རྒྱ་ནག་གི་སྐུ་ཚབ་ཚོར་དགག་ལན་ནན་པོ་རྒྱབ་གནང་འདུག

རྒྱལ་ཚོཊ་ཀྱི་མནར་གཅོད་ལ་འགོག་རྒོལ་བྱེད་པའི་ལྷན་ཚོཊ་ཐོག་རྒྱ་ནག་གིས་བཙོན་པ་ཚོར་མནར་གཅོད་ཚད་མེད་གཏོང་བཞིན་པ་གླེང་སློང་གནང་བ།
དེ་ཡང་ཉེ་ཆར་སུད་སིའི་གྲོང་ཁྱེར་ཇི་ནི་ཝ་ལ་ཚོགས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་མནར་གཅོད་ལ་འགོག་རྒོལ་བྱེད་པའི་ལྷན་ཚོགས་ཐོག་ལྷན་ཚོགས་དེའི་ངོས་ནས། རྒྱ་ནག་གཞུང་གི་ཉེན་རྟོག་པ་དང་བཙོན་སྲུང་བས་བོད་དང་ཡུ་གུར་མི་རིགས་ཀྱི་སྲིད་དོན་བཙོན་པ་ཚོའི་ཐོག་མནར་གཅོད་ཚད་མེད་གཏོང་གི་ཡོད་པའི་གནས་ཚུལ་ཐད་ཀར་གླེང་སློང་གནང་སྟེ། རྒྱ་ནག་གཞུང་ནས་རྒྱ་ནག་ནང་གི་བཙོན་པར་མནར་གཙོད་ཚད་ལས་བརྒལ་བ་བཏང་དང་གཏོང་བཞིན་པའི་གནད་དོན་དེའི་ཐོག་རྒྱ་ནག་ལ་གནོན་ཤུགས་ཆེན་པོ་ཞིག་སྤྲད་གནང་འདུག
སྤྱི་ཚེས་༡༧ཉིན། ཇི་ནི་ཝ་ལ་འཚོགས་པའི་འགྲོ་བ་མིའི་ཐོབ་ཐང་དང་མནར་གཅོད་ལ་འགོག་རྒོལ་བྱེད་པའི་རྒྱལ་སྤྱིའི་ལྷན་ཚོགས་དེའི་ཐོག ཚབས་ཆེའི་མནར་གཅོད་ཀྱི་གནས་ཚུལ་ལ་ཉམས་ཞིབ་གནང་མཁན་རྒྱལ་སྤྱིའི་ཆེད་ལས་པ་མི་དགུས། རྒྱ་ནག་གཞུང་ནས་བོད་མི་དང་ཡུ་གུར་བ། དེ་ བཞིན་ལྷོ་སོག་པོའི་ལས་འགུལ་བ་བཅས་ལ་མནར་གཅོད་ཚད་ལས་བརྒལ་བ་བཏང་དང་གཏོང་བཞིན་པའི་གནས་ཚུལ་ཁག་གི་ཐོག་ལྷན་ཚོགས་དེའི་ཐོག་བཞུགས་པའི་རྒྱ་ནག་གི་སྐུ་ཚབ་ཚོར་འདྲི་བ་ཧ་ཅང་ནན་པོ་བཏོན་གནང་ཡོད་པ་རེད་འདུག་ལ། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་མནར་གཅོད་ལ་ངོ་རྒོལ་བྱེད་པའི་ལྷན་ཚོགས་དེའི་ཡིག་ཐོག་གི་འདྲི་བ་ཁག་ལན་འདེབས་བྱེད་པའི་ལྷན་ཚོགས་དེའི་འགོ་ཚུགས་ཀྱི་གསུངས་བཤད་ཐོག་རྒྱ་ནག་གི་སྐུ་ཚབ་ཚོས། རྒྱ་ནག་གཞུང་གི་ངོས་ནས་བྱ་ཐབས་སྣ་ཚོགས་སྤྱད་དེ་བཙོན་པའི་གནས་སྟངས་ལེགས་བཅོས་ཡོང་ཐུབ་པ་བྱས་ཡོད་པ་དང་། དེར་བརྟེན་ད་ཆ་རྒྱ་ནག་གི་བཙོན་པའི་གནས་སྟངས་ཡར་རྒྱས་ཆེན་པོ་ཕྱིན་ཡོད་པའི་གནས་ལུགས་འགྲེལ་བརྗོད་བྱས་ཡོད་ཅིང་། ཡིན་ནའང་མཉམ་འབྲེལ་རྒྱལ་ཚོགས་ཀྱི་མནར་གཅོད་ལ་ངོ་རྒོལ་གྱི་ལྷན་ཚོགས་དེས་ཁ་སྔོན་བསྟན་འཛིན་བདེ་ལེགས་རིན་པོ་ཆེ་བཙོན་ཁང་ནང་རྐྱེན་འདས་སུ་ཕྱིན་པ་སོགས་བོད་ཁོ་ནར་ཐོན་པའི་བོད་མི་འཛིན་བཟུང་བྱས་པ་ཚོར་མནར་གཅོད་ཚད་ལས་བརྒལ་བ་བཏང་བའི་གནས་ཚུལ་ཁག་༢༤ཙམ་བཏོན་གནང་སྟེ་རྒྱ་ནག་གི་སྐུ་ཚབ་ཚོར་དགག་ལན་ནན་པོ་རྒྱབ་གནང་འདུག

གསར་འགོད་པ་ཀུན་བཟང་རིག་འཛིན།