༸གོང་ས་མཆོག་ནས་དབྱིན་ཇིའི་གྲོས་ཚོགས་ནང་གསུང་བཤད་གནང་རྒྱུ།

༄༅༎བོད་ཀྱི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དབྱིན་ཇིའི་གྲོས་ཚོགས་ཀྱི་ཕྱི་འབྲེལ་ཚོགས་ཆུང་གི་གདན་ཞུ་བཞིན་ཕྱི་ཟླ་ལྔ་པའི་ཚེས་༢༢ཉིན་དབྱིན་ཇིའི་གྲོས་ཚོགས་ནང་འགྲོ་བ་མིའི་ཐོབ་ཐང་གི་གནད་དོན་ཐོག་གསུང་བཤད་གནང་རྒྱུ་ཡིན་པ་རེད་། དབྱིན་ཇིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས་ཕྱི་ལོ་ཉིས་སྟོང་བརྒྱད་ལོའི་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་སྟངས་ཐོག་དོ་སྣང་ཆེན་པོ་གནང་གི་ཡོད་པར་བརྟེན་ནས་། ད་རེས་བོད་ཀྱི་དབུ་འཁྲིད་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཚེས་༢༢དང་༣༠བར་དབྱིན་ཡུལ་ནང་ཆིབས་བསྒྱུར་བསྐྱངས་པའི་སྐབས་དབྱིན་ཇིའི་གྲོས་ཚོགས་ནང་འགྲོ་བ་མིའི་ཐོབ་ཐང་གི་གནད་དོན་ཐོག་བཀའ་སློབ་གནང་རྒྱུའི་དགོས་འདུན་བཏོན་གནང་བ་བཞིན་༸གོང་ས་མཆོག་ནས་ཞལ་བཞེས་གནང་བ་དབྱིན་ཇིའི་གྲོས་ཚོགས་ཀྱི་ཕྱི་འབྲེལ་ཚོགས་ཆུང་གི་དཔོན་རིགས་ནས་གསུངས་བཞག དེ་མིན་༸གོང་ས་མཆོག་དུས་ཡུན་ཉིན་གྲངས་དགུ་དབྱིན་ཡུལ་ནང་ཆིབས་བསྒྱུར་གནང་རིང་དམངས་ཁྲོད་དུ་བཀའ་སློབ་དང་དེ་བཞིན་དེང་དུས་ཀྱི་འཛམ་གླིང་ནང་ཀུན་ཁྱབ་འགན་འཁུར་སྐོར་དང་དོན་དང་ལྡན་པའི་མི་ཚེ་སྐྱེལ་སྟངས་སོགས་ཀྱི་བརྗོད་གཞིའི་ཐོག་བཀའ་སློབ་གནང་འཆར་ཡོད་པ་དང་། དེ་མིན་གསུང་ཆོས་ཁག་ཅིག་ཡང་གནང་འཆར་ཡོད་པ་རེད་།།