ཤིན་ཅང་གྱི་རྒྱ་ནག་དམར་ཤོག་ཚོགས་པའི་དྲུང་ཆེ་ཁྲེན་ཆོན་གོ་གོ་གནས་ནས་གནས་སྤོས་བྱ་རྒྱུ།

རྒྱ་ནག་གི་ཤར་ཏུར་ཀིསྟན་ནམ་ཤིན་ཅང་གྱི་རྒྱ་ནག་དམར་ཤོག་ཚོགས་པའི་དྲུང་ཆེ་ ཁྲེན་ཆོན་གོ་ Chen Quanguo རང་གི་གོ་གནས་ནས་གནས་སྤོས་གིས་ཁོང་གི་ཚབ་ཏུ་རྒྱ་ནག་གི་གུང་ཏོང་ཞིང་ཆེན་གྱི་དམར་ཤོག་ཚོགས་པའི་དྲུང་ཆེ་Ma Xin grui བསྐོ་བཞག་བྱས་ཡོད་པ་རེས་གཟའ་སྤེན་པ་ཉིན་རྒྱ་ནག་གཞུང་འབྲེལ་ཤིན་ཧ་གསར་འགྱུར་ཁང་གིས་གནས་ཚུལ་སྤེལ་འདུག ཁྲེན་ཆོན་གོ་ནི་ཤིན་ཅང་ནང་ཡུ་གུར་དང་ཁ་ཆེའི་གྲངས་ཉུང་མི་རིགས་ཚོའི་ཐོག་དྲག་གནོན་ཧ་ཅང་གི་ཤུགས་ཆེ་བྱས་པའི་རྐྱེན་གྱིས་ཁོ་པར་ཨ་མི་རི་ཀ་གཙོས་པའི་ནུབ་ཕྱོགས་རྒྱལ་ཁབ་ཁག་ཅིག་གིས་དཔལ་འབྱོར་གྱི་ཉེས་ཆད་བཀལ་ཡོད་པ་རེད། ཡིན་ནའང་གནས་ཚུལ་ནང་བཀོད་པར་གཞིགས་ན་འཆར་ལོའི་ནང་རྒྱ་ནག་དམར་ཤོག་ཚོགས་པའི་དབུས་རྒྱུན་ལས་ཁང་གི་མི་འགྲོ་གཏན་འཁེལ་བྱེད་ཀྱི་ཡོད་སྟབས་ཁོ་པ་དེར་གནས་སྤར་བྱེད་རྒྱུ་ཡིན་ལུགས་བཀོད་འདུག 

འདི་དང་འབྲེལ་ཁ་ཉིན་ཨ་མི་རི་ཀའི་སྲིད་འཛིན་Biden མཆོག་གིས་ཡུ་གུར་མི་རིགས་ཚོར་རྒྱ་ནག་གཞུང་གིས་བཙན་དབང་གིས་ངལ་སྩོལ་བསྐུལ་མ་ཆོག་པའི་ཁྲིམས་གཞིའི་ཐོག་མཚན་རྟག་བཀོད་གནང་བའི་རྗེས་ཨ་མི་རི་ཀའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་སྤྱི་བསྒྲགས་ཤིག་སྤེལ་གནང་ཡོད་ཅིང་། སྤྱི་བསྒྲགས་དེའི་ནང་ཁོང་གིས། དེང་སྐབས་རྒྱ་ནག་གཞུང་གིས་ཡུ་གུར་དང་ཁ་ཆེའི་གྲངས་ཉུང་མི་རིགས་གཞན་རྣམས་རྩ་མེད་བཟོ་བའི་སྲིད་བྱུས་དེ་ནི་འཛམ་གླིང་མི་མང་གི་སེམས་གཏིང་ནས་གདོང་ལེན་བྱེད་དགོས་པའི་གནད་དོན་ཞིག་ཆགས་ཡོད། དེ་འདྲ་སོང་ཙང་ཨ་མི་རི་ཀའི་གྲོས་ཚོགས་ཀྱིས་རྒྱ་ནག་དམར་ཤོག་ཚོགས་པས་་བཙན་དབང་གི་སྒོ་ནས་་ངལ་སྩོལ་བསྐུལ་ཕྱོགས་དེར་འགན་འཁུར་དང་ཡ་ང་བའི་བྱེད་བབས་དེ་མཚམས་འཇོག་ཡོང་ཆེད་ཁྲིམས་འཆར་གཏན་འཁེལ་གནང་ཡོད་ཅེས་དང་། རྒྱ་ནག་དམར་ཤོག་ཚོགས་པས་ཤིན་ཅང་དང་ཧོང་ཀོང།བོད་དང་རྒྱ་ནག་གི་ས་ཕྱོགས་གང་སར་འགྲོ་བ་མིའི་ཐོབ་ཐང་བརྡལ་བཤིག་བཏང་བ་དེར་ཨ་མི་རི་ཀའི་སྲིད་དོན་ཚོགས་པ་གཉིས་ཀ་དང་གྲོས་ཚོགས་གོང་འོག་གཉིས་ཀས་གདོང་ལེན་དང་སྐྱོན་བརྗོད་མུ་མཐུད་བྱེད་རྒྱུ་ཡིན། གལ་སྲིད་ཨ་མི་རི་ཀས་དཔལ་འབྱོར་གྱི་ཁེ་ཕན་ཆེད་རྒྱ་ནག་གི་འགྲོ་བ་མིའི་ཐོབ་ཐང་བརྡལ་བཤིག་དེ་དག་འཐེར་འདོན་མ་གནང་བ་ཡིན་ན་འཛམ་གླིང་གི་ས་ཕྱོགས་གང་ནའང་འགྲོ་བ་མིའི་ཐོབ་ཐང་གི་གནད་དོན་ཐོག་བཤོད་རྒྱུར་བཟང་སྤྱོད་ཀྱི་ཐོག་ནས་ཐོབ་ཐང་དེ་རླགས་ཡོད་པ་རེད་ཅེས་གསུང་འདུག
གསར་འགོད་པ། ལྷུན་གྲུབ་ཚེ་རིང།
རྩོམ་སྒྲིག་པ། རིག་ལྡན་སྒྲོལ་མ།
དྲ་ཐོག་སྤེལ་མཁན། ཡེ་ཤེས་བཀྲ་ཤིས།