်များများက ဂျပန်ကိုသွားဖို့အတွက်ကို သူတို့ရဲ့စိတ်က အမြဲတမ်း တက်ကြွနေကြတယ်။ ဂျပန်စာ သင်တယ်။ ဂျပန် သွားတယ်။ ရှေ့မှာလည်းပဲ ထွက်ထားတဲ့ သူတို့ အစ်ကိုတွေ၊ အစ်မ တွေကလည်း အဆင်ပြေနေတယ်။ ကိုယ့်ရဲ့ မိဘတွေကို ထောက်ပံ့နိုင်တာက ဂျပန်နိုင်ငံ က ပိုပြီးတော့မှ ဒီလစာအခြေအနေနဲ့ရော တော်တော်များများ ထောက်ပံ့ပေးတာက ဂျပန်နိုင်ငံဆိုတဲ့အတွက်ကြောင့် ကလေးတွေကလည်း ဂျပန်နိုင်ငံကို သွားဖို့အတွက်တွေ သူတို့ ရည်ရွယ်ထားကြတာပေါ့နော်”

ဂျပန်စာသင်သူအများစုက အသက် ၂၀ နဲ့ ၂၅ နှစ်ကြား လူငယ်တွေဖြစ်ပါတယ်။

ဂျပန်နိုင်ငံကို သွားရောက်မယ့်သူတွေအနေနဲ့ ဂျပန်ဘာသာစကားကို အနည်းဆုံး N4 အဆင့် အောင်မြင်ထားရင် လုပ်ငန်းခွင်မှာ ပိုအဆင်ပြေနိုင်သလို အလုပ်သင်ဗီဇာနဲ့ သွား ရောက်မယ့်သူတွေကတော့ အလုပ်အကိုင်ရှာပေးတဲ့ အေဂျင်စီကို အမေရိကန်ဒေါ်လာ ၂၈၀၀ ပေးသွင်းရပါတယ်။

ဒါပေမဲ့ ကျွမ်းကျင်လုပ်သားတွေကိုတော့ ခေါ်ချင်တဲ့နိုင်ငံက ရန်ကုန်မှာရှိတဲ့ ပြည်ပအလုပ် အကိုင် ရှာဖွေရေးအဖွဲ့တွေနဲ့ ချိတ်ဆက်ပြီး အခမဲ့ ခေါ်ယူနေပါတယ်။

ဂျပန်နိုင်ငံမှာ အလုပ်သင်ဗီဇာနဲ့ သွားရောက်လုပ်ကိုင်သူတွေဟာ တစ်နာရီကို မြန်မာငွေ ကျပ်တစ်သောင်းနဲ့ညီမျှတဲ့ ဂျပန်ယန်းငွေ ၉၀၀ ကျော် ရရှိပါတယ်။ အိုဗာတိုင်ကြေးမပါဘဲ တစ်နေ့ ၈ နာရီ အလုပ်လုပ်မယ်ဆိုရင်တောင် မြန်မာငွေ ကျပ်ရှစ်သောင်းနဲ့ ညီမျှတဲ့ ယန်း ငွေ ၇၂၀၀ လောက် ရပါတယ်။ ဒါ့ကြောင့် ဂျပန်နိုင်ငံမှာ တစ်ရက် ၈ နာရီ တစ်ပတ်ကို နာရီ ၄၀ အလုပ်လုပ်မယ်ဆိုရင်တောင် တစ်လကို မြန်မာငွေ ၁၆ သိန်းကျော် ရရှိနိုင်ပါတယ်။

မြန်မာနိုင်ငံမှာ ဘွဲ့ရတစ်ယောက်အနေနဲ့ အလုပ်တစ်ခုခုရရင်တောင် တစ်လဝင်ငွေ ကျပ် သုံးသိန်းထက် မပိုနိုင်တာကြောင့် ပြည်ပထွက်အလုပ်လုပ်ဖို့ ဆုံးဖြတ်လိုက်တာလို့ ဂျပန် နိုင်ငံကို သွားရောက်ဖို့ ကြိုးစားနေသူ ကိုနောင်နောင်က ဆိုပါတယ်။

“ကျနော်တို့က နဂိုကတည်းက မိဘက ပြည့်စုံတဲ့ လူတန်းစားထဲက မဟုတ်တဲ့အတွက် ကိုယ့်ဘဝကိုယ် လူတန်းစေ့နေနိုင်ဖို့အတွက် ဒီနိုင်ငံမှာ အလုပ်လုပ်နေရင် စားစရိတ်၊ သောက်စရိတ်၊ ကိုယ့်ရဲ့ ကုန်ကျစရိတ် အားလုံးနုတ်ပြီး တစ်လတစ်လ ကိုယ်ဘယ် လောက် စုနိုင်မလဲ။ ကိုယ့်အသက် ဘယ်လောက်မှာ ကိုယ်လိုချင်တဲ့ ဘဝမျိုးရောက်မလဲ ဆိုတာ ပြန်တွက်ကြည့်တဲ့အခြေအနေမှာ ကျနော်တို့ ဒီနိုင်ငံမှာ ကျနော်တို့ရမယ့် ဘွဲ့ လေးနဲ့ ဆက်ပြီးအလုပ်လုပ်နေမယ်ဆိုရင် ဘယ်လိုမှ အဆင်မပြေဘူး။ လစာက ဘွဲ့ရပြီး ရင်တောင်မှ နှစ်သိန်းခွဲ၊ သုံးသိန်း။ အဲကနေ ဘာမှပိုလာဖို့ မရှိတဲ့အတွက်ကြောင့် ဒါပြည် ပထွက်ပြီး အလုပ်လုပ်ဖို့ကိုပဲ ရွေးချယ်ခဲ့ကြတာပေါ့”

