འབར་མའི་ཡུལ་གྱི་རྒྱལ་ཡོངས་འོས་བསྡུ།

༄༅༎གལ་ཏེ་འབར་མའི་དྲག་པོའི་སྲིད་གཞུང་གིས་ཕྱོགས་འགལ་ཚོགས་པའི་འགོ་ཁྲིད་དང་གྲངས་ཉུང་མི་རིགས་ཚོ་མཉམ་ཞུགས་བྱེད་དུ་བཅུག་པ་ཡིན་ན་། ཟླ་བ་རྗེས་མ་ལོ་༢༠ནང་གི་འབར་མའི་རྒྱལ་ཡོངས་འོས་བསྡུ་ཐེངས་དང་པོ་བྱ་འཆར་ཡོད་པ་དེ་གཞི་ནས་ཁྲིམས་མཐུན་ཆགས་རྒྱུ་ཡིན་སྐོར་འཛམ་གླིང་མཉམ་སྦྲེལ་རྒྱལ་ཚོགས་ཀྱི་འབར་མའི་ནང་འགྲོ་བ་མིའི་ཐོབ་ཐང་རྟོག་ཞིབ་གནང་མཁན་དམིགས་བསལ་སྐུ་ཚབ་ཐོ་མ་སི་ཨོ་ཧི་ཡ་ཁིན་ཏ་ན་ཡིས་གསུངས་བཞག།

དམིགས་བསལ་སྐུ་ཙབ་ཐོ་མ་སི་ཨོ་ཧི་ཡ་ཡིས་འབར་མའི་བཙོན་ཁང་ཁག་གི་ནང་ད་ལྟའི་སྐབས་འདིར་བཙོན་འཇུག་དོ་དམ་འོག་བཞག་པའི་སློབ་ཕྲུག་གི་འགོ་ཁྲིད།དགེ་སློང་དང་དམངས་གཙོ་དོན་གཉེར་བ། གྲངས་ཉུང་མི་རིགས་ཀྱི་འགོ་ཁྲིད་སོགས་ཁྱོན་ཆབ་སྲིད་བཙོན་པ་༢༡༠༠ཙམ་ཡོད་པ་དང༌། བཙོན་པ་དེ་རྣམས་ཕྱི་ཟླ་༡༡པའི་ཚེས་༧གོང་གློད་བཀྲོལ་གཏོང་དགོས་ཀྱི་རེད་ཅེས་གསུངས་འདུག།

གྲོང་ཁྱེར་ནིའུ་ཡོརཀ་ནང་མཉམ་སྦྲེལ་རྒྱལ་ཚོགས་ཀྱི་ཚོགས་ཆེན་མ་ཚུགས་གོང་དེ་རིང་འབར་མའི་ནང་གི་འགྲོ་བ་མིའི་ཐོབ་ཐང་ཐོག་རྟོག་ཞིབ་གནང་མཁན་རྒྱལ་ཚོགས་ཀྱི་དམིགས་བསལ་སྐུ་ཚབ་ཐོ་མ་སི་ཨོ་ཧི་ཡ་ཡིས་ཡོངས་བསྒྲགས་གནང་བའི་སྙན་ཐོའི་ནང་ བཙོན་ཁང་ཁག་ནང་ཡོད་པའི་ཆབ་སྲིད་ཀྱི་བཙོན་པ་དེ་ཚོར་ལོ་རྒྱུས་ཀྱི་དོན་སྙིང་ལྡན་པའི་རྒྱལ་ཡོངས་འོས་བསྡུའི་ནང་མཉམ་ཞུགས་བྱ་རྒྱུའི་ཁེ་དབང་ཐོབ་ཐང་ཡོད་སྟབས། རྒྱལ་ཡོངས་འོས་བསྡུ་དེ་དྲང་བདེན་དང་ཁྲིམས་མཐུན་ཞིག་ཡོང་དགོས་རྒྱུར་ཆབ་སྲིད་བཙོན་པ་ཡོངས་རྫོགས་ཆ་རྐྱེན་གང་ཡང་མ་བཏོན་པར་འཕྲལ་དུ་གློད་བཀྲོལ་གཏོང་དགོས་པའི་སྐོར་གསུངས་བཞག།

རེས་གཟའ་ཟླ་བའི་ཉིན་འབར་མའི་དྲག་པོའི་གཞུང་གིས་འོས་བསྡུའི་སྐབས་རྒྱལ་སྤྱིའི་རྟོག་ཞིབ་གནང་མཁན་དང་ཕྱི་རྒྱལ་གྱི་གསར་འགོད་པ་ཚོ་འབར་མའི་ནང་ཕེབས་ཆོག་རྒྱུ་མིན་པའི་གསལ་བསྒྲགས་བྱས་ཡོད་པ་རེད།