བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཡོ་རོབ་རྒྱལ་ཁབ་བརྒྱད་ཀྱི་གྲོས་ཚོགས་འཐུས་མི་དང་མཇལ་འཕྲད་ཀྱིས། བོད་དོན་ཞུ་སྐུལ་གནང་བར་དོ་སྣང་དང་ཤ་ཚའི་རྒྱབ་སྐྱོར་ཤུགས་ཆེ་ཐོབ་ཡོད་པ།

བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་སྟེ་སྤྱི་འཐུས་བཀྲ་ཤིས་དོན་འགྲུབ་ལགས་དང་། སྤྱི་འཐུས་རིག་འཛིན་ལྷུན་འགྲུབ་ལགས་རྣམ་གཉིས་ཕྱི་ཟླ་ ༩ པའི་ཚེས་ ༢༩ ནས་ཕྱི་ཟླ་ ༡༠ པའི་ཚེས་ ༤ བར་ཡོ་རོབ་ནང་ཕྱོགས་ཕེབས་ཀྱིས། ཡོ་རོབ་སྦེལ་ཇམ་རྒྱལ་ས་སྦར་སིལ་ནང་ཡོ་རོབ་སྤྱི་མཐུན་གྱི་ཁྱབ་ཁོངས་རྒྱལ་ཁབ་ ༢༧ ཡོད་པ་ལས། ཡོ་རོབ་རྒྱལ་ཁབ་བརྒྱད་ཀྱི་གྲོས་ཚོགས་འཐུས་མི་དང་གནད་ཡོད་མི་སྣ་ཚོར་མཇལ་མོལ་གནང་སྟེ། བོད་ནང་གི་ཛ་དྲག་གནས་སྟངས་དང་བཅའ་སྡོད་སློབ་གྲྭ་ཁག་གི་གནས་ཚུལ། བོད་ཀྱི་ཁོར་ཡུག་ལ་གཏོར་བཤིག་ཕོག་བཞིན་པ་སོགས་ཞུས་པ་མ་ཟད། གལ་ཆེ་ཤོས་ནི་ཉེ་ཆར་ཨ་མི་རི་ཀས་བོད་དོན་ཁྲིམས་འཆར་གཏན་འབེབས་གནང་བ་ཇི་བཞིན། ཡོ་རོབ་རྒྱལ་ཁབ་ཁག་གིས་ཀྱང་བོད་དོན་ཁྲིམས་འཆར་ཅིག་འཇོག་ཐུབ་པའི་དམིགས་བསལ་འབོད་སྐུལ་ཞུས་པར། ཁོང་ཚོས་བོད་དོན་ཐོག་ཤ་ཚ་དང་རྒྱབ་སྐྱོར་ཤུགས་ཆེ་གནང་གི་འདུག་ཅེས། བོད་མི་མང་སྤྱི་འཐུས་བཀྲ་ཤིས་དོན་འགྲུབ་ལགས་ནས་འགྲེལ་བརྗོད་གནང་གི་འདུག

གཞན་ཡང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་རྣམ་པ་གཉིས་ཡོ་རོབ་ཕྱི་སྲིད་ལས་ཁུངས་ཀྱི་གནད་ཡོད་མི་སྣ་ཁག་ཅིག་དང་ཡང་ཟུར་མཇལ་གྱིས། བོད་ནང་གི་གནས་ཚུལ་ཞིབ་ཕྲ་འགྲེལ་བརྗོད་དང་། ཁོང་རྣམ་པས་བོད་དོན་སྐོར་དགོངས་པ་བཞེས་ཕྱོགས་སོགས་བཀའ་མོལ་ལྷུག་པོ་བྱུང་བ་ཡང་འགྲེལ་བརྗོད་གནང་གི་འདུག

ད་ལན་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་དེར་བོད་དོན་ཞུ་སྐུལ་དང་འབྲེལ་བའི་ལམ་སྟོན་དོན་ཚན་༡༤ཡོད་པ་ཞིག བོད་མི་མང་སྤྱི་འཐུས་ཚོགས་གཙོ་མཆོག་ནས་གནང་བ་ཡོད་པ་ཁག་ལས་གལ་ཆེ་ཤོས་གྲས་ནི།བོད་ནང་གི་འགྲོ་བ་མིའི་ཐོབ་ཐང་གནས་སྟངས་དང་། གནམ་གཤིས་འགྱུར་ལྡོག་གིས་མཚོན་པའི་བོད་ཀྱི་ཁོར་ཡུག་ཉམས་རྒུད་དུ་འགྲོ་བཞིན་པ། གཙོ་ཆེ་ཤོས་ཨ་མི་རི་ཀས་བོད་རྒྱའི་རྩོད་རྙོག་སེལ་བའི་ཁྲིམས་འཆར་སྐོར་ཡིན་པ་ངོ་སྤྲོད་གནང་གི་འདུག

སྤྱི་འཐུས་བཀྲ་ཤིས་དོན་འགྲུབ་ལགས་དང་སྤྱི་འཐུས་རིག་འཛིན་ལྷུན་འགྲུབ་ལགས་རྣམ་གཉིས་ཟླ་ ༡༠ པའི་ཚེས་༢ ཉིན་ལི་ཐུ་ཝེ་ནི་ཡའི་ཡོ་རོབ་གྲོས་ཚོགས་འཐུས་མི་ལྕམ་ Rasa Jukneviciene ལགས་དང་། སི་པན་གྱི་ཡོ་རོབ་གྲོས་ཚོགས་འཐུས་མི་ཌེ་ན་རི་བྷ་གྷི་ནར་མཆོག་གི་ལས་བྱེད་གཙོ་བོ།ཡང་ཡོ་རོབ་གྲོས་ཚོགས་འཐུས་མི་སྐུ་ཞབས་ Petras Austrevicius སོགས་དང་མཇལ་མོལ་གནང་ཐུབ་པ་མ་ཟད། ཟླ་ ༡༠ པའི་ཚེས་ ༢ ཉིན་ཐེ་ཝན་གྱི་སྦར་སིལ་ནང་གི་གཞུང་ཚབ་ཁང་གིས་མགྲོན་འབོད་ལྟར། ཐེ་ཝན་གྱི་ལོ་བརྒྱ་དང་བཅུ་གསུམ་འཁོར་བའི་དུས་དྲན་དུ་བཅར་ཡོད་པ་རེད།

གསར་འགོད་པ། བློ་བྷེ།

རྩོམ་སྒྲིག་པ། རིག་ལྡན་སྒྲོལ་མ། བདེ་སྐྱིད་ཀུན་སྒྲོལ། 

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།