རྒྱལ་སྤྱིའི་གསར་ལམ་ཁག་གིས་བོད་མིའི་འོས་བསྡུའི་ཐད་དོ་སྣང་།

བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྤྱི་འཐུས་འོས་བསྡུའི་ཐད་རྒྱལ་སྤྱིའི་གསར་ལམ་ཁག་གིས་དོ་སྣང་ཆེན་པོས་གནས་ཚུལ་འགོད་སྤེལ་གནང་བ།
དེ་ཡང་སྤྱི་ལོ་༢༠༡༥ལོའི་ཟླ་༡༠བའི་ཚེས་༡༨ཉིན། བོད་མིའི་སྒྲིག་འཛུགས་ཡོད་ས་རྒྱ་གར་རྡ་རམ་སཱ་ལ་གཙོས་རྒྱ་བལ་འབྲུག་གསུམ་དང་། བོད་ཕྱི་ཕྱོགས་ཀྱི་བོད་མི་འདུས་སྡོད་བྱེད་སའི་ཕྱི་རྒྱལ་གྱི་ཡུལ་གྲུ་ཁག་གང་སར་བོད་མི་ཚོས་སྐབས་བཅོ་ལྔ་པའི་བཀའ་ཤག་གི་སྲིད་སྐྱོང་དང་། སྐབས་བཅུ་དྲུག་པའི་སྤྱི་འཐུས་ཀྱི་སྔོན་འགྲོའི་འོས་བསྡུ་གནང་ནས། བོད་མི་ཚོས་དམངས་གཙོའི་ཁེ་དབང་ལོངས་སུ་སྤྱོད་པར་འོས་བསྡུའི་ཆ་ཤས་བླངས་ཡོད་པ་རེད།
བོད་མིའི་འོས་བསྡུའི་སྐོར་ཇར་མན་གྱི་ཚགས་ཤོག་ཐོག་བཙན་བྱོལ་བོད་མིས་རང་གི་འགོ་ཁྲིད་འོས་འདེམས་བྱེད་པ་ཞེས་པའི་གསར་འགྱུར་གཏོང་སྤེལ་གནང་བ་དང་། ཧྥ་རན་སིའི་གསར་ཤོག་ཐོག་བཙན་བྱོལ་བོད་མིས་དེ་རིང་བཙན་བྱོལ་གཞུང་གི་སྲིད་སྐྱོང་དང་། གྲོས་ཚོགས་ཀྱི་འཐུས་མི་འོས་འདེམས་བྱེད་བཞིན་པ་ཞེས་པའི་གསར་འགྱུར་གཏོང་སྤེལ་གནང་འདུག
དེ་བཞིན་ཏུའུ་ཝེ་ཞེས་པའི་རྒྱ་ཡིག་དྲ་གནས་སུ་ཐེངས་འདིའི་འོས་མིའི་ནང་ལྟ་བ་མི་འདྲ་བ་སོགས་ཡོད་ལུགས་ཀྱི་དཔྱད་བརྗོད་བྱས་པ་སོགས་འཛམ་གླིང་གི་ཚགས་ཤོག་དང་། དྲ་གནས་ཁག་ཏུ་ཐེངས་འདིའི་བཙན་བྱོལ་བོད་མིའི་སྲིད་སྐྱོང་དང་། སྤྱི་འཐུས་འོས་མིའི་སྔོན་འགྲོའི་འོས་བསྡུ་ཆེན་མོའི་ཐད་དོ་སྣང་ཆེན་པོའི་སྒོ་ནས་བརྒྱུད་སྤེལ་བྱས་འདུག

གསར་འགོད་པ་འཇམ་དཔལ་ཕུན་ཚོགས།