རྒྱ་ནག་གི་འགོ་ཁྲིད་ཡུས་ཀྲེང་ཧྲེང་བོད་ལ་ཡོང་ནས་བརྗོད་དོན།

དེ་ཡང་ཤིན་ཧྭ གསར་ཁང་དེས་གནས་ཚུལ་སྤེལ་དོན། ཚེས་༦ ཉིན་ཡུས་ཀྲེང་ཧྲེང་གིས་དཀར་མཛེས་ཁུལ་གྱི་ས་གནས་བླ་སྤྲུལ་ཁག་ཅིག་ལ་ཚོགས་འདུ་སྐོང་ཏེ། མེས་རྒྱལ་གཅིག་གྱུར་སྟོབས་ལྡན་དུ་གྱུར་ཚེ། ད་གཟོད་བོད་ཁུལ་ལ་འཕེལ་རྒྱས་དང་བདེ་སྐྱིད་ཡོང་ཐུབ་པ་དང༌། བོད་རྒྱུད་ནང་བསྟན་ལ་ཡང་སྔར་བའི་འོད་སྟོང་འབར་བའི་མདུན་ལམ་བསྐྲུན་ཐུབ་སྟབས། དགོན་པར་དོ་དམ་ཀྱི་སྲིད་ཇུས་ལ་གྲྭ་བཙུན་ཚོས་རྒྱབ་སྐོར་བྱེད་དགོས་པ་དང་། ཏང་གིས་དགོན་པ་ལ་གཞི་རིམ་གྱི་མཐུན་རྐྱེན་སྦྱར་ཏེ་བོད་བརྒྱུད་ནང་བསྟན་དང་། སྤྱི་ཚོགས་རིང་ལུགས་གཉིས་མཉམ་གནས་མཐུན་སྦྱོར་བྱས་ནས་ཏཱ་ལའི་ཤོག་ཁག་ལ་འཐབ་རྩོད་ནུས་ཤུགས་ཆེ་རུ་གཏོང་དགོས་སྐོར་བརྗོད་ཡོད་འདུག

ཡུས་ཀྲེང་ཧྲེང་ནི་དེ་སྔོན་རྒྱ་ནག་ཧྲང་ཧེ་གྲོང་ཁྱེར་གྱི་དམར་ཤོག་དྲུང་ཆེ་དང༌། སྐབས་༡༧་པའི་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང༌། ཏང་གི་ཚོགས་ཆེན་༡༨ ཐོག་རྒྱ་ནག་ཆབ་སྲིད་ཅུས་ཀྱི་རྒྱུན་ལས་མི་བདུན་གྱི་གྲས་སུ་བསྐོ་བཞག་བྱས་ཡོད་ལ། རིང་མིན་ཕྱི་ཟླ་༣ ནང་བོད་ཀྱི་ལས་དོན་དང་ཐད་ཀར་འབྲེལ་བ་ཡོད་པའི་རྒྱ་ནག་དབུས་སྲིད་གྲོས་ཀྱི་འགོ་འཛིན་གྱི་འགན་འཁྱེར་རྒྱུའི་ཚོད་དཔག་བྱེད་ཀྱི་ཡོད་འདུག