ཀརྨ་པ་ཚུར་བུ་བླ་བྲང་ནས་དངུལ་འབོར་ཆེན་བརྙེད་པ།

༄༅༎གཟའ་ཕུར་བུའི་ཉིན་རྒྱ་གར་གྱི་ཉེན་རྟོག་པས་ཀརྨ་པ་ཚུར་ཕུ་བླ་བྲང་ནས་རྒྱ་གར་དང་རྒྱ་ནག་ཨ་མི་རི་ཀ་དང་ཐེ་ཝན་ལ་སོགས་པ་ཡུལ་གྲུ་མང་པོ་ཞིག་གི་དངུལ་ལོར་འབོར་ཆེན་ཞིག་བརྙེད་སོན་ལག་ཐོབ་བྱུང་བའི་རྗེས་མུ་འཐུད་རྒྱ་གར་དབུས་གཞུང་དང་ས་གནས་གཞུང་གི་དངུལ་དེ་དག་གི་འབྱུང་ཁུངས་ཞིབ་དཔྱོད་བྱེད་མུས་ཡིན་འདུག
དེ་ཡང་རྒྱ་གར་གྱི་མངའ་སྡེ་ཧི་མ་ཅལ་གྱི་ཉེན་རྟོག་པའི་སྤྱི་ཁྱབ་གཞོན་པ་  D.S. Minhas  གྱིས་ ཕྱིའི་རྒྱལ་ཁབ་བཅུ་གྲངས་ཞིག་གི་དངུལ་ལོར་འབོར་ཆེན་ཞིག་ཐོན་པ་དང་ལྷག་པར་དུ་རྒྱ་མིའི་དངུལ་ལོར་གྱི་གྲངས་འབོར་ཧ་ཅང་ཆེན་པོ་ཡིན་སྟབས་དེ་དག་གི་འབྱུང་ཁུངས་དང་དངུལ་དེ་དག་གི་དགོས་པ་གང་ཡིན་ཕྱོགས་ཡོངས་ནས་རྟོག་ཞིབ་བྱེད་རྒྱུ་ཡིན་པ་བརྗོད་པ་ཞིག་རྡ་རམ་ས་ལ་ནས་ཨེ་པི་གསར་ལས་ཁང་གིས་གནས་ཚུལ་སྤེལ་འདུག།
ཡང་ཨེ་པི་གསར་ལས་ཁང་གིས་གནས་ཚུལ་སྤེལ་བ་དེའི་ནང་ཧི་མ་ཅལ་མངའ་སྡེའི་ཉེན་རྟོག་སྤྱི་ཁྱབ་པ་གཞོན་པ་ Minhas ཡིས་གཟའ་པ་སངས་ཉིན་ཉེན་རྟོག་པས་རྒྱལ་དབང་ཀརྨ་པ་མཆོག་ལ་དྲི་ཞིབ་ཞུས་འདུག་པ་དང་ མུ་འཐུད་དྲི་ཞིབ་ཞུ་སྲིད་པ་ཡིན་པ་བརྗོད་པ་ཞིག་ལུང་འདྲེན་བྱས་འདུག་ན་ཡང་རྒྱལ་དབང་ཀརྨ་པ་མཆོག་གིས་བཀའ་ལན་ཇི་གནང་ཉེན་རྟོག་པས་སྤྱི་ཁྱབ་གཞོན་པས་འགྲེལ་བརྗོད་བྱས་མེད་པ་རེད་འདུག།
འོན་ཀྱང་བཙན་བྱོལ་བོད་མི་དམངས་སྤྱི་འཐུས་ཀྱི་ཚོགས་གཙོ་སྤེན་པ་ཚེ་རིང་ལགས་གཙོས་སྤྱི་འཐུས་ཁག་གཅིག་ཀརྨ་པ་རིན་པོ་ཆེ་མཆོག་མཇལ་བཅར་གྱིས་བོད་མི་དམངས་སྤྱི་འཐུས་ལྷན་ཚོགས་ཀྱི་ངོས་ནས་ ད་ལྟའི་གནས་ཚུལ་འདིའི་ཐད་གདུང་སེམས་མཉམ་བསྐྱེད་ཡོད་པ་ཞུས་པ་དང་སྦྲགས་ སྤྱི་འཐུས་ལྷན་ཚོགས་ཀྱི་ངོས་ནས་ཕྱག་རོགས་མཐུན་རྒྱུར་ཇི་ཐུབ་ཞུ་རྒྱུའི་སྙན་སེང་ཞུས་འདུག།  སྐབས་དེར་རྒྱལ་དབང་ཀརྨ་པ་རིན་པོ་ཆེ་མཆོག་ནས་དད་ལྡན་པ་ཚོས་དད་རྫས་སུ་ཕུལ་བའི་དངུལ་ཉར་ཕྱོགས་ཀྱི་ཐོག་ཐེ་བྱུས་གང་ཡང་གནང་གི་མེད་པ་དང་འདིའི་སྐོར་མཁྱེན་རྟོག་གང་ཡང་མེད་པ་གསལ་བཤད་གནང་འདུག་ལ་དེ་བཞིན་ཚུ་བུ་བླ་གྲང་གི་མགྲིན་ཚབ་པ་ཀརྨ་པ་ཆུང་རྒྱལ་པ་ཞུ་བ་ཞིག་གིས་གསར་འགོད་པ་ཚོས་དོ་སྣང་ཆེན་པོ་བྱེད་བཞིན་པ་དང་དྲི་བ་མང་པ་ཞིག་ཡོད་པ་ང་ཚོས་ཤེས་ཀྱི་ཡོད། འོན་ཀྱང་ད་ལྟའི་རྟོག་ཞིབ་ཀྱི་ལས་དོན་འདིའི་ནང་མཐའ་གཅིག་ཏུ་མཉམ་འབྲེལ་ཞུ་རྒྱུར་ང་ཚོར་དུས་ཚོད་གནང་སྐྱོང་ཡོང་བའི་འབོད་བསྐུལ་ཞུ་རྒྱུ་ཡིན་ཞེས་དང་བླ་བྲང་གི་ཁྲིམས་རྩོད་པ་ཚོས་གསར་འགོད་བསྒྲགས་གཏམ་ཞིག་གྲ་བསྒྲིགས་བྱེད་བཞིན་ཡོད་པ་གསུངས་འདུག།