༧གོང་ས་མཆོག་ཟླ་དྲུག་པའི་ནང་དབྱིན་ཡུལ་དུ་ཆིབས་བསྒྱུར།

༄༅༎བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་འདི་ལོ་ཕྱི་ཟླ་དྲུག་པའི་ནང་དབྱིན་ཡུལ་དུ་ཆིབས་བསྒྱུར་ཞབས་སོར་འཁོད་གནང་མཛད་རྒྱུ་ཡིན་འདུག།
དེ་ཡང་དབྱིན་ཇིའི་རྒྱལ་ས་ལོན་ཌོན་ནས་ བོད་ཀྱི་སྐུ་ཚབ་དོན་གཅོད་ལས་ཁུངས་ཀྱིས་གསལ་བསྒྲགས་ཤིག་སྤེལ་འདུག་པ་དེའི་ནང་ ༧གོང་ས་༧སྐྱབས་མགོན་ཆེན་པོ་མཆོག་ འདི་ལོ་ཕྱི་ཟླ ༦ ཚེས་ ༡༦ ནས་ ཉིན་གྲངས་བརྒྱད་རིང་ དབྱིན་ཡུལ་གྱི་རྒྱལ་ས་ལོན་ཌོན་དང་ གྲོང་ཁྱེར་མེན་ཆེསི་ཀྲར། སོ་ཀོཏ་ལེནདྲ་གྱི་གྲོང་ཁྱེར་ཨེ་ཌིན་སྦག། ཌན་ཌི། ཨིན་ལྦར་ནེསི་བཅས་ཀྱི་ནང་མང་ཚོགས་ལ་བཀའ་སློབ་གསུང་བཤད་དང་ ཞི་བདེའི་བགྲོ་གླེང་འདུ་འཛོམས་ཀྱི་ཚོགས་མགོན་བཅས་སུ་ཆིབས་བསྒྱུར་སྐྱོང་གནང་སོགས་ཀྱི་མཛད་འཆར་ཡོད་འདུག།
མཛད་འཆར་དེ་དག་གི་ཁོངས་ནས་གལ་ཆེ་ཤོས་དེ་ མེན་ཆེསི་ཊར་གྲོང་ཁྱེར་གྱི་ནང་གཞོན་ནུའི་འདུ་འཛོམས་ཆེན་པོ་ཞིག་གི་ཐོག་༧གོང་ས་༧སྐྱབས་མགོན་ཆེན་པོ་མཆོག་ནས་ ད་ལྟའི་དུས་རབས་འདི་བཞིན་གྲོས་མོལ་གྱི་དུས་རབས་ཤིག་བཟོ་ཐབས་དང་ འཛམ་གླིང་འདི་ཞི་བདེ་ལྡན་པ་ཞིག་བཟོ་ཐབས་སུ་ འཚེ་མེད་ཞི་བའི་རིག་གཞུང་དར་སྤེལ་དགོས་རྒྱུ་ནི་ཛ་དྲག་གི་གནད་དོན་ཞིག་ཡིན་པའི་སྐོར་བཀའ་སློབ་གསུང་བཤད་དང་ གཞོན་ནུ་ཚོ་དང་བགྲོ་གླེང་གནང་རྒྱུའི་མཛད་འཆར་དེ་ཡིན་འདུག་ ཕྱི་ཟླ་དྲུག་པའི་ནང་གི་༧གོང་ས་༧སྐྱབས་མགོན་ཆེན་པོ་མཆོག་གི་དབྱིན་ལེན་གྱི་མཛད་འཆར་ཡོངས་རྫོགས་ དབྱིན་ཡུལ་དུ་རྟེན་གཞི་བྱེད་པའི་བོད་ཀྱི་སྐུ་ཚབ་དོན་གཅོད་ལས་ཁུངས་ནས་འབྲེལ་མཐུད་གནང་བཞིན་ཡོད་པ་རེད།