ཨི་རན་རྡུལ་ཕྲན་ལས་གཞི་མཚམས་འཇོག་ཡོང་ཐབས་ཚོགས་འདུ།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལས་དོན་ལྷན་ཁང་གི་གཏེན་འཇགས་ཚོགས་མིའི་ཡུལ་གྲུ་ཨིན་ཇི་དང་ ཨ་མེ་རི་ཀ་ ཕེརནསི་ ར་ཤི་ཡ་ རྒྱ་ནག་དང་ ཇར་མན་བཅས་ཀྱི་ཐོག་ཡོ་རོབ་མཉམ་འབྲེལ་མཐུན་ཚོགས་དང་ཨི་རན་དབར་ཨི་རན་གྱི་རྡུལ་ཕྲན་ལས་གཞི་མཚམས་འཇོག་ཡོང་ཐབས་ལ་དམིགས་པའི་ཉིན་གྲངས་གཉིས་རིང་གི་ཚོགས་འདུ་གཟའ་སྤེན་པའི་ཉིན་མཇུག་བསྒྲིལ་ཞིང་ཚོགས་འདུ་དེ་ཏུར་ཀིའི་རྒྱལ་ས་ཨིསི་ཏན་སྦུལ་དུ་ཚུགས་ཡོད་པ་རེད།

གནས་ཚུལ་ཐོན་པར་གཞིགས་ན་ ཡོ་རོབ་མཉམ་འབྲེལ་མཐུན་ཚོགས་ཀྱི་ཕྱི་སྲིད་ལས་དོན་གྱི་དབུ་འཁྲིད་ལྕམ་ཀེ་ཐེ་རིན་ཨེཤི་ཀྲེན་གྱིས་ ཚོགས་འདུ་དེའི་ཞོར་དུ་ཨ་མི་རི་ཀའི་སྐུ་ཚབ་དང་ཨི་རན་གྱི་སྐུ་ཚབ་དབར་ཐད་ཀར་ཟུར་དུ་གྲོས་མོལ་འབྱུང་ཐབས་གནང་འདུག་ཀྱང་ ཨི་རན་གྱིས་དེར་དངས་ལེན་བྱས་མེད་སྐོར་ ཨི་རན་གྱི་རྡུལ་ཕྲན་ལས་དོན་ཐད་ཀྱི་གྲོས་མོལ་སྐུ་ཚབ་ས་ཨིརྡ་ཇ་ལི་ལིའི་ལས་བྱ་བ་ཨ་སྦོལ་ཕེ་ཛལ་ཛོ་རེ་ལྦན་གྱིས་བརྗོད་འདུག།

ཨ་མེ་རི་ཀ་དང་ཨི་རན་དབར་ཕྱི་ལོ་༡༩༧༩ལོ་ནས་བཟུང་དངོས་སུ་ཐད་ཀར་འབྲེལ་ལམ་མེད་ཅིང་ཕྱོགས་གཉིས་པོས་ཡོངས་གྲགས་མིན་པའི་བརྒྱུད་ལམ་གྱི་ཐོག་ནས་འབྲེལ་ལམ་བྱེད་བཞིན་ཡོད་ཀྱང་ ཨི་རན་གྱི་ངོས་ནས་དེ་དོན་ཕྱིར་བསྒྲགས་གང་ཡང་བྱེད་ཀྱི་མེད་པ་རེད།།