ཨ་རུ་ནཱ་ཅལ་མངའ་སྡེའི་བློན་ཆེན་མཆོག་གིས་ཁུལ་དེའི་བོད་མིར་རོགས་རམ་གནང་རྒྱུའི་ཞལ་བཞེས་གནང་།

རྒྱ་གར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་ཀྱིས་མེའོ་ཆོས་འཕེལ་གླིང་བོད་མིའི་གཞིས་ཆགས་ཀྱི་བོད་མིའི་དཀའ་ངལ་དང་འབྲེལ་བའི་གནད་དོན་ཐོག་རོགས་རམ་གནང་རྒྱུའི་ཁས་ལེན་གནང་འདུག
དེ་ཡང་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ཁུལ་གྱི་བཙན་བྱོལ་བོད་མིའི་གཞིས་ཆགས་ཆེ་ཤོས་གྲས་ཡིན་པ། མེའོ་ཆོས་འཕེལ་གླིང་བོད་མིའི་གཞིས་ཆགས་སུ་ཕྱི་ཚེས་༢༥ཉིན་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་གཞུང་འབྲེལ་འཚམས་གཟིགས་སུ་ཕེབས་སྐབས། ས་གནས་འགོ་འཛིན་གཙོས་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ། དེ་བཞིན་མི་མང་དང་སློབ་ཕྲུག་བཅས་ནས་སྣེ་ལེན་ཞུས་འདུག སྐབས་དེར་ས་གནས་འགོ་འཛིན་མཆོག་གིས་སྤྱི་ཁྱབ་བློན་ཆེན་མཆོག་ལ་རྒྱ་གར་དབུས་གཞུང་དང་མངའ་སྡེ་གཞུང་དམངས་གཉིས་ནས་བོད་མིར་ད་བར་མཐུན་འགྱུར་རོགས་རམ་དང་རྒྱབ་སྐྱོར་གནང་བ་ལ་ཐུགས་རྗེ་ཆེ་ཞུས་པ་དང་སྦྲགས། གཞིས་ཆགས་ནང་གི་བོད་མིའི་དཀའ་ངལ་དང་འབྲེལ་བའི་གནད་དོན་ཐོག་རོགས་རམ་གནང་སྐྱོང་ཡོང་བའི་འབོད་སྐུལ་ཞུས་པར་བློན་ཆེན་མཆོག་ནས་ཀྱང་བོད་མིར་རོགས་རམ་གནང་རྒྱུའི་ཁས་ལེན་གནང་ཡོད་པ་ས་གནས་འགོ་འཛིན་བསྟན་འཛིན་མཆོག་ལྡན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་སོང་།
སྤྱི་ཁྱབ་བློན་ཆེན་པདྨ་མཁའ་འགྲོ་ལགས། མེའོ་ཆོས་འཕེལ་གླིང་བོད་མིའི་གཞིས་ཆགས་ནང་འཚམས་གཟིགས་སུ་ཕེབས་པ་ད་རེས་ཐོག་མ་དེ་ཆགས་ཀྱི་ཡོད་པ་དང་། བློན་ཆེན་མཆོག་གཞིས་ཆགས་ནང་ཕེབས་མ་ཐག་གཞིས་ཆགས་ནང་གི་པདྨ་ཆོས་གླིང་དགོན་པར་ཆོས་མཇལ་ཞུས་འདུག སྐབས་དེར་ཁོང་གིས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་མདུན་སྐུ་ཕྱག་དང་མཉམ་མར་མེ་ཞལ་ཕྱེ་གནང་ཡོད་པ་དང་། དེ་ནས་ཁོང་གིས་བོད་མིའི་གཞིས་ཆགས་ཀྱི་མཉམ་འབྲེལ་ལས་ཁང་གི་ཁྱབ་ཁོངས་རུམ་འཐག་དང་ཚོང་འབྲེལ་སྡེ་ཚན། དེ་བཞིན་ས་གནས་འཕྲོད་བསྟེན་སྨན་ཁང་བཅས་སུ་འཚམས་གཟིགས་གནང་ཡོད་པ་མ་ཟད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་མཐུན་འགྱུར་འོག་གཞིས་ཆགས་ནང་ལག་རྩེད་སྤོ་ལོ་རྩེད་ཐང་གསར་རྒྱག་ལེགས་གྲུབ་བྱུང་བ་དེ་ཡང་དབུ་འབྱེད་གནང་འདུག
འཚམས་གཟིགས་རྗེས། སྤྱི་ཁྱབ་བློན་ཆེན་པདྨ་མཁའ་འགྲོ་ལགས་ཀྱིས་མེའོ་ཆོས་འཕེལ་གླིང་བོད་མིའི་གཞིས་ཆགས་སུ་འཚམས་གཟིགས་སྤྲོ་བོ་བྱུང་ཡོད་པ་ཁོང་གི་ངོ་དེབ་དང་ཊུའི་ཊར་དྲ་ལམ་དུ་པར་དང་བཅས་སྤེལ་ཡོད་པ་རེད།
མེའོ་ཆོས་འཕེལ་གླིང་དུ་ལག་རྩེད་སྤོ་ལོ་རྩེད་ཐང་བཟོ་བསྐྲུན་ཆེད་དུ་ཁྱོན་ཧིན་སྒོར་འབུམ་བཅུ་ཕྱིན་ཡོད་པ་དང་། ལས་གཞི་དེ་བཞིན་བོད་མིའི་སྒྲིག་འཛུགས་འཕྲོད་བསྟེན་ལྷན་ཁང་ནས་བོད་པའི་གཞོན་སྐྱེས་དང་མི་མང་ཡོངས་ཀྱི་འཕྲོད་བསྟེན་དང་སེམས་ཁམས་ཐོག་དགེ་ཕན་ཆེད་བསྐྲུན་པ་ཡིན་འདུག