ཡབ་གཞིས་གཡུ་ཐོག་འཇིགས་མེད་རྡོ་རྗེ་མཆོག་སྐུ་ཚེའི་འཕེན་པ་རྫོགས་པ།

དེ་སྔ་སྤྱི་ནོར༧གོང་ས་མཆོག་དང་བོད་གཞུང་ཚོང་དོན་སྐུ་ཚབ་རྒྱ་གར་དུ་ཕེབས་སྐབས་གསུང་བསྒྱུར་གནང་མྱོང་མཁན་ཡབ་གཞིས་གཡུ་ཐོག་འཇིགས་མེད་རྡོ་རྗེ་མཆོག་ཨ་རིའི་སྨན་ཁང་ཞིག་ཏུ་ཟླ ༨ ཚེས ༤ ཉིན་སྐུ་ཚེའི་འཕེན་པ་རྫོགས་པའི་གནས་ཚུལ་ཐོན་འདུགཡབ་གཞིས་གཡུ་ཐོག་འཇིགས་མེད་རྡོ་རྗེ་མཆོག་ནི།  ༡༩༣༡ ལོར་བོད་ཀྱི་རྒྱལ་ས་ལྷ་སར་༧རྒྱལ་མཆོག་༧སྐུ་ཕྲེང ༡༠ པའི་ཡབ་གཞིས་གཡུ་ཐོག་གཟིམ་ཤག་ཏུ་ཡབ་གཡུ་ཐོག་བཀྲ་ཤིས་དོན་གྲུབ་དང་། ཡུམ་འཆི་མེད་གཡུ་སྒྲོན་གཉིས་ཀྱིས་སྲས་སུ་འཁྲུངས་ཤིང་།    ༡༩༤༡ ལོར་རྡོར་གླིང་གི་ཡེ་ཤུའི་སློབ་གྲྭར་དབྱིན་སྐད་སྦྱངས།  ༡༩༥༠ ལོར་བོད་གཞུང་ཚོང་དོན་སྐུ་ཚབ་རིམ་བཞི་ཟུར་ཁང་ལྷ་དབང་སྟོབས་རྒྱལ་མཆོག་དང་། མཁན་ཆུང་བློ་བཟང་ཚེ་དབང་མཆོག་རྒྱ་གར་གྱི་སྲིད་བློན་ནེཧ་རུ་མཆོག་དང་མཇལ་འཕྲད་གནང་སྐབས་ཁོང་གིས་གསུང་བསྒྱུར་གནང་བ་དང་། ༡༩༥༦ ལོར་སྤྱི་ནོར༧གོང་ས་མཆོག་རྒྱ་གར་དུ་བདག་ཅག་གི་སྟོན་པ་མཉམ་མེད་ཤྱཱཀྱ་ཐུབ་པ་མྱ་ངན་ལས་འདས་ནས་ལོ་ངོ ༢༥༠༠  འཁོར་བའི་རྗེས་དྲན་མཆོད་འབུལ་དུ་ཆིབས་སྒྱུར་བཀའ་དྲིན་བསྐྱང་སྐབས་དམ་པ་དེ་ཉིད་ཀྱིས་སྐུའི་གསུང་བསྒྱུར་གྱི་འགན་བཞེས་གནང་མྱོང་བ་མ་ཟད། ༡༩༥༩ ལོར་༧གོང་ས་མཆོག་རྒྱ་གར་དུ་བཙན་བྱོལ་ཆེད་ཕེབས་རྗེས་༧སྐུའི་གསུང་བསྒྱུར་གྱི་ཞབས་ཕྱི་ཞུས་གནང་ཡོད་པ་རེད།༧གོང་ས་༧སྐྱབས་མགོན་ཆེན་པོ་མཆོག་བོད་ནས་རྒྱ་གར་དུ་བཙན་བྱོལ་དུ་ཞབས་སོར་འཁོད་མ་ཐག། ཏེ་ཛི་པུར་དུ་རྒྱལ་སྤྱིའི་གསར་འགོད་པ་ཚོར་བོད་ནང་གི་གནས་སྟངས་གསལ་བཤད་དང་འབྲེལ་བའི་གསར་འགོད་ལྷན་ཚོགས་ཐོག་མར་གནང་སྐབས་གཡུ་ཐོག་འཇིགས་མེད་རྡོ་རྗེ་ལགས་ནས་གསུང་བསྒྱུར་ཞུས་པ་དང་། གསར་འགོད་གསལ་བསྒྲགས་བོད་ཡིག་ནས་དབྱིན་ཡིག་ཐོག་ཕབ་བསྒྱུར་ཞུས་པ་སྒྲོགས་སྦྱང་གནང་མཁན་དེ་ཡང་ཡིན་པ་རེད་ལ།  དེ་བཞིན་རྒྱ་གར་མ་སུ་རིར༧རྒྱལ་བའི་གཟིམ་ཆུང་དང་བོད་གཞུང་གི་འཕྲལ་སེལ་ལས་ཁུངས་འཛུགས་སྐབས་སུའང་དབྱིན་དྲུང་གི་ཕྱག་ཡིག་ཞབས་ཞུས་ཡོད། ཁོང་༡༩༦༩ ལོར་ཨ་རིར་གནས་སྤོས་པ་དང་། ༡༩༧༩ ལོར ༧གོང་ས་མཆོག་ཨ་རིར་ཆིབས་བསྒྱུར་ཐོག་མ་དེ་བསྐྱངས་སྐབས་ཨ་རིའི་སིཡ་ཊཱལ་མངའ་སྡེར་ཆིབས་བསྒྱུར་གོ་སྒྲིག་ཞུས་གནང་ཡོད་པ་རེད།

གསར་འགོད་པ་སྟག་ལྷ་རྒྱལ།