རྒྱ་ནག་དང་ཐེ་ལྦན་གྱི་ཚོང་དོན་ཆིངས་ཡིག་འཇོག་རྒྱུའི་སྐོར།

༄༅༎རྒྱ་ནག་དང་ཐེ་ལྦན་དབར་ཕྱི་ཚེས་༢༩ཉིན་ཚོང་དོན་མཉམ་ལས་ཀྱི་ཆིངས་ཡིག་ལ་དངོས་སུ་ས་རྟགས་བཀོད་ཡོད་པ་དང་ ཡིན་ནའི་ཐེ་ལྦན་ནང་མི་མང་པོས་ཚོང་འབྲེལ་ཆིངས་ཡིག་དེ་རིགས་ལ་ས་རྟགས་བཀོད་ནས་ཐེ་ལྦན་གྱི་རང་དབང་ལྡན་པའི་དཔལ་འབྱོར་ཁྲོམ་རར་རྒྱ་ནག་གཞུང་གིས་སྟངས་འཛིན་བྱེད་སྲིད་པ་མ་ཟད་ ཐ་ན་ཐེ་ལྦན་གྱི་ཆབ་སྲིད་དང་བདག་དབང་གནད་དོན་ཐོག་ལ་ཡང་ཉེན་ཚབས་བཟོ་གཞི་ཞིག་ཆགས་ཀྱི་ཡོད་པར་སེམས་འཚབ་ཀྱིས་ རྒྱ་ནག་དང་ཐེ་ལྦན་དབར་ཚོང་དོན་མཉམ་ལས་ཀྱི་ཆིངས་ཡིག་ལ་ས་རྟགས་བཀོད་རྒྱུར་མི་འདོད་པའི་རྣམ་འགྱུར་བཏོན་གྱི་ཡོད་པ་གནད་དོན་དབྱེ་ཞིབ་པ་ཚོས་གསུང་གི་ཡོད་པ་རེད་

ཐེ་ལྦན་གྱི་རྩོམ་པ་པོ་ཐུང་ཁྲེན་ཡོན་གྱིས་ཐེ་ལྦན་མང་ཚོགས་ཁྲོད་ཆིངས་ཡིག་དེའི་རྒྱབ་ཕྱོགས་སུ་རྒྱ་ནག་གཞུང་གིས་ཆབ་སྲིད་ཀྱི་དམིགས་ཡུལ་འཛིན་གྱི་ཡོད་པའི་བསམ་ཚུལ་དེ་སེལ་ཐབས་ཁག་པོ་ཡིན་པ་དང་ རྒྱ་ནག་གཞུང་གིས་ཐེ་ལྦན་གྱི་དཔལ་འབྱོར་ལ་ཁེ་ཕན་ཆེན་པོ་ཡོད་པའི་ཚོང་དོན་གྱི་ཆིངས་ཡིག་དེ་རིགས་འཇོག་ཡས་དེའི་རྒྱབ་ཏུ་ཆབ་སྲིད་ཀྱི་དམིགས་ཡུལ་འཛིན་གྱི་མེད་ཅེས་སུས་བརྗོད་ཐུབ་ཀྱི་རེད་དམ་ཞེས་གསུང་ཡོད་པ་རེད་

རྒྱ་ནག་དང་ཐེ་ལྦན་དབར་སྲིད་འཛིན་མའ་དབྱིང་ཇའུ་ཡིས་ཐེ་ལྦན་གྱི་སྲིད་དབང་ཕྱི་ལོ་ཉིས་སྟོང་བརྒྱད་ལོར་འཛིན་པའི་རྗེས་ཚོང་དོན་འབྲེལ་ལམ་ཟབ་ཏུ་བཏང་ནས་ཕྱི་ལོ་ཉིས་སྟོང་ལོར་ཐེ་ལྦན་ལ་ཨ་སྒོར་ཐེར་འབུམ་༣༧དང་གྲངས་ཆུང་དྲུག་ཙམ་གྱི་རྒྱ་ནག་དང་ཚོང་འབྲེལ་ཐོག་ནས་ཁེ་སང་ཐོབ་ཡོད་པ་དང་ ད་རེས་ཕྱོགས་གཉིས་དབར་གསར་དུ་བཞག་པའི་ཚོང་དོན་མཉམ་ལས་ཀྱི་ཆིངས་ཡིག་དེ་གཞིར་བཟུང་ཐེ་ལྦན་གྱི་ཁེ་ལས་ཚོང་དོན་ཁང་གི་དངོས་ཟོག་ཁག་༥༠༠ཙམ་རྒྱ་ནག་ནང་ཕྱིར་འདྲེན་བྱེད་པའི་སྐབས་དཔྱ་ཁྲལ་ཆགས་ཡངས་ཀྱི་ཁེ་ཕན་ཐོབ་རྒྱུ་དང་  རྒྱ་ནག་གི་དངོས་ཟོག་ཁག་༣༠༠ཙམ་ལ་ཐེ་ལྦན་གྱི་དཔྱ་ཁྲལ་མི་དགོས་པའི་ཁེ་ཕན་ཐོབ་རྒྱུ་ཡིན་པ་སོགས་ཆིངས་ཡིག་གི་ནང་དོན་ལྟར་ན་རྒྱ་ནག་ལས་ཐེ་ལྦན་ལ་ཚོང་དོན་ཐོག་ཁེ་ཕན་ཆེ་བ་ཡོད་པ་རེད་