རྒྱ་ནག་ནང་གི་ཞིང་པའི་ས་ཞིག་སྲུང་སྐྱོབ་དགོས་སྐོར་གསུངས།

༄༅༎ཕྱི་ཚེས་༢༧ཉིན་རྒྱ་ནག་གི་སྲིད་བློན་ལྦུན་ཅ་པའོ་ཡིས་པེ་ཅིན་ནང་ཚོགས་པའི་ཞིང་པའི་ས་གནས་ཀྱི་ལས་དོན་ལྷན་ཚོགས་ཤིག་གི་ཐོག་གཏམ་བཤད་སྤེལ་བའི་སྐབས་དཔོན་རིགས་ཚོར་ ས་ཞིང་ཤོར་བའི་ཞིང་པ་རྒྱ་ཕྲག་མང་པོ་ཡོད་པ་རྣམས་དང་མཉམ་དུ་འཛུགས་སྐྲུན་ལས་གཞིའི་ནང་བྱུང་བའི་ཁེ་ཕན་མཉམ་སྤྱོད་བྱེད་དགོས་པའི་སྐུལ་མ་བཏང་ཡོད་འདུག
རྒྱ་ནག་གི་སྲིད་བློན་ལྦུན་ཅ་པའོ་ཡིས་གོང་གི་གཏམ་བཤད་དེ་བཞིན་དེང་སྐབས་རྒྱ་ནག་ནང་ཞིང་པའི་ས་ཞིང་འཛུགས་སྐྲུན་ལས་གཞི་ཁག་ནང་ཤོར་ནས་ དགོས་ངེས་ཀྱི་ཐོབ་ཆ་སྤྲོད་ཀྱི་མེད་པའི་གནས་སྟངས་འོག་རྒྱ་ནག་གི་ས་ཁུལ་གང་སར་ངོ་རྒོལ་གྱི་ཐོ་རླབས་ཕྱུར་བཞིན་པའི་དུས་ཞིག་ཡིན་པ་དང་ ཉེ་ཆར་རྒྱ་ནག་གོང་ཏུང་དབུའུ་ཁན་གྲོང་ཚོའི་ནང་ཞིང་པའི་ས་ཞིང་དཔོན་རིགས་ཚོས་ས་ཁང་ཚོར་པར་གཙོང་ནས་ཞིང་པ་ཚོར་དགོས་ངེས་ཀྱི་ཐོབ་ཆ་མ་སྤྲད་པའི་རྐྱེན་གྱིས་བྱུང་བའི་ཞི་རྒྱ་ཆེ་བའི་ངོ་རྒོལ་གྱི་དོན་རྐྱེན་ཐག་གཅོད་བྱེད་པའི་སྐབས་རྒྱ་ནག་གོང་ཏུང་ཀྱི་ཞིང་ཆེན་གྱི་དཔོན་རིགས་ནས་ས་གནས་དཔོན་རིགས་ཚོས་ལས་དོན་ལ་ནོར་འཁྲུལ་བྱུང་བ་དང་། དེ་བཞིན་ཞིང་པ་ཚོའི་དགོས་འདུན་འོས་འཚམས་ཡིན་ཡང་ ས་གནས་དཔོན་རིགས་ཀྱིས་ཞིང་པའི་དགོས་འདུན་པ་དོ་སྣང་དང་། ཐག་གཅོད་མ་བྱས་པའི་ནོར་འཁྲུལ་བྱུང་ཡོད་ལུགས་ཁས་ལེན་བྱས་ཡོད་པ་བཞིན་ ད་རེས་རྒྱ་ནག་གི་སྲིད་བློན་དབུན་ཅའ་བའོ་ཡིས་གཏམ་བཤད་གནང་བའི་སྐབས་ ཞིང་པའི་ས་ཞིང་དང་རྒྱུ་དངོས་ལ་གནོད་འཚེ་བཟོས་པའི་གཞི་རྩའི་འོག་བཟོ་ལས་ཅན་དང་ གྲོང་ཁྱེར་འཛུགས་སྐྲུན་གྱི་ལས་གཞིའི་ཐོག་ཁེ་ཕན་སྐྲུན་ཐབས་བྱེད་ཀྱི་ཡོད་པ་དེར་འགྱུར་བཅོས་བྱ་དགོས་ལུགས་དང་ ཞིང་པའི་ས་ཞིང་འཛུགས་སྐྲུན་ལས་གཞི་ཁག་ནང་ཚུད་པའི་སྐབས་ཞི་ངཔ་ཚོར་དགོས་ངེས་ཀྱི་ཐོབ་ཆ་གློག་རྒྱུའི་ཚད་གཞི་ཐོ་རུ་གཏོང་དགོས་དེ་དགོས་ངེས་ཞིག་ཡིན་ལུགས་དང་། རྒྱ་ནག་གཞུང་གིས་ཞིང་པའི་ས་ཞིང་འདུ་ལེན་བྱེད་ཡས་ཀྱི་ལམ་ལུགས་དང་འགྲེལ་བརྗོད་ཁྲིམས་ལུགས་སྒྲིག་གཞི་ཁག་ལ་ཡང་འགྱུར་བཅོས་བྱ་དགོས་ལུགས་བརྗོད་འདུག།