ကိုနောင်နောင်က ဂျပန်မှာအလုပ်လုပ်ပြီး ပြန်လာတဲ့အခါ သူ့ရဲ့ဇာတိမြို့မှာ စားသောက် ဆိုင်တစ်ဆိုင်နဲ့ တက္ကသိုလ်ကျောင်းသူ/သားတွေအတွက် ဘော်ဒါဆောင်ဖွင့်လှစ်ဖို့ ရည်မှန်း ထားပါတယ်။ မြန်မာနိုင်ငံမှာ ဆက်ပြီးအလုပ်လုပ်နေမယ်ဆိုရင် ဒီရည်မှန်းချက် ဘယ်တော့ မှ ပြည့်မှာမဟုတ်ဘူးလို့ သူက ဆိုပါတယ်။

၁၀ တန်းအောင်ပြီးတဲ့နောက် အထက်တန်းကျောင်းသားတွေကို အိမ်အထိ စာလိုက်ပြပေး နေတဲ့ ကိုဇင်သူ တစ်ယောက်လည်း လုပ်ခလစာကောင်းကောင်းရနိုင်မယ့် ဂျပန်နိုင်ငံကို အမြန်ဆုံး သွားရောက်နိုင်ဖို့ ကြိုးစားနေပါတယ်။ သူ့ရဲ့ စိတ်ကူးအိပ်မက်က မိဘနှစ်ပါးကို အိမ်ကောင်းကောင်း တစ်လုံးဆောက်ပြီး ကျေးဇူးပြန်ဆပ်နိုင်ဖို့နဲ့ သူ့အနာဂတ်အတွက် ကိုယ်ပိုင်စတိုးဆိုင်လေး ဖွင့်ချင်တာပါ။

ဂျပန်နိုင်ငံဟာ နည်းပညာဖွံ့ဖြိုးတိုးတက်ပြီး လုပ်ရင်လုပ်သလောက် အချိန်နဲ့အမျှ ဝင်ငွေရ တဲ့နိုင်ငံမို့ စွန့်စွန့်စားစား သွားရောက်အလုပ်လုပ်ကိုင်ဖို့ ဆုံးဖြတ်ထားတာလို့ ကိုဇင်ကိုက ဆိုပါတယ်။

“တခြားနိုင်ငံတွေနဲ့ယှဉ်ရင် ဂျပန်နိုင်ငံက IT ပိုင်းနဲ့ပတ်သက်လာရင် ပိုပြီးထွန်းကားမယ် လို့ ထင်တယ်။ စက်မှုလုပ်ငန်းတွေလည်း တခြားနိုင်ငံတွေနဲ့ယှဉ်ရင် ပိုပြီးထွန်းကားတယ် ပေါ့။ ပြီးတော့ အဓိက ကတော့ အချိန်ပေါ့။ အချိန်ကို သူတို့က ကောင်းကောင်းအသုံးချ တယ်။ အဲတော့ ဂျပန်နိုင်ငံကို သွားချင်တာပေါ့။ ဒီမှာက တစ်လမှ သုံးသိန်းခွဲ၊ လေးသိန်း ဆိုလို့ရှိရင် ဟိုမှာက တစ်လကို ဂျပန်ငွေ ၁၅ သောင်းဆိုလည်း ဟုတ်တယ်၊ ၁၆ သောင်း ဆိုလည်း ဟုတ်တယ်။ ကိုယ်လုပ်နိုင်တဲ့ အချိန်ပေါ် မူတည်ပြီး လုပ်ခလစာ အများကြီး ပြောင်းလဲသွားတယ်”

ဂျပန်နိုင်ငံဟာ တရားဝင် အလုပ်သင်ဗီဇာနဲ့ မြန်မာနိုင်ငံက ကျွမ်းကျင်လုပ်သားခေါ်ယူမှုကို ၂၀၁၃ ခုနှစ်လောက်ကတည်းက စတင်ခေါ်ယူခဲ့ပေမယ့် လက်တွေ့သွားရောက်နိုင်တဲ့ အခွင့် အလမ်း နည်းပါးခဲ့တယ်လို့ ရန်ကုန်မှာရှိတဲ့ ပြည်ပအလုပ်အကိုင် ဝန်ဆောင်မှုလုပ်ငန်းရှင် များအဖွဲ့ချုပ် တာဝန်ရှိသူတွေက ပြောပါတယ်။

