དགེ་རྒན་ཚོས་གཞུང་ལ་ཞུ་འབོད་ངོ་རྒོལ་བྱས་འདུག

དེ་ཡང་ཕྱི་ཟླ་༤པའི་ཚེས་༣༠ཉིན་མཚོ་སྔོན་ཞིང་ཆེན་རྨ་ལྷོ་ཁུལ་རེབ་གོང་རྫོང་གི་ལས་ཚབ་དགེ་རྒན་༡༦༠ལྷག་སྲིད་གཞུང་ལས་ཁུངས་མདུན་དུ་འདུ་འཛོམས་ཀྱིས་ས་གནས་དང་། མཚོ་སྔོན་ཞིང་ཆེན་སྒྲིག་ཁྲིམས་ཞིབ་བཤེར་ལས་ཁུངས་སོགས་སུ་གཞུང་གིས་ལས་བྱེད་ངོ་མ་མ་ཡིན་པའི་ལས་ཚབ་དགེ་རྒན་དང་། ལས་བྱེད་པའི་བདེ་སྡུག་ལ་གཟིགས་རྟོགས་གནང་དགོས་པ། གླ་ཕོགས་སྤར་ནས་ཐོབ་ཐང་ཁག་སྤྱི་མཚུངས་སྤྲོད་དགོས་པ་སོགས་ཀྱི་དགོས་འདུན་ཞུ་གཏུགས་ལས་འགུལ་གནང་བཞིན་ཡོད་པ་རེད། འདི་ག་རླུང་འཕྲིན་ཁང་ལ་ས་གནས་ནས་བོད་མི་ཞིག་གིས་བརྗོད་དོན། ཞུ་གཏུགས་ཀྱི་ལས་འགུལ་སྐབས་རེབ་གོང་རྗོང་དང་། གཞི་རིམ་སློབ་གྲྭ་ཁག་གི་ལས་ཚབ་དགེ་རྒན་དང་། གཞན་ལས་བྱེད་པ་བཅས་མི་གྲངས་༡༦༠ཙམ་འདུ་འཛོམས་ཡོད་པ་རྣམས་ནི། སློབ་ཆེན་གྱི་ལག་འཁྱེར་ཡོད་ཅིང་། གཞུང་ཞབས་ལ་ཞུགས་རྒྱུའི་ཆ རྐྱེན་ཡོད་མཁན་ཡིན་པ་དང་།  མང་ཆེ་བ་བོད་མི་ཡིན་འདུག  ཡང་གནས་ཚུལ་ནང་གསལ་བར་གཞིགས་ན་། ཞུ་གཏུགས་གནང་མཁན་རེབ་གོང་ས་ཁུལ་གྱི་ལས་ཚབ་དགེ་རྒན་དང་ལས་བྱེད་པ་རྣམས་ནས་འདས་པའི་ལོ་ངོ་བཅུ་ཕྲག་ཙམ་གྱི་རིང་ཟླ་རེར་གླ་ཕོགས་རྒྱ་སྒོར་༥༠༠ནས་༡༠༠༠ཙམ་ལས་མེད་པར་ཕྱག་ལས་གནང་པའི་རིང་རིམ་བཞིན་ལས་བྱེད་ངོ་མར་འགྱུར་རྒྱུའི་རེ་བ་བྱས་ཀྱང་། ཁོང་རྣམས་ཀྱི་གླ་ཕོགས་སྤར་རྒྱུའི་ཚབ་ལ་ད་དུང་ཐོབ་ཐང་གཞན་ཁག་ཀྱང་སྤྲོད་ཀྱི་མེད་པར་བརྟེན་ད་ཐེངས་ཀྱི་ཞུ་གཏུགས་ལས་འགུལ་འདི་སྤེལ་བ་ཞིག་ཡིན་འདུག  མཚོ་སྔོན་ཞིང་ཆེན་གྱི་ས་ཁུལ་མང་པོ་ཞིག་ཏུ་དགེ་རྒན་ཙམ་མ་ཡིན་པར་རྫོང་དང་། ཤང་རིམ་པའི་ལས་ཁུངས་ཁག་ནང་སློབ་གྲྭ་ཆེན་མོ་ནས་སློབ་ཐོན་ཟིན་པའི་སློབ་མ་ཚོར་ལས་ཚབ་བམ་འཕྲལ་སེལ་ལས་བྱེད་ལྟ་བུའི་གནས་སྟངས་འོག་ཟླ་རེར་གླ་ཕོགས་དམའ་པོ་སྤྲད་པ་མ་གཏོགས་ གཞན་ཁང་རིན་དང་སྨན་དོད་ལ་སོགས་པའི་ཐོབ་ཐང་གང་ཡང་མེད་པ་མ་ཟད། ལས་ཁུངས་ཁ་ཤས་ཀྱིས་གཡོག་པོ་ནང་བཞིན་བཀོལ་སྤྱོད་བྱས་ཏེ་དཀའ་ངལ་དུ་མ་འཕྲད་བཞིན་ཡོད་པའི་གནས་ཚུལ་འདུག

འོན་ཀྱང་རྒྱ་ནག་གི་སྤྱི་ཚོགས་ཚན་རིག་ཁང་གིས་ལོ་སྔོན་མར་བཏོན་པའི་མི་ཤུགས་ཐོན་ཁུངས་ཀྱི་རྒྱབ་ཤ་སྔོན་པོའི་དེབ་ནང་། ཉེ་བའི་ལོ་ཤས་རིང་ས་གནས་ཁག་གི་སྲིད་གཞུང་སྡེ་ཁག་ནས་ཀྱང་མ་མཐའི་གླ་ཕོག་ཚད་གཞི་ཐེངས་མང་མཐོ་རུ་བཏང་ཡོད་པ་རེད། སྤྱི་ལོ༢༠༡༣ལོའི་ཟླ༧པའི་བར། རྒྱལ་ཡོངས་སུ་ཞིང་ཆེན་དང་རང་སྐྱོང་ལྗོངས། གྲོང་ཁྱེར་བཅས༡༨ཀྱིས་སྔ་རྗེས་སུ་མ་མཐའི་གླ་ཕོག་ཚད་གཞི་མཐོ་རུ་བཏང་ཡོད་པ་དང་ཧྲང་ཧེའི་ཡི་ཟླ་རེའི་མ་མཐའི་གླ་ཕོག་གི་ཚད་གཞི་སྒོར༡༦༢༠ཟིན་ནས་རྒྱལ་ཡོངས་ཀྱི་ཨང་དང་པོ་ཡིན་པ་སོགས་འཁོད་འདུག

གསར་འགོད་པ་ལྕགས་མོ་འཚོ་དང་དོན་གྲུབ་རྣམ་རྒྱལ།