བོད་ཀྱི་རྒྱལ་དར་ཡོད་པའི་ལྒང་ཕུག་མཉམ་ཞུགས་མི་ཆོག

དབྱིན་ཡུལ་ནང་ལྒང་ཕུག་དུས་སྟོན་སྐབས་སུ་བོད་ཀྱི་རྒྱལ་དར་ཅན་གྱི་ལྒང་ཕུག་འཕུར་བསྐྱོད་བྱེད་རྒྱུར་རྒྱ་ནག་གིས་རྙོག་དྲ་བཟོ་བཞིན་ཡོད་པ།
དེ་ཡང་དབྱིན་ཡུལ་ནང་འདོན་སྤེལ་བྱེད་བཞིན་པའི་The Guardianཞེས་པའི་གསར་ཤོག་ནང་། འདི་ཚེས་༤་ཉིན་གནས་ཚུལ་སྤེལ་བར་གཞིགས་ན། དབྱིན་ཡུལ་གྱི་ Bristol International Balloon Fiestaཞེས་རྒྱལ་སྤྱིའི་སྒང་ཕུག་འདྲ་མིན་མཁའ་དབྱིངས་སུ་འཕུར་གཏོང་བྱེད་མཁན་གྱི་དུས་སྟོན་ཞིག་ཚོགས་ཀྱི་ཡོད་པའི་སྐབས་སུ། བོད་ཀྱི་རྒྱལ་དར་ཅན་གྱི་མཐོ་ཚད་ཕི་ཀྲི་བརྒྱ་ཙམ་ཡོད་པའི་ལྒང་ཕུག་མཚོན་ཁྲ་ཞིག་ཀྱང་འཕུར་གཏོང་མཉམ་ཞུགས་བྱེད་རྒྱུའི་འཆར་གཞི་ཡོད་པ་དེ་ནི་ཕྱི་ཟླ་བདུན་པའི་ཚེས་བཅུ་གཅིག་ནས་བཟུང་ཐོག་མར་Spainདང་། Franceགཉིས་ཀྱི་ནང་དུའང་ཆ་ཤས་ལེན་པའི་ཁོངས་ཤིག་ཡིན་པ་རེད། འོན་ཀྱང་གོང་ཞུས་གོ་སྒྲིག་ཚོགས་ཆུང་ལ་རྒྱ་ནག་གཞུང་ཚབ་ཀྱི་ལས་བྱེད་ཡིན་ཟེར་མཁན་ཞིག་གིས་གློག་འཕྲིན་དང་། ཁ་པར་སོགས་ཀྱི་བརྒྱུད་ལམ་ནས་བོད་ཀྱི་རྒྱལ་དར་ཅན་གྱི་སྒང་ཕུག་མཉམ་ཞུགས་བྱེད་བཅུག་པ་ཡིན་ན་དབྱིན་ཡུལ་དང་རྒྱ་ནག་ཡུལ་གཉིས་ཀྱི་འབྲེལ་བར་དོ་ཕོག་འགྲོ་གི་རེད། རྒྱལ་དར་དེ་ནི་བོད་མི་ཁ་བྲལ་གཏོང་མཁན་ཚོས་བེད་སྤྱོད་བྱེད་པའི་ལག་ཆ་ཞིག་ཡིན་ལུགས་སོགས་བཤད་ཡོད་འདུག འོན་ཀྱང་ཉེན་བརྡ་གཏོང་མཁན་དེའི་སྐོར་གསར་འགྱུར་ལས་ཁང་ནས་དངོས་ཡོད་བདེན་པ་ཡིན་མིན་དང་། རྒྱ་ནག་གཞུང་ཚབ་ནས་བསམ་ཚུལ་ག་འདྲ་ཡོད་མེད་འདྲི་བརྩད་བྱས་ཀྱང་དེར་དངོས་སུ་ལན་འདེབས་གང་ཡང་བྱས་མེད་པའི་སྐོར་བཀོད་འདུག
དེའི་གོང་གནད་དོན་དེའི་ཐོག་ཕ་རན་སི་དང་། སེ་པེན་གཉིས་ཀྱི་ནང་དུའང་དུས་སྟོན་གོ་བསྒྲིགས་ནང་མཉམ་ཞུགས་བྱེད་བཅུག་ན་འགྲིགས་ཀྱི་མེད་པའི་ཉེན་བརྡ་བཏང་ཡོད་འདུག འོན་ཀྱང་བོད་ཀྱི་རྒྱལ་དར་ཅན་གྱི་སྒང་ཕུག་དེ་གཏོང་མཁན་བཟའ་མི་གཉིས་ནས་དེས་བོད་ཀྱི་གནད་དོན་ཁྱབ་སྤེལ་དང་གོ་རྟོག་སྤེལ་ཐབས། དེ་དང་ཕྱོགས་མཚུངས་བོད་ཀྱི་གནད་དོན་ཐོག་ཞལ་འདེབས་བསྡུ་རུབ་ཀྱིས་མཐུན་འགྱུར་རོགས་རམ་བྱེད་རྒྱུའི་ཆེད་ཡིན་ལུགས་གསུངས་འདུག
ཡང་གོ་སྒྲིག་ཚོགས་ཆུང་གི་ངོས་ནས་སྒང་ཕུག་དེའི་སྟེང་ཆབ་སྲིད་ཀྱི་ཚིག་བརྗོད་དང་རི་མོ་སོགས་གང་ཡང་འཁོད་མེད་པ་དང་། དེ་ནི་ཞི་བདེའི་མཚོན་རྟགས་ལྟབུར་ངོས་འཛིན་བྱེད་ཀྱི་ཡོད་ལུགས་འགྲེལ་བརྗོད་གནང་ཡོད་པ་རེད།

གསར་འགོད་པ་རིག་འཛིན་ཆོས་སྒྲོན།