བོད་ཀྱི་ཕུང་པོ་བྱ་གཏོར་ལ་ཁྲིམས་ཐོག་ནས་སྲུང་སྐྱོབ་གནང་རྒྱུ།

གསེར་རྟ་ཕྱོགས་ཀྱི་དུར་ཁྲོད་ཞིག

བོད་རང་སྐྱོང་ལྗོངས་ནང་ཕུང་པོ་བྱ་གཏོར་བྱ་རྒྱུར་ཁྲིམས་མཐུན་ཐོག་ནས་སྲུང་སྐྱོབ་བྱ་རྒྱུ་ཡིན་ལུགས་གྲོས་གཞི་གཏན་འབེབས་བྱུང་འདུག
དེ་ཡང་རྒྱ་ནག་གིས་བོད་རང་སྐྱོང་ལྗོངས་ཞེས་འབོད་པའི་མི་མང་འཐུས་མི་ཚོགས་ཆེན་གྱི་ལོ་རེའི་ལྷན་ཚོགས་དེ་བཞིན་འདས་པའི་ཉིན་གྲངས་ཁ་ཤས་རིང་བོད་ཀྱི་རྒྱལ་ས་ལྷ་སར་ཚོགས་ནས་སྤྱི་ཚེས་༢༣་གཟའ་པ་སངས་ཉིན་མཇུག་བསྒྲིལ་ཡོད་ཅིང་། ལྷན་ཚོགས་ཐོག་བོད་ཀྱི་ཐུན་མོང་མ་ཡིན་པའི་བྱ་གཏོར་གྱི་སྲོལ་རྒྱུན་ལུགས་སྲོལ་དོ་དམ་ཚན་པ་ཞེས་པའི་གྲོས་གཞི་གཏན་འབེབས་བྱུང་ཡོད་པ་དང་། དེ་ནི་བོད་ཀྱི་ལོ་རྒྱུས་ཐོག་ཁྲིམས་ཐོག་ནས་བྱ་གཏོར་གྱི་བྱ་སྲོལ་ལ་དོ་དམ་བྱ་རྒྱུ་ཐོག་མ་དེ་ཡིན་ལུགས་འཁོད་འདུག བོད་རང་སྐྱོང་ལྗོངས་བྱ་གཏོར་དོ་དམ་དོན་ཚན་ཞེས་པའི་གྲོས་གཞི་དེའི་ནང་། བྱ་གཏོར་བྱེད་སྟངས་དང་། དེ་བཞིན་དུར་ཁྲོད་ལ་དོ་དམ་དང་དེའི་ཉེ་འཁྲིས་ཀྱི་ཁོར་ཡུག་ལ་སྲུང་སྐྱོབ། ཕུང་པོ་བྱ་གཏོར་བྱེད་མཁན་སྟོབས་ལྡན་གྱི་གནས་བབ་གཏན་འབེབས་སོགས་ཀྱི་ནང་དོན་འཁོད་ཡོད་པ་རེད། བོད་རང་སྐྱོང་ལྗོངས་མི་མང་འཐུས་ཚོགས་ཐོག་གྲོས་མཐུན་བྱུང་བའི་ཁྲིམས་ཐོག་ནས་བྱ་གཏོར་ལས་དོན་སྲུང་སྐྱོབ་ཀྱི་གྲོས་གཞིའི་གཏན་འབེབས་ནང་དོན་ཐོག བོད་རང་སྐྱོང་ལྗོངས་མི་མང་འཐུས་ཚོགས་ཀྱི་མི་རིགས་དང་ཆོས་ལུགས་ལས་དོན་ལྷན་ཁང་ཀྱིས་ཞིབ་བཤེར་གྲོས་མོལ་བྱས་ནས་ཞིབ་བཤེར་གྱི་མཇུག་འབྲས་མི་མང་འཐུས་ཚོགས་སུ་སླར་ཡང་བསྐྱལ་ནས་མཐའ་མའི་གྲོས་ཆོད་འཇོག་གི་ཡོད་འདུག
༡༩༩༥ལོར་བོད་རང་སྐྱོང་ལྗོངས་ཀྱིས་བྱ་གཏོར་ལས་དོན་ཐོག་སྟངས་འཛིན་གྱི་འབྲེལ་ཡོད་བརྡ་ཁྱབ་ཕྱིར་བསྒྲགས་བྱས་ཡོད་པ་དང་། ཉིས་སྟོང་ལྔ་ལོར་བྱ་གཏོར་ལས་དོན་དོ་དམ་གྱི་འཕྲལ་སེལ་གཏན་འབེབས་ཞེས་པ་ཞིག་ཕྱིར་བསྒྲགས་བྱས་ཡོད་པའི་ནང་། དུར་ཁྲོད་དུ་ཕུང་པོ་བྱ་གཏོར་བྱེད་པའི་སྐབས་ལྟད་མོ་ལྟ་བ་དང་། དཔར་རྒྱག་པ། བརྙན་འཕྲིན་དང་། གསར་ཤོག དུས་དེབ་སོགས་ཀྱི་ཐོག་བཏོན་མི་ཆོག་པའི་གཏན་འབེབས་བྱས་ཡོད་པ་རེད། གནས་ཚུལ་ནང་འཁོད་པར་གཞིགས་ན། ཉེ་བའི་ཆར་བོད་རང་སྐྱོང་ལྗོངས་ཁོངས་སུ་དུར་ཁྲོད་༡༩༣༨ཙམ་དང་། སྟོབས་ལྡན་མི་གྲངས་༡༠༩༣ཙམ་ཡོད་ལུགས་འཁོད་འདུག

གསར་འགོད་པ་འཆི་མེད།