མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚོགས་ཆེན་ཐེངས་༢༧སྟེང་བོད་ཀྱི་ཁྱིམ་མཚེས་རྒྱབ་ཁབ་ཁག་ནས་སྐུ་ཚབ་ཉུང་བ་ཡོད་པ་བོད་པའི་སྐུ་ཚབ་ཀྱིས་གསུངས་བྱུང་།

ཕྱི་ལོ་༢༠༢༢ལོའི་སྤྱི་ཟླ་༡༡ཚེས་༦རེས་གཟའ་ཉི་མའི་ཉིན་ཨེ་ཇིབ་གྲོང་ཁྱེར་Sharm EI-Sheikདུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ཚོགས་ཆེན་ཐེངས ༢༧ (Cop27) དེ་དངོས་སུ་འགོ་འཛུགས་གནང་ཞིང་། བོད་མིའི་སྐུ་ཚབ་འབུམ་རམས་པ་བློ་བཟང་དབྱངས་མཚོ་ལགས་ཀྱིས་གོང་ཞུས་ཚོགས་ཆེན་ཚོགས་ཡུལ་ནས་དྲ་ལམ་བརྒྱུད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་དོན། ཐེངས་འདིའི་ཚོགས་ཆེན་ཐོག་རྒྱལ་ཁྱབ་ཕྱི་ནང་ནས་གཞུང་དང་གཞུང་འབྲེལ་མིན་པའི་སྐུ་ཚབ་ཚོ་ཚུད་པའི་ཚོགས་བཅར་བ་ཁྲི་གཅིག་མ་ཟིན་ཙམ་ཕེབས་འདུག་ཀྱང་། རྒྱ་གར་དང་འབྲུག་ཚུད་པའི་བོད་ཀྱི་ཁྱིམ་མཚེས་རྒྱབ་ཁབ་ཁག་ནས་སྐུ་ཚབ་ཧ་ཅང་གི་ཉུང་ངུ་ཞིག་ཕེབས་འདུག་ཅེས་འགྲེལ་བརྗོད་གནང་བྱུང་།

ཐེངས་འདིའི་ཚོགས་ཆེན་ཐོག་བོད་མིའི་སྐུ་ཚབ་ངོས་ནས་བོད་མཐོ་སྒང་གི་ཁོར་ཡུག་གི་གལ་གནད་དང་དེས་འཛམ་གླིང་ལ་ཤུགས་རྐྱེན་སྐོར་། བོད་ནང་གི་གནམ་གཤིས་འགྱུར་ལྡོག་ཐད་དེང་གི་ཚན་རིག་པ་ལྷན་དུ་གོ་བསྡུར་གྱིས་ཉམས་ཞིབ་གནང་དགོས་པ། དེ་བཞིན་རྒྱ་ནག་གཞུང་གིས་བོད་ནང་ཁོར་ཡུག་དང་འབྲེལ་བའི་སྲིད་བྱུས་ཇི་འདྲ་ལག་བསྟར་བྱ་འཆར་ཡོད་ནའང་། ས་གནས་བོད་མིའི་ལྷན་དུ་གོ་བསྡུར་གནང་དགོས་པ་སོགས་ཀྱི་ཞུ་གཏུགས་ལས་འགུལ་སྤེལ་རྒྱུ་ཡིན་པ་བློ་བཟང་དབྱངས་མཚོ་ལགས་ཀྱིས་འགྲེལ་བརྗོད་གནང་བྱུང་།

གཞན་ཡང་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ཚོགས་ཆེན་ཐེངས ༢༧ པའི་སྟེང་བོད་མིའི་སྐུ་ཚབས་ལྔ་སྟེ། བོད་མིའི་སྒྲིག་འཛུགས་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་སྡེ་ཚན་གྱི་ཉམས་ཞིབ་པ་དོན་འགྲུབ་དབང་མོ་ལགས་དང་། རྒྱལ་སྤྱིའི་བོད་དོན་འབྲེལ་མཐུད་ཁང་གི་ཁོར་ཡུག་ཉམས་ཞིབ་པ་འབུམ་རམས་པ་བློ་བཟང་དབྱངས་མཚོ་ལགས། བོད་རང་བཙན་སློབ་ཕྲུག་ཚོགས་པའི་ལས་འགུལ་འགན་འཛིན་པདྨ་སྒྲོལ་མ་ལགས་དང་ལས་འགུལ་བ་མཁྱེན་འཛོམས་ཨེ་ལིངྣ་ལགས། དེ་བཞིན་བོད་གནས་ལྟ་ཞིབ་ཁང་གི་ཉམས་ཞིབ་པ་བསྟན་འཛིན་ཆོས་སྐྱིད་ལགས་བཅས་མཉམ་བཞུགས་གནང་ཡོད་པ་རེད།

གསར་འགོད་པ། བློ་བཟང་དགེ་ལེགས།  
རྩོམ་སྒྲིག་པ། ཡེ་ཤེས་ཟླ་བ།
དྲ་ཐོག་སྤེལ་མཁན། ཡེ་ཤེས་ཟླ་བ།