ཨ་རི་དང་རྒྱ་ནག་འབྲེལ་བ་བཙུཌ་ནས་ལོ་༣༠འཁོར་བའི་དུས་དྲན།

༄༅༎ཨ་རིའི་ཕྱི་སྲིད་དྲུང་ཆེ་སྐུ་གཞོན་པ་ཇོན་ནེག་རོ་པོན་ཀྲེ་རྒྱ་ནག་ནང་རྒྱ་ནག་དང་ཨ་རིའི་དབར་གཞུང་འབྲེལ་འབྲེལ་ལམ་བཙུགས་ཏེ་ལོ་ངོ་སུམ་ཅུ་འཁོར་བའི་དུས་དྲན་སྲུང་བརྩིའི་ཆེད་ཕེབས་ཡོད་པ་དང་རྒྱ་ནག་དང་ཨ་རིའི་དབར་གྱི་ཐོག་མའི་འབྲེལ་བ་དེ་ཕྱི་ལོ་༡༩༧༡ལོར་ཨ་རིའི་པིང་པོང་རྩེད་འགྲན་པ་ཁག་ཅིག་རྒྱ་ནག་ལ་རྩེད་འགྲན་ཆེད་མགྲོན་འབོད་དང་འབྲེལ་འབྲེལ་བ་འགོ་བཙུགས་བྱུང་བ་ལྟར་དོན་རྐྱེན་དེ་དྲན་གསོ་ཆེད་ཁ་ས་ཨ་རིའི་ཕྱི་སྲིད་དྲུང་ཆེ་སྐུ་གཞོན་གྱི་གཟིགས་བསྐོར་གྱི་སྐབས་སུའང་ཨ་རི་དང་རྒྱ་ནག་གི་པིང་པོང་རྩེད་འགྲན་པ་ཁག་ཅིག་གིས་པིང་པོང་རྩེད་འགྲན་གནང་བ་བརྒྱུད་འབྲེལ་ལམ་འགོ་བཙུགས་ཀྱི་བྱེད་སྒོ་དེར་དཔོན་རིགས་ཚོས་གཟིགས་ཞིབ་དང་འབྲེལ་དྲན་གསོ་ཞུས་ཡོད་པ་རེད།

ཨ་རིའི་པིང་པོང་རྩེད་འགྲན་པའི་ཁོངས་དེ་སྔ་ཕྱི་ལོ་༡༩༧༠འི་ནང་རྩེད་འགྲན་གནང་མཁན་ལོ་ན་ཆུང་ཤོས་ཡིན་པ་ཇུ་ཌི་ཧོར་ཕོརོ་སིཏ་ཞེས་པ་ཡང་མཉམ་བཞུགས་བྱས་ཡོད་པ་དང་ཁོ་པ་ད་ཆ་ལོ་ན་ལྔ་ཅུ་ཕེབས་ཡོད་པ་དང་ཁོང་གིས་པིང་པོང་རྩེད་འགྲན་དང་ངོས་རང་རྩེད་འགྲན་དེའི་ཆ་ཤས་ཤིག་ཡིན་པའི་ཆ་ནས་ཡུལ་གཉིས་ཀྱི་འབྲེལ་ལམ་འཕེལ་རྒྱས་ལ་ཞབས་འདེབས་ཆུང་ངུ་ཞིག་ཞུ་ཐུབ་པར་དགའ་ཚོར་ཆེན་པོ་བྱུང་སྐོར་གསུངས་ཡོད་པ་རེད།

པིང་པོང་རྩེད་འགྲན་དེ་ནི་སྐབས་དེའི་ཨ་རིའི་ནིག་སེན་སྲིད་གཞུང་གིས་ཨུ་རུ་སུའི་སྟོབས་ཤུགས་བཅོག་ཆེད་རྒྱ་ནག་ལྷན་སྐྱོངས་རྒྱུ་འབྲེལ་བའི་སྔོན་འགྲོ་ལྟ་བུ་དེ་ཡིན་པ་དང་རིང་པོར་མ་སོང་བར་ཨ་རིའི་ནིག་སེན་སྲིད་གཞུང་གིས་ཕྱི་ལོ་༡༩༧༩ལོའི་ཕྱི་ཟླ་དང་པོའི་ཚེས་གཅིག་ཉིན་རྒྱ་ནག་ལྷན་དུ་གཞུང་འབྲེལ་འབྲེལ་བ་དེ་བཙུགས་ཡོད་པ་རེད། ཨ་རིའི་ཕྱི་སྲིད་དྲུང་ཆེ་སྐུ་གཞོན་ཇོན་ནེག་རོ་པོན་ཀྲེ་ཡིས་འདས་པའི་ལོ་ངོ་སུམ་ཅུའི་ནང་ཡུལ་གཉིས་ཀྱི་འབྲེལ་བ་དེ་རྒྱ་ཆེ་གཏིང་ཟབ་ཞིག་བྱུང་ཡོད་པ་དང་འབྱུང་འགྱུར་ལོ་ངོ་སུམ་ཅུའི་ནང་འབྲེལ་ལམ་དེ་དེ་བས་བཟང་དུ་འགྲོ་ཡི་ཡོད་པ་གཟིགས་ཀྱི་ཡོད་སྐོར་གསུངས་ཡོད་པ་རེད།