ཨ་རུ་ན་ཅལ་བོད་དོན་རྒྱབ་སྐྱོར་ཚོཊ་པས་རྒྱ་ནག་གཞུང་ལ་ནན་སྐུལ།

༄༅། །རྒྱ་གར་བྱང་ཤར་ཨ་རུལ་ནལ་ཅལ་མངའ་སྡེའི་བོད་དོན་རྒྱབ་སྐྱོར་ཚོགས་པས་རྒྱ་ནག་གཞུང་ལ་དབུས་བོད་མིའི་སྒྲིག་འཛུགས་དང་གྲོས་མོལ་་སླར་གསོ་བྱེད་པའི་ཐོག་ནས་བོད་དོན་ཐག་གཅོད་དགོས་སྐོར་ནན་སྐུལ་བྱས་འདུག
ཕྱི་ཚེས་༢༧ཉིན་རྒྱ་གར་གྱི་བརྒྱུད་ལམ་ནང་སྤེལ་བའི་གནས་ཚུལ་ལྟར་ན་གོང་ཞུས་རྒྱ་གར་གྱི་བོད་དོན་རྒྱབ་སྐྱོར་བོད་དོན་ཚོགས་པ་དེའི་ཚོགས་གཙོ་Gicho Kabak གཙོས་པའི་སྐུ་ཚབ་འཐུས་མི་ཁག་ཅིག་གིས་གཟའ་ཕུར་བུའི་ཕྱི་ཚེས་༢༥ཉིན་རྒྱ་གར་གྱི་རྒྱལ་ས་ལྡི་ལི་ལ་༧གོང་ས་སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་ཡོད་འདུག།  དེའང་རྒྱ་གར་གྱི་ཉིན་རེའི་ཚགས་པ་Indian Expressབརྒྱུད་ལམ་ཐོག་གནས་ཚུལ་སྤེལ་བ་གཞིགས་ན། རྒྱབ་སྐྱོར་ཚོགས་པ་དེས་མཇལ་བཅར་ཞུས་རྗེས་ཀྱི་གསར་འགོད་གསལ་བསྒྲཌ་ཤིག་སྤེལ་བའི་ནང་། ༧གོང་ས་སྐྱབས་མགོན་ཆེན་པོ་མཆོག་གིས་བོད་རང་བཙན་རྩོད་གནང་གི་མེད་པ་མ་ཟད། བོད་མི་ཚོས་རྒྱ་མི་རིགས་ལ་ཡང་ཁ་གཏད་གཅོག་གི་མེད་པ་རེད། ཁོང་ཚོས་གཉིས་ཕན་དབུ་མའི་ལམ་གཞིར་བཟུང་གིས་བོད་ལ་མིང་དོན་མཚུངས་པའི་རང་སྲིད་རང་སྐྱོང་དགོས་འདུན་སྟོན་གྱི་ཡོད་པ་རེད་ཅེས་བཀོད་ཡོད་འདུག། དེ་བཞིན་༧གོང་ས་སྐྱབས་མགོན་ཆེན་པོ་མཆོག་གིས་ཀྱང་རྒྱ་གར་རྒྱབ་སྐྱོར་ཚོགས་པ་དེས་བོད་དོན་རྒྱབ་སྐྱོར་གནང་བ་དང་གདུང་སེམས་མཉམ་སྐྱེད་གནང་བར་ལ་ཐུགས་རྗེ་ཆེ་ཞེས་གསུངས་གླེང་བསྩལ་འདུག ད་དུང་གོང་ཞུས་ཚོགས་པ་དེས་གསར་འགོད་བསྒྲགས་གཏམ་དེའི་ནང་སྤྱི་ལོ་༡༩༧༩ལོར་རྒྱ་ནག་གི་འགོ་འཁྲིད་ཏིང་ཤའོ་ཕིང་གིས་སྐུའི་གཅེན་པོ་རྒྱལ་ལོ་དོན་འགྲུབ་མཆོག་ལ་རང་བཙན་མ་གཏོགས་གཞན་གནད་དོན་གང་གི་ཐོག་ཡིན་ན་ཡང་གྲོས་མོལ་ཐོག་ནས་སེལ་ཐུབ་ཀྱི་རེད་ཅེས་གསུངས་པ་ལ་༧གོང་ས་མཆོག་གིས་རེ་བ་ཆེན་པོ་གནང་ཡོད་ལུགས་ཚོགས་པ་དེས་དོ་སྣང་བྱུང་བ་བརྗོད་འདུག
བོད་དོན་རྒྱབ་སྐྱོར་ཚོགས་པ་དེས་༧གོང་ས་སྐྱབས་མགོན་ཆེན་པོ་ཆེ་མཆོག་ལ། བོད་ཀྱི་གནད་དོན་མ་སེལ་གྱི་བར་དུ་བོད་མི་དང་བོད་དོན་ཆེད་གོ་རྟོགས་སྤེལ་རྒྱུའི་དུས་དེབ་འགྲེམས་སྤེལ་བྱེད་རྒྱུ་དང་བགྲོ་གླེང་ཚོགས་འདུ་ལ་སོགས་བསྐོང་ཚོགས་བྱས་པ་བརྒྱུད་ནས་བོད་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེད་བྱེད་རྒྱུའི་ཁས་ལེན་ཡང་ཞུས་འདུག། ད་ལམ་༧གོང་ས་མཆོག་ལ་མཇལ་བཅར་ཞུ་མཁན་གྱི་ཁོངས་སུ་བོད་དོན་རྒྱབ་སྐྱོར་ཚོགས་པའི་ཚོགས་གཙོ་GichoKabakདང་ཚོགས་གཞོན་མངའ་སྡེའི་བློན་ཆེན་ཟུར་པ་Tanyong Tatak ལགས་དང་སྤྱི་ཁྱབ་དྲུང་ཆེ་Anok Wangsa སོགས་སྐུ་ཚབ་འཐུས་མི་ལྔ་ལས་གྲུབ་ཡོད་པ་རྣམས་ཀྱིས་༧གོང་ས་མཆོག་ལ་མཇལ་བཅར་ཞུས་ཡོད་པ་རེད།།
གསར་འགོད་པ་རྡོ་རྗེ་དགྲ་འདུལ།