མདོ་སྨད་མཚོ་ནུབ་ཁུལ་དུ་སློབ་ཕྲུག་ཚོས་རྒྱ་གཞུང་ལ་ངོ་རྒོལ།

༄༅༎ཕྱི་ཟླ་༡༠པའི་ཚེས་༢༥རེས་གཟའ་ཟླ་བའི་ཉིན་བོད་མདོ་སྨད་མཚོ་ནུབ་ཁུལ་ཐེམ་ཆེན་རྗོང་བོད་ཡིག་སློབ་འབྲིང་གི་སློབ་མ་བརྒྱ་ཕྲག་གིས་རྗོང་སྲིད་གཞུང་གི་མདུན་དུ་བོད་ཀྱི་སྐད་ཡིག་སྲུང་སྐྱོབ་དགོས་པའི་དགོས་འདུན་བཏོན་པའི་ལས་འགུལ་སྤེལ་ཡོད་པ་རེད།

འདི་གར་བོད་ནས་གནས་ཚུལ་ཁུངས་ལྡན་འབྱོར་བའི་ནང་དུ། རྒྱ་ནག་གཞུང་གིས་གཏན་འབེབས་བྱས་པའི་བོད་ཡིག་སློབ་གསོ་བསྒྱུར་བཅོས་ཀྱི་སྲིད་ཇུས་གསར་པ་དེར་སློབ་མ་ཚོས་བློ་འཚབ་བྱེད་ཡུལ་ཞིག་ཏུ་གྱུར་ཏེ། ཕྱི་ཟླ་བཅུ་པའི་ཚེས་༡༩ཉིན་བོད་ཀྱི་མདོ་སྨད་རེབ་ཀོང་ཁུལ་གྱི་བོད་རིགས་སློབ་མ་ཚོས་བོད་ཀྱི་སྐད་ཡིག་སྲུང་སྐྱོབ་དགོས་པའི་རྔམ་སྟོན་སྐད་འབོད་ཀྱི་ལས་འགུལ་འགོ་བཙུགས་པ་དང། དེ་རྗེས་གོ་ལོག་དང་ཆབ་ཆ་སོགས་ཀྱི་སློབ་མ་ཚོས་ཀྱང་རྒྱབ་སྐྱོར་གྱི་ལས་འགུལ་སྤེལ་བ་བཞིན། ཕྱི་ཚེས་༢༥ཉིན་གྱི་ཕྱེད་ཡོལ་ཚོུད་༢པའི་ཐོག་མཚོ་སྔོན་ཞིང་ཆེན་མཚོ་ནུབ་ཁུལ་ཐེམ་ཆེན་རྫོང་མི་རིགས་སློབ་འབྲིང་གི་སློབ་མ་༣༠༠ལྷག་གིས་བོད་ཀྱི་སློབ་གསོ་བསྒྱུར་བཅོས་ཀྱི་སྲིད་ཇུས་ལ་མི་དགའ་བའི་རྣམ་འགྱུར་བཏོན་པའི་སྐད་འབོད་བྱས་པ་དང། ཁོང་ཚོས་སྐད་ཡིག་གཅེས་སྐྱོང༌། མི་རིགས་འདྲ་མཉམ་ཞེས་པའི་འབོད་ཚིག་སྒྲོག་བཞིན་ཐེམ་ཆེན་རྫོང་བོད་ཡིག་སློབ་འབྲིང་ནས་རྫོང་སྲིད་གཞུང་བར་གོམ་བགྲོད་བྱས་ཡོད་པ་རེད། དེ་རྗེས་ཁོང་ཚོས་རྫོང་སྲིད་གཞུང་མདུན་དུ་མུ་མཐུད་ནས་ཚོུད་ཕྱེད་ཀ་ཙམ་སྐད་འབོད་བྱས་ཡོད་ཀྱང་རྫོང་གི་ཉེན་རྟོག་པ་ཡོང་སྟེ་སློབ་མ་རྣམས་ཕྱིར་སློབ་གྲར་ཁྲིད་ཡོད་པ་ལས་ཉེས་རྡུང་བཏང་བ་དང་འཛིན་བཟུང་བྱས་པའི་གནས་ཚུལ་གང་ཡང་བྱུང་མེད་ཅིང༌། ཡིན་ནའང་ད་ལྟ་སློབ་མ་རྣམས་རྫོང་བོད་ཡིག་སློབ་འབྲིང་ནས་ཕྱི་ལ་རང་དབང་གི་འགྲོ་བསྐྱོད་བྱེད་མ་བཅུག་པར་དམ་བསྒྲགས་བྱེད་མུས་མ་ཟད། གསང་སྤྱོད་དུ་བསྐྱོད་པའི་སྐབས་ལའང་ཉེན་རྟོག་པའི་ལྟ་རྟོགས་བྱེད་ཀྱི་ཡོད་པ་རེད། ད་རེས་བོད་ཀྱི་མདོ་སྨད་ཐེམ་ཆེན་རྫོང་བོད་རིགས་སློབ་མ་ཚོས་བོད་ཀྱི་སྐད་ཡིག་སྲུང་སྐྱོབ་ཀྱི་དགོས་འདུན་བཏོན་པའི་ལས་འགུལ་སྤེལ་དགོས་པའི་དོན་རྐྱེན་གཙོ་བོ་དེ་ཡང༌། ཕྱི་ཚེས་༢༥ ཉིན་རྫོང་སྲིད་གཞུང་གིས། ཕྱི་ལོ་༢༠༡༠ ནས་༢༠༢༠ ལོའི་དུས་ཡུན་རིང་གི་མཚོ་སྔོན་ཞིང་ཆེན་གྱི་སློབ་གསོ་བཅོས་བསྒྱུར་དང་འཕེལ་རྒྱས་ཀྱི་ལས་དོན་འཆར་གཞིའི་གཙོ་གནད་ཅེས་པའི་ཡིག་ཆ་དེ་ལག་བསྟར་བྱ་དགོས་པའི་གསལ་བསྒྲགས་བྱས་པར་བརྟེན་ནས་སློབ་མ་ཚོས་སློབ་གསོའི་སྲིད་ཇུས་གསར་པ་དེར་འདོད་པ་མེད་པའི་རྣམ་འགྱུར་བཏོན་པ་ཞིག་ཡིན་པ་རེད།།