བོད་ལུགས་རྩུབ་དཔྱད་སྨན་བཅོས་དང་སྦྱོང་བརྡར་ཟུང་འབྲེལ་གྱི་ལས་གཞི་སྤེལ་འདུག

དབུས་སྨན་རྩིས་ཁང་གིས་གོ་སྒྲིག་འོག་བོད་ལུགས་རྩུབ་དཔྱད་སྨན་བཅོས་དང་ཕུལ་བྱུང་གི་སྨན་པ་བསྐྱེད་བསྲིང་ཆེད་སྦྱོང་བརྡར་ཟུང་འབྲེལ་གྱི་ལས་གཞི་སྤེལ་འདུག
དེ་ཡང་སྤྱི་ལོ་༢༠༡༨ ལོའི་སྤྱི་ཟླ་༩ ཚེས་༡༧ ནས་༢༦ བར་ཉིན་གྲངས་བཅུ་ཡི་རིང་རྒྱ་གར་ལྡེ་ར་ལྡུན་བདེ་སྐྱིད་གླིང་དུ་དབུས་སྨན་རྩིས་ཁང་གིས་གོ་སྒྲིག་འོག་བོད་ལུགས་གསོ་རིགས་སྨན་པ་འགའ་ཞིག་ཆེད་ཕེབས་ཀྱིས་གཏར་སྲེག་བཅས་རྩུབ་དཔྱད་སྨན་བཅོས་དང་སྦྱོང་བརྡར་ཟུང་འབྲེལ་གྱིས་སྒོ་ནས་ལས་གཞི་ཞིག་སྤེལ་གནང་བཞིན་པ་དང་། བོད་ལུགས་གསོ་རིག་སྨན་པ་ཆོས་ལྡན་ལགས་ནས། སྤྱིར་སྟངས་ལས་གཞི་འདི་སྤྱི་ལོ་༢༠༡༠ ནས་བཅོ་ལྔ་བར་བཙན་བྱོལ་བོད་མིའི་གཞིས་སྒར་ཁག་༢༣་ཙམ་གྱི་ནང་སྐོར་བསྐྱོད་ཀྱིས་གསོ་རིག་གཞུང་ལུགས་ལྟར་གཏར་བསྲེག་བཅས་རྩུབ་དཔྱད་སྨན་བཅོས་དང་སྦྱོང་བརྡར་ཟུང་འབྲེལ་གྱི་ལས་གཞི་བསྟུད་མར་སྤེལ་བ་ཡིན་ཞེས་དང་། འདི་ལོ་ཡང་རྒྱ་གར་བྱང་ཤར་བོད་མིའི་གཞིས་སྒར་སིམ་ལ་དང་། བདེ་སྐྱིད་གླིང་། ར་ཇའི་སྤུར། སྤོན་ཌ་དོན་གྲུབ་གླིང་བཅས་ས་གནས་ཁག་སོ་སོར་ཉིན་གྲངས་བཅུ་རེ་བཅུ་རེ་ལས་གཞི་འདི་སྤེལ་རྒྱུ་ཡིན་ཅེས་དང་། སྨན་བཅོས་བྱེད་སའི་ནད་པ་ལྟ་བུ་ལ་མཚོན་ན་གྲུམ་བུའི་ན་ཚ་དང་། རྩ་དཀར། ཕྱི་ལུགས་དང་བོད་ལུགས་གཉིས་ཀའི་ནང་ཧ་ཅང་བཅོས་ཐབས་དཀའ་བའི་མགོ་ནད། གྲིབ་སྐྱོན། རྟིང་དྲེག་བཅས་ཀྱི་སྐོར་ལ་སྨན་བཅོས་བྱེད་ཀྱི་ཡོད་པ་དང་། བོད་དང་རྒྱ་གར་བཅས་མི་རིགས་སོགས་ཀྱིས་ཆ་རྐྱེན་ཅི་ཡང་མི་དགོས་པར་རིན་མེད་ངང་སྨན་བཅོས་བྱེད་ཆོག་གི་རེད་ཅེས་གསུངས་སོང་།

གསར་འགོད་པ་བློ་བཟང་།