སྤྱི་ནོར་༧གོང་ས་མཆོག་གིས་ནད་ཡམས་དང་འབྲེལ་བའི་དགོས་ངེས་ཅན་ཚོར་ཕྱག་དངུལ་ཞལ་འདེབས་སྩལ།

༧གོང་ས་མཆོག་གིས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གི་མཚན་ཐོག་ཏོག་དབྱིབས་ནད་ཡམས་དང་འབྲེལ་བའི་ཉམས་ཐག་དགོས་ངེས་ཅན་ཚོར་ཕྱག་དངུལ་ཞལ་འདེབས་སྩལ་གནང་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་འདི་ཚེས་༢༦་ཉིན། རྒྱ་གར་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་(Shri Jai Ram Thakur)་མཆོག་གི་མཚན་ཐོག་བརྒྱུད། ཏོག་དབྱིབས་ནད་ཡམས་གསར་བ་སྔོན་འགོག་དང་། དེ་འབྲེལ་ས་གནས་ཀྱི་མི་དམངས་ཉམས་ཐག་དགོས་ངེས་ཅན་ཚོར་བཟའ་ཆས་རིགས་མཁོ་སྤྲོད་ཆེད་དུ་བཙུགས་པའི་ཛ་དྲག་མ་དངུལ་ཐེབས་རྩར་དགའ་ལྡན་ཕོ་བྲང་ཡིག་ཚང་གི་༧གོང་ས་ཏཱ་ལའི་བླ་བའི་དགེ་རྩ་ཚོགས་པའི་མཚན་ཐོག་ནས་ཕྱག་དངུལ་གང་མཚམས་ཞལ་འདེབས་གནང་ཡོད་པ་མ་ཟད། གདུང་སེམས་མཉམ་སྐྱེས་ཀྱི་ཕྱག་ཡིག་སྩལ་ཡོད་པ་དགའ་ལྡན་ཕོ་བྲང་ཡིག་ཚང་གི་དྲུང་ཆེ་འཆི་མེད་རིག་འཛིན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་ཡོད།
ཕྱག་ཡིག་ནང་༧གོང་ས་མཆོག་གིས། ཧི་མ་ཅལ་མངའ་སྡེ་འདི་བཞིན་ལོ་ངོ་དྲུག་བཅུའི་རིང་སྐུ་ཉིད་ཀྱི་བཞུགས་སྒར་ཆགས་ཡུལ་ལ་སོང་། རང་བཞིན་གྱིས་མངའ་སྡེའི་མི་དམངས་ལ་ཐུགས་ཉེ་པོ་ཡོད། དེ་བས་ཛ་དྲག་གི་སྐབས་འདིར་མངའ་སྡེའི་མི་དམངས་ལ་གུས་བརྩི་དང་གདུང་སེམས་མཉམ་སྐྱེས་མཚོན་ཆེད་ཞལ་འདེབས་གནང་གི་ཡོད། རྒྱ་གར་གྱི་སྲིད་བློན་མོ་དྷི་མཆོག་གིས་སྣེ་ཁྲིད་རྒྱ་གར་དབུས་གཞུང་གིས་ཏོག་དབྱིབས་ནད་ཡམས་གསར་བ་འདི་ཁྱབ་གདལ་སྔོན་འགོག་གི་ཆེད་དུ་ཕྱག་ལས་གནང་བཞིན་པ་དེ་དག་ཚང་མ་ལམ་ལྷོང་ཡོང་བའི་ཐུགས་སྨོན་དང་གདེང་སྤོབས་ཡོད་པ་བཀའ་སྩལ་འདུག
དགའ་ལྡན་ཕོ་བྲང་ཡིག་ཚང་གི་དྲུང་ཆེ་འཆི་མེད་རིག་འཛིན་ལགས་ཀྱིས་གསུང་ན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུ་ཁམས་སྔར་བཞིན་གསལ་ཐང་ངང་བཞུགས་ཡོད་པས་བོད་མི་གཙོ་བོར་གྱུར་བའི་དད་ལྡན་རྗེས་འབྲངས་བ་ཚོ་ཐུགས་བློ་བདེ་བོའི་ངང་བཞུགས་ཆོག དེང་སྐབས་ནད་ཡམས་ཁྱབ་གདལ་གྱི་སྐབས། ཕོ་བྲང་ནང་དུ་དྲུང་ཆེ་མ་གཏོགས་གཞན་ལས་བྱེད་སུ་གང་ཕེབས་མི་ཆོག་པ་བཅས་ཚང་མས་དམ་གཟབ་གནང་གི་ཡོད་པ་འགྲེལ་བརྗོད་གནང་བྱུང་།