ཕྱི་སྡོད་བོད་ཕྲུག་ལ་མི་རིགས་སྐད་ཡིག་སློབ་གཞི་རྩོམ་སྒྲིག

༄༅༎བཙན་བྱོལ་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་ཕྱི་སྡོད་བོད་མིའི་བུ་ཕྲུག་ཚོར་རང་མི་རིགས་ཀྱི་སྐད་ཡིག་རིག་གཞུང་བརྒྱུད་སྤྲོད་གནང་རྒྱུའི་དམིགས་ཡུལ་གཙོ་བཟུང་ཐོག་ནས་ སྐད་ཡིག་གཉིས་པའི་ལམ་ནས་བོད་ཡིག་སློབ་འཁྲིད་ཀྱི་བསླབ་གཞིའི་སློབ་དེབ་རྩོམ་སྒྲིག་གནང་རྒྱུའི་ལས་འཆར་གསལ་བསྒྲགས་གནང་འདུག།

གོང་ཞུས་གསལ་བསྒྲགས་དེའི་ནང༌། བོད་མི་རྣམས་བཙན་བྱོལ་དུ་ལོ་ངོ་༥༠ལྷག་གནས་པའི་བརྒྱུད་རིམ་ཁྲོད་སྤྱི་ཚོགས་ཁོར་ཡུག་དང་མི་རབས་བརྗེ་འགྱུར་ལ་བརྟེན་ནས་སྐད་དང་རིག་གཞུང་ཉམ་རྒུད་ཇི་ཆེར་འགྲོ་བཞིན་ཡོད་ཅིང༌། ལྷག་པར་དུ་ཉེ་བའི་ལོ་ངོ་བཅུ་ཕྲག་ཅིག་ལྷག་ཙམ་རིང་བོད་མི་མང་པོ་ནུབ་ཕྱོགས་ཡུལ་གྲུ་ཁག་ཏུ་གནས་སྤོས་ཀྱི་གྲངས་འབོར་ལྡབ་འཕར་བྱུང་བ་དང་འབྲེལ། ཕྱི་སྡོད་བོད་མིའི་བུ་ཕྲུག་ཚོར་མི་རིགས་སྐད་ཡིག་རིག་གཞུང་གི་གཅེས་ནོར་བརྒྱུད་སྤྲོད་གནང་རྒྱུ་གལ་འགངས་ཤིན་ཏུ་ཆེན་པོ་ཡོད་སྐོར་བཀོད་གནང་འདུག།

ཤེས་རིག་ལས་ཁུངས་ནས་ད་བར་ས་གནས་མང་པོ་ཞིག་ཏུ་བོད་མི་ཚོགས་སྒེར་ཚང་མས་རིགས་ཞེན་ལྷག་བསམ་གྱིས་དང་དུ་བླངས་ནས་སློབ་གྲྭ་དང་འཛིན་གྲྭ་ཟུར་འཛུགས་སོགས་ཀྱི་ཐབས་ལམ་སྣ་ཚོགས་བརྩམས་དང་རྩོམ་བཞིན་ཡོད་པར་བསྔགས་བརྗོད་ཡི་རང་དང་ཆབས་ཅིག། ཤེས་རིག་ལས་ཁུངས་ནས་གོང་གསལ་གནས་སྟངས་ལ་ཆེད་དུ་དམིགས་ཏེ་སྐད་ཡིག་གཉིས་པའི་ལམ་ནས་བོད་ཡིག་སློབ་ཁྲིད་ཀྱི་བསླབ་གཞིའམ་སློབ་དེབ་རྩོམ་སྒྲིག་བྱ་རྒྱུའི་ཐག་གཅོད་དང་འབྲེལ་ད་ལོ་ནས་བཟུང་ལས་གཞི་དངོས་སུ་དབུ་འཛུགས་གནང་ཡོད་པ་དང༌། ལས་གཞི་དེ་དག་བཙན་བྱོལ་བོད་མིའི་ཤེས་ཡོན་ལྷན་ཚོགས་ཀྱི་སྤྱི་ཁྱབ་ཡིག་ཚང་ནས་ལག་བསྟར་གནང་རྒྱུ་ཡིན་སྐོར་གསུངས་བཞག།