ཨཕ་གན་གྱི་སྲིད་འཛིན་དང་གྲོས་ཚོགས་འཐུས་མིའི་འགལ་ཟླ།

༄༅༎ཨཕ་ག་ནིསི་ཐན་གྱི་སྲིད་འཛིན་དང་གྲོས་ཚོགས་འཐུས་མིའི་དབར་འགལ་ཟླའི་གནས་ཚུལ་ཆེན་པོ་བྱུང་སྟེ་གྲོས་ཚོགས་ཚུགས་མ་ཐུབ་པའི་དཀའ་ངལ་གྱི་གནས་ཚུལ་དེ་ད་ཆ་ཞི་འགྲིག་བྱུང་བར་ ཨ་མི་རི་ཀ་དང་འཛམ་གླིང་མཉམ་འབྲེལ་རྒྱལ་ཚོགས་བཅས་ནས་དགའ་བསུ་ཞུས་གནང་འདུག།

འདས་པའི་ཉིན་གྲངས་གསུམ་རིང་ཨཕྷ་གྷནིསི་ཐན་གྱི་སྲིད་འཛིན་ཧར་མིརྡ་ཀར་ཛཡི་དང་ཡུལ་དེའི་གྲོས་ཚོགས་ཀྱི་འཐུས་མིའི་དབར་འགལ་ཟླའི་གནས་ཚུལ་ཆེན་པོ་ཞིག་བྱུང་སྟེ་ སྲིད་འཛིན་གྱི་ངོས་ནས་མང་མོས་འོས་བསྡུའི་ལམ་ནས་འདེམས་ཐོན་བྱུང་བའི་གྲོས་ཚོགས་དེར་ངོས་ལེན་མི་བྱེད་རྒྱུའི་རྣམ་འགྱུར་གསལ་པོར་བསྟན་པ་དང་ ཡང་གྲོས་ཚོགས་ཀྱི་འཐུས་མི་ཚོའི་ངོས་ནས་སྲིད་འཛིན་གྱིས་མོས་མཐུན་ཆོག་མཆན་ཡོད་མིན་ལ་མ་ལྟོས་པར་ཁྲིམས་བཟོའི་ལས་འཆར་གཏན་འབེབས་བྱ་རྒྱུ་ཡིན་སྐོར་ཤུགས་ཆེ་བརྗོད་པའི་གནས་ཚུལ་བྱུང་ཡོད་ན་ཡང་ ད་ཆ་སྲིད་འཛིན་ཀར་ཛཡིའི་ངོས་ནས་ཕྱི་ཟླ་༢ཚེས་༢༣ཉིན་གྲོས་ཚོགས་དབུ་འབྱེད་གནང་རྒྱུའི་ཁས་ལེན་གནང་ཡོད་པ་རེད།

འཛམ་གླིང་མཉམ་འབྲེལ་རྒྱལ་ཚོགས་ཀྱིས་གསལ་བསྒྲགས་ཤིག་སྤེལ་ཡོད་པ་དེའི་ནང་ཕན་ཚུན་ཞི་འགྲིག་བྱུང་བ་འདིའི་འོག་ནས་ད་ཆ་ སྲིད་འཛིན་དབུ་ཞུགས་ཀྱི་ཐོག་ནས་གྲོས་ཚོགས་འགོ་འཛུགས་ཐུབ་རྒྱུ་དང་ ཨཕ་ག་ནིསི་གྱི་མང་གཙོའི་གཞུང་འཛིན་གྱི་ཁྲིམས་བཟོའི་ལས་འཆར་གལ་ཆེ་མང་དག་ཅིག་ད་ཆ་མཇུག་སྐྱོང་བྱེད་ཐུབ་པ་ཡོང་རྒྱུ་ཡིན་པ་གསུངས་ཤིང་ ཡང་ཨ་མི་རི་ཀའི་གཞུང་གིས་འགལ་ཟླའི་གནད་དོན་ཁག་གྲོས་མོལ་གྱི་ལམ་ནས་སེལ་ཐུབ་པ་བྱུང་བ་དེས་ ཨཕ་ག་ནིསི་ཐན་གྱི་མང་གཙོའི་འཕེལ་རིམ་གྱི་ནང་ཕན་ཐོགས་ཡོད་པའི་རྩོད་པ་བྱེད་ཐུབ་པའི་ནུས་པ་ཡོད་པ་གསལ་སྟོན་བྱས་པ་ཞིག་ཡིན་པ་བརྗོད་འདུག།