རྒྱ་ནག་གཞུང་གིས་གོ་འཇོ་ཁུལ་གྱི་གྲོང་ཚོ་ཁག་གཅིག་གནས་སྤོར་དགོས་བའི་བཀའ་བཏང་འདུག

རྒྱ་ནག་གཞུང་གིས་དབུལ་སྐྱོབ་ཕྱུག་བསྒྱུར་གྱི་ལས་གཞི་ལ་ཁ་གཡར་ནས་ཆབ་མདོ་གོ་འཇོ་ཁོངས་ཀྱི་ས་གནས་གྲོང་ཚོ་ཁག་གཅིག་གནས་སྤོར་བྱེད་དགོས་བའི་བཀའ་བཏང་འདུག
རྒྱ་ནག་གཞུང་གིས་དབུལ་སྐྱོབ་ཕྱུག་བསྒྱུར་གྱི་ལས་གཞི་ཟེར་བ་བོད་ཀྱི་ས་ཁུལ་མང་པོའི་ནང་སྤེལ་བཞིན་ཡོད་ཅིང་།  དེའི་ཁོངས་སུ་བོད་རང་སྐྱོང་ལྗོངས་ཆབ་མདོ་གོ་འཇོ་རྫོང་གི་ཁོངས་སུ་གཏོགས་པའི་ཞོང་གསོ་ཤང་གི་གྲོང་ཚོ་ཁག་དགུ་ད་ལོའི་ལོ་མཇུག་ཏུ་ས་གནས་གཞན་དུ་གནས་སྤོ་བྱས་ཟིན་དགོས་པའི་བཀའ་རྒྱ་བཏང་ཡོད་འདུག
འདི་ལོ་ཕྱི་ཟླ་བརྒྱད་པའི་ནང་རྒྱ་ནག་གཞུང་གིས་དབུལ་སྐྱོབ་ཕྱུག་བསྒྱུར་གྱི་སྲིད་བྱུས་ཞེས་པའི་མིང་འོག་ཞོང་གསོ་ཤང་གི་གྲོང་ཚོ་ཁག་དགུ་སྟེ་ཅ་ཀ་གྲོང་ཚོ་དང་། དཔལ་ལོ་གྲོང་ཚོ། ཤ་ཡ་གྲོང་ཚོ། སྡེབ་གྲོང་ཚོ་སྟོད་སྨད་གཉིས་དང་། ཆོལ་གསུམ་གྲོང་ཚོ་སྟོད་སྨད་གཉིས། དགའ་སྣེ་གྲོང་ཚོ། དགའ་གསོ་གྲོང་ཚོ་བཅས་བསྡོམས་པའི་གྲོང་ཚོ་དགུ་ལ་བོད་ལྗོངས་ལྷ་སའི་གྲོང་ཁྱེར་ཁོངས་སུ་རྟོགས་པའི་མལ་གྲོ་གུང་དཀར་རྫོང་དང་། སྟོད་ལུང་རྫོང་། ལྷོ་ཁ་བཅས་ལ་གནས་སྤོ་བྱེད་དགོས་པའི་བཀའ་བཏང་པའི་གནས་ཚུལ་འབྲེལ་ཡོད་བོད་མི་ཞིག་གིས་འདི་གའི་རླུང་འཕྲིན་ཁང་ལ་ངོ་སྤྲོད་གནང་ཡོད།
མིང་འབོད་མ་བྱས་པའི་གནས་ཚུལ་འབྱུང་ཁུངས་དེས་བརྗོད་པར་གཞིགས་ན།  གོ་འཇོ་རྫོང་ས་གནས་རྒྱ་ནག་སྲིད་གཞུང་གིས་བོད་མི་འདི་དག་གནས་སྤོ་བྱེད་བཅུག་དོན་ནི་ས་གནས་འདིར་རྒྱ་གཞུང་གིས་གློག་ཁང་གསར་བརྒྱག་དང་གཏེར་ཁ་སྔོག་འདོན་ཆེད་དུ་ཡིན་པར་བོད་མི་ཚོས་ཡིད་ཆེས་བྱེད་བཞིན་ཡོད་པ་དང་། གྲོང་ཚོ་གཅིག་གི་བོད་མི་ཁག་ཅིག་གིས་སྒོ་ཕྱུགས་སེམས་ཅན་རྫོང་དུ་བཙོང་ཐབས་དང་། ཁ་ཤས་ཀྱིས་བཤས་རྭར་བསྐྱལ་ཐབས་བྱེད་བཞིན་པ་སོགས་གནས་སྤོ་བྱ་དགོས་ཀྱི་བཀའ་རྒྱའི་འོག་ཚུད་པའི་ཡུལ་མི་ཚོར་དཀའ་ངལ་འཕྲད་བཞིན་ཡོད་འདུག

གསར་འགོད་པ་ཟླ་བ་སྒྲོལ་མ་དང་། གུ་རུ་ཆོས་སྐྱིད།