ཨ་རི་སྐུ་ཚབ་ཐེ་དབན་དུ་ཕེབས་འཆར་ཡོད་པ།

༄༅༎ད་རེས་རྒྱ་ནག་གི་སྲིད་འཛིན་ཨ་རིར་འཚམས་འདྲིར་ཡོང་སྟེ། ཨ་རི་དང་རྒྱ་ནག་གི་སྲིད་འཛིན་དབར་གྲོས་མོལ་བྱུང་བའི་གནད་དོན་ཐེ་དབན་དུ་འགྲེལ་བརྗོད་བྱེད་པར་ཨ་མི་རི་ཀའི་ཐེ་དབན་གྱི་མཐོ་རིམ་སྐུ་ཚབ་སྐུ་ཞབས་རེའེ་མེནདྲ་གཟའ་འཁོར་འདིའི་ནང་ཐེ་དབན་དུ་འཚམས་འདྲི་ཕེབས་ཀྱི་ཡོད་པའི་སྐོར་དེ་རིང་ཨ་མི་རི་ཀའི་འབྲེལ་ཡོད་དཔོན་རིགས་ནས་གསུངས་ཡོད་པ་རེད།

དེ་ཡང་སྐུ་ཞབས་རེའེ་མེནདྲ་ནི་ཐེ་དབན་ནང་དུ་ཡོད་པའི་ཨ་མི་རི་ཀའི་འགན་འཛིན་ལྷན་ཚོགས་ཀྱི་ཚོགས་གཙོ་ཡིན་ཞིང༌། ཁོང་དེ་རིང་རེས་གཟའ་ཉི་མའི་ཕྱི་དྲོ་ཙམ་ལ་རྒྱལ་ས་ཐའེ་ཕེ་དུ་ཕེབས་འབྱོར་གནང་གི་ཡོད་པའི་སྐོར་ཐེ་དབན་ནང་དུ་ཡོད་པའི་ཨ་མི་རི་ཀའི་སྐུ་ཚབ་ནས་གསུངས་ཡོད་ཅིང༌། ཐེ་དབན་ཕྱི་སྲིད་ལྷན་ཁང་གི་མགྲིན་ཚབ་པ་ཇེམ་སི་ཀྲང་ཡིས་ཕེ་རིན་སི་གསར་འགོད་པར། ཨ་རིའི་མཐོ་རིམ་སྐུ་ཚབ་སྐུ་ཞབས་རེའེ་མེནདྲ་ད་རེས་ཐེ་དབན་དུ་འཚམས་འདྲིར་ཕེབས་དགོས་པའི་དམིགས་ཡུལ་ནི། ད་རེས་ཨ་རིའི་སྲིད་འཛིན་ཨོ་སྦ་མ་དང་རྒྱ་ནག་གི་སྲིད་འཛིན་ཧུའུ་ཇིན་ཐའོ་གཉིས་དབར་གྲོས་མོལ་བྱུང་བའི་གནད་དོན་འགྲེལ་བརྗོད་གནང་རྒྱུའི་ཆེད་དུ་ཡིན་པ་གསུངས་ཡོད་པ་རེད། ཐེ་དབན་གྱི་དཔོན་རིགས་ནས། རྒྱ་ནག་གི་སྲིད་འཛིན་ཧུ་ཇིན་ཐའོ་ཡི་ཨ་རིའི་ནང་གི་འཚམས་འདྲིའི་ཐོག་ལ་གཟབ་ནན་གྱིས་དོ་སྣང་ཆེན་པོ་བྱེད་བཞིན་ཡོད་པ་ནི། རྒྱ་ནག་ཕྱོགས་ནས་ཐེ་དབན་རྒྱ་ནག་གི་མངའ་འོག་ཡིན་པ་ཤོད་བཞིན་པ་ལྟར་གལ་ཏེ་ཨ་མི་རི་ཀས་རྒྱ་ནག་དང་འབྲེལ་ལམ་ཡར་རྒྱས་ཕྱིན་པ་ཡིན་ཚེ་ཐེ་དབན་གྱི་ཁེ་ཕན་ལ་གནོད་འཚེ་གཏོང་ཡོང་བསམ་པའི་ཐེ་དབན་ལ་བློ་འཚབ་ཡོད་པ་རེད།

ཐེ་དབན་གྱི་སྲིད་འཛིན་མའ་དབྱིང་ཅོ་ཡིས་གཟའ་འཁོར་སྔོན་དེར་ཧུའུ་ཇིན་ཐའོ་ཡི་ཨ་རིའི་འཚམས་འདྲི་ཐོག་བློ་འཚབ་ཡོད་པའི་གསལ་བསྒྲགས་ཤིག་སྤེལ་ཡོད་པར་བརྟེན། ཨ་རིའི་སྐུ་ཚབ་སྐུ་ཞབས་རེའེ་མེནདྲ་ཡིས་རེས་གཟའ་མིག་དམར་ཉིན་སྲིད་འཛིན་མའ་དབྱིང་ཅོ་དང་མཇལ་འཕྲད་གནང་རྒྱུའི་འཆར་གཞི་ཡོད་པ་མ་ཟད། གཟའ་འཁོར་སྔོན་དེར་ཨ་མི་རི་ཀའི་སྲིད་འཛིན་ཨོ་སྦ་མ་མཆོག་གིས་ཀྱང་ཨ་རིའི་གཞུང་གིས་ཐེ་དབན་ཐོག་འཛིན་པའི་ལངས་ཕྱོགས་གསལ་སྟོན་གནང་སྟེ། ཨ་མི་རི་ཀའི་ཕྱོགས་ནས་མུ་མཐུད་དེ་ཐེ་དབན་དང་ཨ་རིའི་འབྲེལ་བའི་གྲོས་མཐུན་ལ་རྒྱབ་སྐྱོར་བྱ་རྒྱུ་ཡིན་ཞེས་ཐེ་དབན་ལ་ཨ་རིའི་རྒྱབ་སྐྱོར་ཡོད་པའི་ཡིད་ཆེས་སྐྲུན་ཐབས་གནང་ཡོད་པ་རེད།།