བོད་དུ་རྒྱ་མི་ཡུལ་བསྐོར་བ་མང་པོ་ཡོང་ཆོག་པ།

༄༅༎ཉེ་ཆར་བོད་ཀྱི་རྒྱལ་ས་ལྷ་སའི་ནང་བོད་མི་གཉིས་ཀྱི་རང་ལུས་མེར་བསྲེག་བཏང་ནས་རྒྱ་གཞུང་ལ་ངོ་རྒོལ་གནང་རྗེས་རྒྱ་གཞུང་གིས་ཕྱི་རྒྱལ་བ་ཚོ་བོད་ནང་ཡོང་མི་ཆོག་པའི་དམ་བསྒྲགས་བྱེད་བཞིན་ཡོད་ནའང༌། རྒྱལ་ས་ལྷ་སའི་ཁུལ་རྒྱ་ནག་སྐམ་ས་ཆེ་མོ་ནས་རྒྱ་རིགས་ཕོན་ཆེ་ཡུལ་སྐོར་སྤྲོ་འཆམ་ཆེད་འབྱོར་བཞིན་ཡོད་པའི་གནས་ཚུལ་འདུག།

དེ་སྔོན་༢༠༠༨ལོར་ལྷ་སའི་ནང་མི་མང་སྒེར་ལངས་བྱུང་བའི་རྗེས་རྒྱ་གཞུང་གིས་བོད་དེ་བཞིན་ཕྱི་ཕྱོགས་ལ་སྒོ་རྒྱབ་ཡོད་ནའང༌། རྒྱལ་ནང་གི་ཡུལ་སྐོར་སྤྲོ་འཆམ་པ་ཚོ་བོད་ནང་ལྟ་སྐོར་ལ་འགྲོ་ཆོག་གི་ཡོད་པ་མ་ཟད། རྒྱ་ནག་སྐམ་ས་ཆེ་མོ་ནས་ལྟ་སྐོར་བ་གང་མང་བོད་ནང་ཡོང་ཐུབ་རྒྱུར་ཉེ་བའི་ལོ་ཤས་ནང་རྒྱ་ནག་གཞུང་གིས་རྒྱ་ནག་ནས་བོད་བར་ཐད་ཀར་གནམ་གྲུ་དང་མེ་འཁོར་འགྲུལ་བཞུད་སྒོ་བཙུགས་པ་མ་ཟད། འགྲུལ་གླ་ཡང་ཁེ་རུ་བཏང་ཡོད་པ་རེད།

གྲོང་ཁྱེར་ལྷ་སའི་ནང་རྒྱ་ནག་ནས་འབྱོར་བའི་ཡུལ་སྐོར་སྤྲོ་འཆམ་པ་ཚོའི་ཆེད་དུ་བཙུགས་པའི་མགྲོན་ཁང་ཁག་གི་ཚོང་ཧ་ཅང་འགྲོ་རྒྱུག་ཆེན་པོ་ཡོད་པ་དང་། མཛེས་སྡུག་ཡིད་དུ་འོང་བའི་བོད་ཀྱི་ཡུལ་ལྗོངས་དེ་ཚོས་བྲེལ་ཟིང་ཆེ་བའི་གྲོང་ཁྱེར་ནས་ཡོང་མཁན་རྒྱ་མིའི་ཡུལ་སྐོར་སྤྲོ་འཆམ་པ་ཚོར་་སེམས་གུ་ཡངས་པོ་བཟོ་གི་ཡོད་པ་རེད།