རྒྱལ་ཚོགས་ཀྱི་བཀྲེས་སྐོམ་གྱི་དཀའ་ངལ་སེལ་ཐབས་ཀྱི་ལྷན་ཚོགས།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་བཀྲེས་སྐོམ་གྱི་དཀའ་ངལ་སེལ་ཐབས་ཀྱི་ལྷན་ཚོགས་སུ་རྒྱལ་ཁབ་ཚང་མས་མུ་མཐུད་ནས་དཀའ་ངལ་དེར་གདོང་ལེན་ནུས་པ་ཆེ་ཙམ་བཏོན་རྒྱུའི་གྲོས་མཐུན་བྱུང་ཡོད་འདུག

འདས་པའི་ཉིན་གྲངས་གསུམ་ཙམ་རིང་ཨ་རིའི་གྲོང་ཁྱེར་ནིའུ་ཡོག་ཏུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་སྒྲིག་འོག་འཛམ་གླིང་ཡུལ་གྲུ་ཁག་གི་དབུ་འཁྲིད་རྣམས་ལྷན་འཛོམས་ཐོག་རྒྱལ་སྤྱིའི་ནང་། བཀྲེས་སྐོམ་གྱི་དཀའ་ངལ་མེད་པ་བཟོ་ཐབས་ཀྱི་ལས་དོན་ཐོག་གྲོས་བསྡུར་ལྷུག་པོ་གནང་ཡོད་པ་དང་། ཨ་རི་དང་ཉི་ཧོང་། རྒྱ་ནག་སོགས་སྟོབས་ཆེན་རྒྱལ་ཁབ་ཚོས་མུ་མཐུད་ནས་ཉམ་ཐག་རྒྱལ་ཁབ་ཚོར་དཀའ་ངལ་སེལ་ཐབས་སུ་རོགས་རམ་བྱེད་རྒྱུའི་ཁས་ལེན་གནང་ཡོད་པ་རེད།

འོན་ཀྱང་རྒྱལ་ཁབ་ཁག་ཅིག་གིས་སྟོབས་ཆེན་རྒྱལ་ཁབ་ཚོས་དེ་སྔ་ཁས་ལེན་བྱས་པ་གཞིར་བཟུང་རོགས་རམ་སྤྲད་མེད་པ་དང་དུས་ཐོག་འདེང་ངེས་སྤྲོད་ཀྱི་མེད་ལུགས་སྐྱོན་བརྗོད་ཀྱང་བྱས་ཡོད་པ་རེད། གང་ལྟར་ལྷན་ཚོགས་སྐབས་ཨ་རིའི་སྲིད་འཛིན་མཆོག་གིས། ཨ་རིའི་ངོས་ནས་མ་འོངས་པར་རོགས་རམ་སྤྲོད་པའི་སྐབས་མང་གཙོ་ཡར་རྒྱས་གཏོང་མཁན་དང་། འཛིན་སྐྱོང་ཚགས་ཚུད་པོ་བྱེད་མཁན། ཚོང་འབྲེལ་གུ་ཡངས་བྱེད་མཁན་བཅས་ཀྱི་རྒྱལ་ཁབ་དེ་དག་གི་ཐོག་རོགས་རམ་སྤྲོད་རྒྱུའི་བསམ་བློ་ཤུགས་ཆེ་བ་གཏོང་རྒྱུ་ཡིན་ལུགས་གསུངས་ནས་གཙོ་བོ་དཔལ་འབྱོར་གྱི་རོགས་རམ་སྤྲོད་རྒྱུར་དེར་གཞིགས་པས་རྒྱལ་ཁབ་དེ་དག་ནས་ཀྱང་སོ་སོའི་རྒྱལ་ཁབ་ནང་མི་མང་ལ་མང་གཙོ་དང་རང་དབང་སྤྲོད་དགོས་པ། ལྐོག་ཟ་རུལ་སུངས་མེད་པའི་ཐོག་ནས་འཛིན་སྐྱོང་བྱེད་མཁན་ཚོར་གོ་སྐབས་བཟང་བ་སྤྲོད་རྒྱུའི་བརྡ་ལན་གསལ་པོ་སྤྲད་གནང་ཡོད་པ་རེད།