འབར་མའི་བྱ་སྤྱོད་ལ་ཨ་རིས་ཐུགས་འཚབ་གནང་བ།

༄༅༎ཨ་མི་རི་ཀའི་ཞི་བདེ་རྒྱ་མཚོའི་མངའ་ཁུལ་གྱི་གནད་དོན་དང་ཤར་ཨེ་ཤེ་ཡའི་ལས་དོན་དྲུང་ཆེ་གཞོན་པའི་ལས་རོགས་ཇོ་སེཕ་ཡུན་(Joseph Yun)གྱིས། འབར་མའི་ནང་བཅའ་བཞུགས་ཨ་རིའི་གཞུང་ཚབ་ནས་རེས་གཟའ་པ་སངས་ཉིན་གསལ་བཏོན་གནང་བར་འབར་མའི་གཞུང་གིས་བྱང་ཀོ་རི་ཡ་དང་དྲག་པོའི་འབྲེལ་བ་གནང་གི་ཡོད་པའི་གནད་དོན་དེ་ཚོར་ཨ་མི་རི་ཁའི་ཕྱོགས་ནས་ཐུགས་འཚབ་ཡོད་ལུགས་གསུངས་ཡོད་པ་རེད། དེ་བཞིན་ཨ་རིའི་དྲུང་ཆེ་སྐུ་གཞོན་གྱིས་གསུངས་པར་ང་ཚོའི་རེ་བར་འབར་མའི་གཞུང་གིས་ཡུལ་མིའི་འགྲོ་བ་མིའི་ཐོབ་ཐང་སྲུང་སྐྱོབ་དང་སྲིད་དོན་གྱི་བཙོན་པ་རྣམས་གུ་ཡང་གློད་བཀྲོལ་ཡོང་ཆེད་དོན་ཕན་སོན་པའི་དགོངས་བཞེད་གནང་དགོས་པའི་སྐོར་འབོད་སྐུལ་ཞུས་གནང་ཡོད་པ་རེད།

སྔ་ལོ་ཨ་མི་རི་ཁའི་གཞུང་འབྲེལ་གྱི་གནས་ཚུལ་ཁག་ཅིག་ལྦི་ཀི་ལིཀ་(Wikileaks) ཞེས་པའི་གནས་ཚུལ་འབྱུང་ཁུངས་ནས་འགྲེལ་བརྗོད་བྱས་ཡོད་པར། འབར་མའི་གཞུང་གིས་བྱང་ཀོ་རི་ཡ་དང་གསང་བའི་སྒོ་ནས་རྡུལ་ཕྲན་གྱི་ལས་གཞིའི་རྒྱབ་སྐྱོར་རོགས་རམ་ལེན་གྱི་ཡོད་པའི་གནས་ཚུལ་བཏོན་ཡོད་པ་དེར། ཨ་མི་རི་ཁའི་ཕྱོགས་ནས་ཐུགས་ཚབས་གནང་གི་ཡོད་པ་དང་། གནད་དོན་དེ་ཚོའི་ཐད་རྒྱལ་སྤྱིའི་རྩ་ཁྲིམས་ནས་འགལ་འཛོལ་མི་ཡོང་བའི་དགོངས་བཞེད་ནན་པོ་གནང་དགོས་པའི་སྐོར་དང་། ཨ་མི་རི་ཁའི་ཕྱོགས་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྒྲིག་གཞིར་སྲུང་སྐྱོབ་ཞུ་བཞིན་ཡོད་ལུགས་འགྲེལ་བརྗོད་གནང་བཞག།