རྒྱ་ནག་གཞུང་གིས་བོད་ནང་དྲག་གནོན་བྱེད་བཞིན་པར་སྐྱོན་བརྗོད།

ཨ་རིའི་བོད་དོན་ཆེད་དམིགས་བསལ་འབྲེལ་མཐུད་པ་ལྕམ་ ཨཛ་ར་ ཛེ་ཡ་ (Uzra Zeya)ལགས་ཀྱིས་རྒྱ་ནག་གཞུང་གིས་བོད་མིའི་ངོ་བོ་དང་རིག་གཞུང་རྩ་མེད་བཟོ་བའི་ལས་དོན་ལ་སྐྱོན་བརྗོད་གནང་བ་དང།  ཡང་ཁོང་གིས་ཕྱི་ཟླ་ ༡༢ ཚེས་ ༥ ཉིན་ཨ་མི་རི་ཀའི་གྲོས་ཚོགས་དང་འཛིན་སྐྱོང་གི་རྒྱ་ནག་ལས་དོན་ཐད་ཀྱི་ཆེས་མཐོའི་ལྷན་ཚོགས་(CECC)ཀྱིས་ཉན་ཞིབ་སྐབས་ཨ་མི་རི་ཀའི་གཞུང་གིས་རྒྱ་ནག་ལ་འགན་འཁྲི་བཟོ་བའི་ལས་དོན་རིམ་པ་བཀོད་ཡོད་པ་སོགས་ཀྱི་སྐོར་གསལ་སྟོན་གནང་འདུག

རྒྱ་ནག་གཞུང་གིས་ཁོང་ཚོའི་དབང་བསྒྱུར་འོག་ཡོད་པའི་བོད་དང་ཡུ་གུར་གཙོས་གྲངས་ཉུང་མི་རིགས་ཀྱི་ལོ་རྒྱུས་རྫུན་བཟོ་དང་། སྐད་ཡིག་དང་རིག་གཞུང་རྩ་མེད་བཟོ་བཞིན་པ་མ་ཟད། རྒྱལ་མཚམས་ལས་བརྒལ་ནས་མི་རིགས་དེ་དག་ལ་དྲག་གནོན་བྱེད་བཞིན་པ་སོགས་ཀྱི་གནས་སྟངས་ཐད་ཉན་ཞིབ་གནང་ཡོད་པ་དེའི་སྟེང་། ལྕམ་སྐུ་ ཨཛ་ར་ ཛེ་ཡ་ ལགས་ཀྱིས་རྒྱ་ནག་གཞུང་གིས་རྒྱ་ནག་གཅིག་པུའི་སྒྲོམ་གཞིའི་ལས་འཆར་འོག་བཙན་དབང་གིས་བོད་མི་གནས་སྤོ་བྱེད་དུ་བཅུག་པ་དང་། གྲྭ་བཙུན་ཚོར་རྒྱལ་ཁབ་ལ་དགའ་ཞེན་བྱེད་དགོས་པའི་དམ་བཅའ་འཇོག་ཏུ་འཇུག་པ། བོད་བརྒྱུད་ནང་བསྟན་གྱི་ཡང་སྲིད་ངོས་འཛིན་གྱི་བརྒྱུད་རིམ་ལ་ཐེ་བྱུས་བྱེད་པ། བོད་མིའི་ངོ་བོ་མཚོན་པའི་ཆོས་ལུགས་ཀྱི་བྱེད་སྒོ་ཁག་ལ་ཚོད་འཛིན་བྱེད་པ་བཅས་ཀྱི་ལམ་ནས་བོད་ཀྱི་ཕྱུག་པོའི་སྲོལ་རྒྱུན་རྣམས་རྩ་མེད་བཟོ་བཞིན་པའི་སྐོར་གསལ་འདོན་གནང་འདུག

དེ་བཞིན་ཉེ་ལམ་ཨ་མི་རི་ཀས་མནར་གཅོད་དེ་རིགས་འགོག་ཐབས་ཀྱི་ལས་དོན་སྤེལ་ཡོད་པའི་ཁོངས་སུ་བོད་ནང་ཚབས་ཆེའི་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་ནག་གི་དཔོན་རིགས་གཉིས་ལ་འཛམ་གླིང་ཡོངས་ཀྱི་Magnitsky ནག་ཉེས་བཅའ་ཁྲིམས་ལག་བསྟར་བྱས་ཏེ་ཉེས་ཆད་བཅད་ཡོད་པ་དང་།   བོད་པའི་ཕྲུ་གུ་བྱེ་བ་གཅིག་ལྷག་རྒྱ་ནག་གཞུང་གིས་བཙུགས་པའི་གཏན་འཇགས་སློབ་གྲྭར་བཅུགས་ནས་རང་གི་བོད་པའི་ངོ་བོ་རྩ་མེད་གཏོང་བཞིན་པའི་རྒྱ་ནག་གི་དཔོན་རིགས་ཚོར་ཐོངས་མཆན་གནང་ཕྱོགས་ཐད་དམ་བསྒྲགས་གནང་བ།  དེ་བཞིན་འདི་ལོ་ཕྱི་ཟླ་ ༧ པའི་ནང་མི་རིགས་དང་ཆོས་ལུགས་ཀྱི་ཚོགས་སྡེ་དབྱེ་འབྱེད་ཀྱིས་དྲག་གནོན་བྱེད་མཁན་རྒྱ་ནག་གི་དཔོན་རིགས་ཚོར་ཐོངས་མཆན་གནང་ཕྱོགས་ཐད་དམ་བསྒྲགས་ཤུགས་ཆེ་རུ་བཏང་བ་དང་།  ཨ་མི་རི་ཀའི་ངོས་ནས་བོད་ཕྱི་ནང་གཉིས་སུ་འགན་འཁྲི་བསྐུལ་བ་དང་འགྲོ་བ་མིའི་ཐོབ་ཐང་སྲུང་སྐྱོབ་ལ་ཞུམ་པ་མེད་པར་ལངས་རྒྱུའི་ཆོད་སེམས་བརྟན་པོ་ཡིན་ཞེས་ལྕམ་ཨཛ་ར་ ཛེ་ཡ་ ལགས་ཀྱིས་གསལ་སྟོན་གནང་འདུག།

གསར་འགོད་པ། དབྱངས་སྒྲོལ།

རྩོམ་སྒྲིག་པ། བསྟན་འཛིན་བདེ་སྐྱིད།

དྲྭ་ཐོག་སྤེལ་མཁན། པ་སངས་དོན་ལྡན།