རྒྱ་ནག་གི་སྲིད་འཛིན་ཞི་ཅིན་ཕིན་གྱིས་པ་ཀིས་ཐན་ལ་གཟིགས་སྐོར།

རྒྱ་ནག་དང་པ་ཀིས་ཐན་རྒྱལ་ཁབ་གཉིས་བར་ཨ་སྒོར་ཐེར་འབུམ་༤༦་གནས་པའི་ཚོང་འབྲེལ་ཁག་ལ་ས་རྟགས་བཀོད་འཆར་ཡོད་པ།
དེ་ཡང་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་སྤྱི་ཚེས་༢༠ནས་བཟུང་ཉིན་གྲངས་གཉིས་རིང་པ་ཀིས་ཐན་ལ་གཟིགས་སྐོར་གནང་རྒྱུ་དང་། སྐབས་དེར་ཡུལ་གྲུ་གཉིས་དབར་ཨ་སྒོར་ཐེར་འབུམ་༤༦་གནས་པའི་ཚོང་འབྲེལ་ཁག་ལ་ས་རྟགས་བཀོད་འཆར་ཡོད་ཅིང་། རྒྱ་ནག་གི་སྲིད་འཛིན་ཞི་ཅིན་ཕིན་པ་ཀིས་ཐན་ལ་མ་ཕེབས་གོང་ལ་ཡུལ་དེའི་གསར་ཤོག་ཅིག་ནང་རྩོམ་བྲིས་ཤིག་སྤེལ་ཏེ་ཁོང་གིས་པ་ཀིས་ཐན་ནང་གཟིགས་སྐོར་གནང་བ་ད་རེས་ཐོག་མ་དེ་ཡིན་པ་དང་། གཟིགས་སྐོར་དེ་ནི་རང་ཉིད་ཀྱི་གཅེན་པོའི་ནང་འགྲོ་གིན་ཡོད་པའི་ཚོར་བ་ཡོང་གི་ཡོད་ལུགས་བརྗོད་འདུག་ལ་གཟིགས་སྐོར་འདིའི་སྐབས་ལ་པ་ཀིས་ཐན་གྱི་དཔོན་རིགས་ཚོ་དང་ལྷན་དུ་ཡུལ་གྲུ་ཕན་ཚུན་གྱི་འབྲེལ་ལམ་ཐད་ཞིབ་འཇུག་བྱ་རྒྱུ་དང་། ཡུལ་གྲུ་གཉིས་ནས་དཔལ་འབྱོར་འབྲེལ་ལམ་ཡར་རྒྱས་ཆེན་པོ་གཏོང་རྒྱུ། དེ་བཞིན་ལས་དོན་གཞན་ཁག་གི་ཐོག་ལ་འབྲེལ་ལམ་ཡར་རྒྱས་གཏོང་ཕྱོགས་སོགས་ཀྱི་སྐོར་བཀའ་བསྡུར་གནང་རྒྱུ་ཡིན་ལུགས་ཀྱང་བརྗོད་འདུག སྲིད་འཛིན་ཞི་ཅིན་ཕིན་གྱིས་པ་ཀིས་ཐན་ནང་གཟིགས་སྐོར་བསྐྱོད་པ་ད་རེས་ཐེངས་དང་པོ་དེ་ཡིན་པ་རེད་ལ་ཡང་དེ་ནི་ཞི་ཅིན་ཕིན་གྱིས་ཕྱི་ལོ་༢༠༡༥་ལོའི་ནང་ཕྱིའི་རྒྱལ་ཁབ་ལ་གཟིགས་སྐོར་ཕེབས་པ་ཡང་ཐེངས་མ་དང་པོ་དེ་ཡིན་པ་རེད། གོང་ཞུས་ལྟར་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་དེ་རིང་གཟའ་ཟླ་བ་དང་སང་ཉིན་གཟའ་མིག་དམར་ཉིན་གཉིས་རིང་པ་ཀིས་ཐན་ནང་གཟིགས་སྐོར་གནང་སྐབས་ཡུལ་དེའི་སྲིད་འཛིན་Mamnoon Hussainམཆོག་དང་། སྲིད་བློན་Nawaz Sharifདབུས་པའི་ཆེས་མཐོའི་མི་སྣ་ཁག་དང་མཇལ་འཕྲད་བཀའ་མོལ་གནང་རྒྱུ་མ་ཟད། རྒྱ་མིས་ཤིན་ཅང་ཞེས་འབོད་པའི་ཤར་ཏུས་ཀིས་ཐན་གྱི་མཚོ་ཁའི་གྲོང་ཁྱེར་Gwadarབརྒྱུད་ནས་པ་ཀིས་ཐན་གྱིས་དབང་བསྒྱུར་འོག་ཡོད་པའི་ཀ་ཤི་མིར་དང་འབྲེལ་མཐུད་བྱ་རྒྱུའི་ལས་གཞིའི་སྐོར་ལ་ཡང་བཀའ་མོལ་འགོ་འཛུགས་གནང་འཆར་ཡོད་པ་དང་། པ་ཀིས་ཐན་ནང་འཚམས་གཟིགས་ཀྱི་རྗེས་སུ་ཨིན་གྲོ་ནི་ཤི་ཡའི་གྲོང་ཁྱེར་Bandungནང་འཚོགས་རྒྱུའི་ཨེ་ཤི་ཡ་དང་ཨ་ཕེ་རི་ཀའི་ཚོགས་ཆེན་ལ་ཕེབས་འཆར་ཡོད་པ་རེད།

གསར་འགོད་པ་སེང་གེ་རི་བསོད་ནམས་ལྷ་མོ།