རྒྱ་གར་གྱི་མེ་ཤུགས་འཕུར་མདེལ་ཚོད་ལྟ་ལམ་ལྷོངས་བྱུང་བ།

༄༅༎རེས་གཟའ་ཕུར་བུའི་ཉིན་རྒྱ་གར་ཤར་ཕྱོགས་མངའ་སྡེ་ཨུ་རི་སའི་ས་གནས་ཤིག་ནས་རྒྱ་གར་གྱི་ཨགྷ་ནི་ལྔ་པ་ཞེས་པའི་མེ་ཤུགས་འཕུར་མདེལ་ལམ་ལྷོང་ལྡན་པའི་ཐོག་ནས་ཚོད་ལྟ་བྱེད་ཐུབ་པ་བྱུང་བར་སྲིད་བློན་མཆོག་དང་། བདེ་སྲུང་བློན་ཆེན་རྣམ་གཉིས་ནས་འབྲེལ་ཡོད་ཚན་རིག་པ་ཚོར་རྒྱལ་ཁ་ཆེན་པོ་ཡིན་པའི་བསྔགས་བརྗོད་དང་འབྲེལ་འཚམས་འདྲི་གནང་ཡོད་འདུག གོང་དུ་ཞུས་པའི་ཨགྷ་ནི་ལྔ་པ་ཞེས་པ་དེ་ནི་འགྱངས་ཐག་ཀི་ལོ་མི་ཀྲར་ལྔ་སྟོང་བར་སྙོབ་ཐུབ་པའི་ནུས་ཚད་ཡོད་པ་དེ་ནི། རྒྱ་ནག་གི་རྒྱལ་ས་པེ་ཅིང་དང་། གྲོང་ཁྱེར་ཧྲང་ཧའེ་བར་འགྱངས་ཚད་དེའི་ནང་ཚུད་ཀྱི་ཡོད་པ་ཞིག་ཡིན་པ་མ་ཟད་མེ་ཤུགས་འཕུར་མདེལ་འདི་ཚོད་ལྟ་ལམ་ལྷོང་བྱུང་བའི་རྗེས་ད་ཆ་རྒྱ་གར་ཡང་ཨ་རི་དང་། ཕ་རན་སི། ར་ཤེ་ཡ། རྒྱ་ནག་རྒྱལ་ཁབ་བཅས་ཀྱི་མེ་ཤུགས་འཕུར་མདེལ་གྱི་ནུས་སྟོབས་དང་འདྲ་མཚུངས་ཆགས་ཡོད་པ་རེད། འོན་ཀྱང་རྒྱ་གར་གྱི་བདེ་སྲུང་ཉམས་ཞིབ་ཚན་པའི་མགྲིན་ཚབ་པ་ར་ཝི་ གྷུབ་ཏ་མཆོག་གིས། ད་རེས་མེ་ཤུགས་འཕུར་མདེལ་ཚོད་ལྟ་བྱེད་པ་དེས་རྒྱལ་ཁབ་སུ་ཞིག་ལའང་དམིགས་པ་ཞིག་མིན་ལུགས་གསལ་བཤད་གནང་ཡོད་པ་རེད། ཨག་ནི་ཞེས་པ་ནི་སམ་དྲི་ཏའི་སྐད་དུ་མེ་ལ་ཟེར་གྱི་ཡོད་པ་དང་། རྒྱ་གར་ནང་ཕྱི་ལོ་ ༡༩༨༣ ལོ་ནས་བཟུང་མེ་ཤུགས་འཕུར་མདེལ་ཚོད་ལྟ་བྱེད་རྒྱུ་འགོ་བཙུགས་པ་དང་། དེ་སྔའི་ཨགྷ་ནི་དང་པོ་ནས་བཞི་པ་བར་གྱི་ཚོད་ལྟ་བྱེད་པ་དེ་དག་ནི་འགྱངས་ཚད་དེ་ཙམ་རིང་པོ་སྙོབ་ཐུབ་ཀྱི་མེད་པ་རེད། ད་རེས་ཚོད་ལྟ་བྱེད་པ་དེ་ནི་དེང་དུས་འཕྲུལ་ཆས་ཚད་དང་ལྡན་པ་ཞིག་ཡིན་པ་དང་དེར་ཚན་རིག་མཁས་པ་བརྒྱད་བརྒྱ་ལྷག་ཙམ་ནས་ལོ་ངོ་གསུམ་རིང་འབད་བརྩོན་བྱེད་པའི་འབྲས་བུ་ཞིག་ཡིན་འདུག