བོད་མི་མང་སྤྱི་འཐུས་ཁག་གཅིག་གིས་ཨ་རིའི་ནང་གཞུང་འབྲེལ་གཟིགས་སྐོར།

བོད་མི་མང་སྤྱི་འཐུས་སྐུ་ཚབ་ཁག་ཅིག་ཨ་རིའི་ནང་ཕྱོགས་ཕེབས་ཀྱིས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་(Jim Mcgovern)དང་མཇལ་འཕྲད་གནང་འདུག
དེ་ཡང་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་པ་ལྟར་ན། ཨ་རིའི་སྐུ་ཚབ་དོན་གཅོད་ལས་ཁང་གི་གོ་སྒྲིག་འོག བོད་མི་མང་སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་ལགས་དང་། སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས། སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས། སྤྱི་འཐུས་ཚེ་རིང་ལྷ་མོ་ལགས་བཅས་ཀྱིས་ཕྱི་ཟླ་དྲུག་པའི་ཚེས་༡༨ཉིན་གྱི་སྔ་དྲོར་ཨ་རིའི་རྒྱལ་སར་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་(Jim Mcgovern)མཆོག་མཇལ་འཕྲད་གནང་བ་དང་འབྲེལ་གྲོས་ཚོགས་སུ་གཟིགས་སྐོར་གནང་ཡོད་ཅིང་། དེའི་ཉིན་རྒྱབ་ཏུ་སྤྱི་འཐུས་རྣམ་པ་ཚོས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་(Sensenbrener)མཆོག་གི་ལས་བྱེད་གཙོ་བོ་(Matt Bisenius)སོགས་དང་མཇལ་འཕྲད་ཀྱིས་སྤྱི་འཐུས་རྣམ་པ་ཚོས་གཙོ་བོ་ཨ་རི་གཞུང་དམངས་ཀྱིས་བོད་ཀྱི་གནད་དོན་ཐོག་ད་བར་རྒྱབ་སྐྱོར་གནང་བར་ཐུགས་རྗེ་ཆེ་ཞེས་ཞུས་གནང་བ་དང་ཆབས་ཅིག་བོད་ནང་གི་ད་ལྟའི་ཛ་དྲག་གི་གནས་སྟངས་སོགས་ཀྱི་ཐད་གོ་བསྡུར་སྦྱངས་བཤད་ཞུས་ནས། དམིགས་བསལ་དེང་སྐབས་རྒྱ་ནག་གཞུང་གིས་བོད་ནང་གི་ཆོས་དད་རང་དབང་ལ་དེ་བས་དམ་དྲག་བཀག་སྡོམ་བྱེད་བཞིན་པའི་གནས་སྟངས་ཧ་ཅང་ཛ་དྲག་པོ་ཡོད་པའི་ཐོག་བོད་རིགས་སློབ་ཕྲུག་ཚོར་བོད་ཡིག་སློབ་སྦྱོང་བྱ་རྒྱུར་དམ་དྲག་བྱེད་བཞིན་པའི་ཁར། བོད་མིའི་སྲོལ་རྒྱུན་གྱི་འབྲོག་པའི་འཚོ་གནས་ལམ་སྲོལ་རྩ་མེད་བཟོ་ཐབས་བྱེད་བཞིན་པ་སོགས་རྒྱ་ནག་གཞུང་གིས་བོད་ནང་བོད་མིའི་ཆོས་དང་རིག་གཞུང་རྩ་མེད་བཟོ་ཐབས་ཀྱི་ཛ་དྲག་གནས་སྟངས་ཐད་ཨ་རིའི་གཞུང་དང་གྲོས་ཚོགས་ནས་ཐུགས་ཁུར་ཆེ་བཞེས་གནང་རྒྱུའི་སྐུལ་མ་གནང་ཡོད་པའི་ཁར། མ་འོངས་ཡང་ཨ་རིའི་གྲོས་ཚོགས་ནས་བོད་དོན་ཐོག་མུ་མཐུད་རྒྱབ་སྐྱོར་ཡོང་ཐབས་འབོད་སྐུལ་གནང་ཡོད་པ་རེད།
ཉིན་དེའི་ཕྱི་དྲོ་སྤྱི་འཐུས་རྣམ་པ་ཨ་རིའི་དམངས་གཙོ་ལྟེ་གནས་ཁང་གི་ས་གནས་འགན་འཛིན་གཞོན་པ་ལྕམ་(Sneha Moktan)དང་ཨེ་ཤི་ཡའི་ལས་འཆར་འགན་འཛིན་ལྕམ་(Raissa Hazell)སོགས་དང་མཇལ་འཕྲད་ཀྱིས་བཙན་བྱོལ་བོད་མིའི་དམངས་གཙོའི་འཕེལ་རིམ་སྐོར་ལ་དྲི་བ་དྲིས་ལན་གནང་ཡོད་པ་དང་། དེ་རྗེས་རྒྱལ་སྤྱིའི་བོད་དོན་ལས་འགུལ་ཁང་དུ་གཟིགས་སྐོར་དང་བོད་དོན་ལས་འགུལ་སྤེལ་ཕྱོགས་སྐོར་བསམ་ཚུལ་བརྗེ་རེས་གནང་ཡོད་པ་རེད།