အခုချိန်မှာတော့ အစစအရာရာ မြန်မာထက်ပိုပြီး ဖွံ့ဖြိုးတိုးတက်တဲ့ ဂျပန်နိုင်ငံမှာ လုပ်ခ နည်းနည်းနဲ့ ထိထိရောက်ရောက်ခိုင်းလို့ရမယ့် မြန်မာကျွမ်းကျင်လုပ်သားတွေကို ပိုခေါ် ယူလာတယ်လို့ ဆိုပါတယ်။

ဒါ့ကြောင့် လျှောက်ထားသူနဲ့ လက်တွေ့သွားရောက်အလုပ်လုပ်သူ အရေအတွက်ဟာ အရင်နှစ်တွေထက် နှစ်ဆနီးပါး မြင့်တက်လာပါတယ်။

အခုဆိုရင် လာမယ့်ဩဂုတ်လမှာ ဖြေရမယ့် ကျွမ်းကျင်လုပ်သား စာမေးပွဲအတွက် လူပြည့် သွားပြီမို့ နောက်ထပ်လျှောက်လွှာ လက်မခံနိုင်တော့ဘူးလို့ ပြည်ပအလုပ်အကိုင်ဝန်ဆောင် မှု လုပ်ငန်းရှင်များအဖွဲ့ချုပ် အဖွဲ့ဝင်တစ်ဦး ဖြစ်တဲ့ Silver Crane Services Agency က အမှုဆောင်အရာရှိ ဦးစိုင်းစည်သူက ပြောပါတယ်။

အခုလို အထွေထွေအကျပ်အတည်းနဲ့ ရင်ဆိုင်နေရချိန်မှာ ပြည်ပထွက်ချင်တဲ့ မြန်မာလူငယ် တွေ အဆင်ပြေစေဖို့အတွက် ဂျပန်နိုင်ငံက‌ခေါ်ယူတဲ့ ကျွမ်းကျင်လုပ်သားစာမေးပွဲတွေကို ထိုင်းနဲ့ ကမ္ဘောဒီးယားနိုင်ငံတွေမှာ မလုပ်ဘဲ ရန်ကုန်မှာပဲ လုပ်ပေးစေချင်တယ်လို့ ဦးစိုင်း စည်သူက ဆိုပါတယ်။

“စာမေးပွဲဆိုလို့ရှိရင်လည်း ကျနော်တို့က ဒီကျွမ်းကျင်လုပ်သား စာမေးပွဲတွေက မြန်မာ နိုင်ငံမှာ မကျင်းပဘူး။ မကျင်းပတဲ့ အကြောင်းအရင်းကိုလည်း ကျနော်တို့က နားမလည် ဘူး။ အဲတော့ ဘာဖြစ်လဲဆိုရင် ဘန်ကောက်တို့၊ ကမ္ဘောဒီးယားတို့မှာ သွားပြီးတော့ စာမေးပွဲသွားဖြေရတယ်။ ဖြေတဲ့အခါကျတော့ ပြီးခဲ့တဲ့ ၄ လပိုင်း၊ ၅ လပိုင်းမှာ သွားဖြေ တဲ့ကလေးတွေက ဒေါ်လာ တစ်ထောင်လောက် သူတို့က ကုန်တယ်။ ဒီလို စာမေးပွဲတွေ မြန်မာနိုင်ငံမှာ ကျင်းပပေးဖို့ အထက်ကလည်း အရမ်းအရေးကြီးတာပေါ့နော်။ လူငယ် တွေ အခုဆိုရင် ကျနော်တို့ သိသလောက်ဆိုရင် ဘန်ကောက်မှာဖြေရမယ့် ၈ လပိုင်း စာမေးပွဲက လူပြည့်သွားပြီ”

ဂျပန်အစိုးရက မြန်မာကျွမ်းကျင်လုပ်သားတွေကို သက်ကြီးရွယ်အို စောင့်ရှောက်ရေးလုပ် ငန်း၊ ဟိုတယ်နဲ့ စက်မှုလုပ်ငန်း အပါအဝင် လုပ်ငန်း ၁၆ မျိုးအတွက် ရွေးချယ်ခေါ်ယူလေ့ ရှိတယ်လို့ သူက ဆိုပါတယ်။

အခုနောက်ပိုင်းမှာတော့ ဂျပန်နိုင်ငံကို အလုပ်သင်ဗီဇာ၊ ကျွမ်းကျင်လုပ်သား ဗီဇာတွေသာ မက ကျောင်းသားဗီဇာနဲ့ပါ သွားရောက်ချင်တဲ့ လူငယ်တွေ ပိုများလာတယ်လို့ အလုပ် အကိုင်ရှာဖွေရေး အေဂျင်စီ တာဝန်ရှိသူတွေက ပြောပါတယ်။