བོད་སྨན་གྱི་ནུས་པ།

༄༅༎ནུབ་ཕྱོགས་པའི་ཚན་རིག་པ་དང་ཞིབ་འཇུག་པས་ད་བར་ཤ་རྒྱགས་པའི་དཀའ་ངལ་སེལ་ཐབས་ལ་ལོ་མང་འཐབ་རྩོད་དང་ཞིབ་འཇུག་བྱས་པའི་རྗེས་ནུབ་ཕྱོགས་པའི་སྨན་དང་ཟས་སྤྱོད་ཀྱི་ཕན་ནུས་མ་ཐོན་པར་བརྟེན་ནས། ཁོང་ཚོས་ཤ་རྒྱགས་དྲག་པའི་དཀའ་ངལ་དེ་ནི་སྙིང་གི་ན་ཚས་རྐྱེན་བྱས་ཏེ་སྙིང་རྩ་འགག་སྟེ་ནད་པའི་ཚེ་སྲོག་ལ་གནོད་འཚེ་བཟོ་བའི་དཀའ་ངལ་དེ་སེལ་ཐབས་ལ་གནའ་བོའི་སྨན་བཅོས་ཀྱི་གཞུང་ལུགས་གཞན་ཞིག་འཚོལ་རྒྱུར་དུས་ཡུན་རིང་པོར་དཀའ་ལས་རྒྱབ་པའི་མཐར། ཉེ་ཆར་ཁོང་ཚོར་བོད་ཀྱི་གསོ་བ་རིག་པའི་གཞུང་ལུགས་ནང་གི་ཟས་དང་སྤྱོད་ལམ་དེ་ནི་ཤ་རྒྱགས་པ་སྐམ་དུ་གཏོང་བའི་སྨན་བཅོས་ལེགས་ཤོས་ཤིག་ཡིན་པ་ཤེས་རྟོགས་བྱུང་ཡོད་པ་རེད།
ནུབ་ཕྱོགས་པའི་ཚན་རིག་པས་བོད་ཀྱི་གསོ་བ་རིག་པའི་གཞུང་ལུགས་ནང་དུ་གསུང་པའི་ཟས་དང་སྤྱོད་ལམ་གྱིས་ཤ་སྐམ་དུ་གཏོང་བའི་ཐོག་ལ་ཞིབ་འཇུག་བྱས་པ་དེ་ནི་ཧ་ལམ་ཐེངས་དང་པོ་ཡིན་ཞིང། ལྷག་དོན་མི་ཧ་ཅང་གི་ཤ་རྒྱགས་དྲག་པར་བོད་ཀྱི་གསོ་རིག་གཞུང་ལུགས་ནང་གསུངས་པའི་ཟས་དང་སྤྱོད་ལམ་གཉིས་ལམ་སྟོན་བྱས་ཏེ་ཕན་ནུས་ནི་ནུབ་ཕྱོགས་པའི་ཟས་དང་སྤྱོད་ལམ་གྱི་ལམ་སྟོན་གནང་བ་ལས་ཧ་ཅང་གི་མངོན་གསལ་དོད་པོའི་ནུས་པ་ཐོན་ཏེ་ལུས་ཀྱི་ལྗིད་ཚད་ཆགས་པ་མ་ཟད། ལྷག་དོན་སྙིང་གི་ན་ཚ་ཡོད་མཁན་ཁྲོད་ལ་ཕན་ནུས་ཆེན་པོ་ཐོན་ཡོད་པ་རེད། ཞིབ་འཇུག་གི་ལས་དོན་དེའི་ནང་ནུབ་ཕྱོགས་པའི་སྨན་པ་བཞི་དང་བཞུགས་སྒར་རྡ་རམ་ས་ལའི་བོད་གཞུང་སྨན་རྩིས་ཁང་ནས་སློབ་ཐེངས་ལྔ་པའི་གྲས་སུ་ཐོན་གནང་བའི་སྨན་པ་ཁྱུ་གསར་རྣམ་རྒྱལ་ལགས་ཟུང་འབྲེལ་གྱིས་གནང་བ་ཞིག་ཡིན་ཞིང། ཁོང་ཚོས་ཞིབ་འཇུག་གི་ལས་དོན་དེ་༢༠༠༨ ནས་༢༠༡༠ བར་ལོ་ངོ་གསུམ་རིང་ལ་ཤ་རྒྱགས་དྲག་པའི་ནད་པ་ཁྱོན་༥༢༤ ལ་ཞིབ་འཇུག་གནང་སྟེ་ཁག་ཅིག་ལ་ནུབ་ཕྱོགས་པའི་ཚན་རིག་ནས་གསུངས་པའི་ཟས་དང་སྤྱོད་ལམ་གྱི་ལམ་སྟོན་གནང་བ་དང་ཁག་ཅིག་ལ་བོད་ལུགས་གསོ་རིག་ནས་གསུང་པའི་ཟས་དང་སྤྱོད་ལམ་གཉིས་ལམ་སྟོན་གནང་སྟེ་ཕན་ནུས་ཆེ་ཆུང་ཐོན་མིན་ཞིབ་འཇུག་བྱས་པའི་ཁྲོད་བོད་ཀྱི་གསོ་རིག་གཞུང་ལུགས་ནས་གསུངས་པའི་ཟས་དང་སྤྱོད་ལམ་གྱི་ལམ་སྟོན་བྱེད་ཡུལ་གྱི་ནད་པ་ཚོར་དམིགས་བསལ་གྱི་ཤ་སྐམ་དུ་འགྲོ་བར་ནུས་པ་ཐོན་པར་བརྟེན་ནས། ཉེ་ཆར་གནས་ཚུལ་དེའི་སྐོར་རྒྱལ་སྤྱིའི་སྨན་གྱི་དུས་དེབ་ཅིག་གི་ཐོག་བཀོད་སྤེལ་བྱས་ཡོད་པ་རེད།།