སྨོན་ལམ་བརྒྱབས་པར་བརྟེན་འཛིན་བཟུང་།

༄༅།    །བོད་ནས་གནས་ཚུལ་མཁོ་སྤྲོད་པས་གསུང་པར། ཕྱི་ཟླ་༡༡ པའི་ཚེས་༢༧ རེས་གཟའ་མིག་དམར་ཉིན་དཔལ་ལྷའི་དུས་ཆེན་ཉིན་གྱི་སྔ་ནུབ་ཀྱི་ཕྱི་དྲོའི་ཚོུད་༥།༣༠ཙམ་ལ་ལྷ་ལྡན་གཙུག་ལག་ཁང་དུ་ཆོས་མཇལ་དུ་སྐྱོད་མཁན་སྔར་རྒྱུན་ལྟར་མི་མང་པོ་མེད་ཀྱང་མི་གང་མཚམས་ཤིག་རུ་སྒྲིག་ནས་ཆོས་མཇལ་ཞུ་བར་སླེབས་ཡོད་པ་རེད། སྐབས་དེར་གཙུག་ལག་ཁང་དུ་ཆོས་མཇལ་ཞུ་མཁན་གྱི་ཁོངས་སུ་ལོ་ལྔ་བཅུ་ཙམ་ལ་སླེབས་པའི་ཁམས་པ་གཟུགས་སྟོབས་ཆེན་པོ་ཞིག་ཡོད་པ་ཁོང་གིས་ཇོ་བོ་རིན་པོ་ཆེར་ཁ་ཕྱོགས་ནས་སྐད་ཤུགས་ཆེན་པོས་སྨོན་ལམ་འདེབས་བཞིན་འདུག ཁོང་གིས་སྨོན་ལམ་འདེབས་པའི་སྐབས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་པ་དང༌། བོད་མི་རྣམས་བོད་ནང་དུ་རང་དབང་མེད་པས་དུས་དང་རྣམ་པ་ཀུན་ཏུ་སྡུག་བསྔལ་ནང་གནས་ཡོད་པར་བརྟེན་ནས། དཀོན་མཆོག་གིས་བོད་མི་རྣམས་སྡུག་བསྔལ་ལས་འདྲེན་པའི་སྨོན་ལམ་འདེབས་སོང༌། ཁོང་གིས་སྐད་ཤུགས་ཆེན་པོས་སྨོན་ལམ་དེ་ལྟར་འདེབས་པར་བརྟེན་ནས་ཆོས་མཇལ་ཞུ་བར་ཡོང་མཁན་མི་མང་པོ་ཐོས་པ་དང༌། གློ་བུར་དུ་ཆོས་མཇལ་ཞུ་མཁན་གྱི་ནང་ནས་མང་ཚོགས་དཀྱུས་མའི་ཆས་གོས་གྱོན་པའི་ཉེན་རྟོག་པ་མང་པོ་ཐོན་ཏེ། ཁོང་ས་ལ་དགྱེལ་པ་དང༌། དེ་རྗེས་འཛིན་བཟུང་བྱས་པའི་རྗེས་སུ་གནས་ཚུལ་རྩ་བ་ནས་ཐོས་རྒྱུ་མེད་པར་གྱུར་སོང༌། ད་དུང་ཤེས་རྟོགས་བྱུང་བར། ཉིན་དེར་རང་ལ་བོད་མི་གཞན་ཁག་ཅིག་ཀྱང་འཛིན་བཟུང་བྱས་ཡོད་པའི་གནས་ཚུལ་གོ་ཐོས་བྱུང་ཞེས་ངོ་སྤྲོད་གནང་ཡོད་པ་རེད། །