༧གོང་ས་མཆོག་གིས་རྒྱ་རིགས་དད་ལྡན་ལ་ཆོས་འབྲེལ་བསྩལ།

༄༅༎༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཞུགས་སྒར་དུ་རྒྱ་རིགས་ཚོར་ཆོས་འབྲེལ་གནང་རྒྱུ་དབུ་འཛུགས་གནང་ཡོད་པའི་གནས་ཚུལ་འདུག
དེ་ཡང་དགའ་ལྡན་ཕོ་བྲང་གི་ཡིག་ཚང་ནས་གསལ་བསྒྲགས་སྤེལ་བའི་ནང་གསལ་ལྟར་ན། དེ་རིང་ཚེས་གསུམ་ནས་བཟུང་ཉིན་གྲངས་གསུམ་རིང་བཞུགས་སྒར་ཕོ་བྲང་དུ་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱ་ནག་སྐམ་ས་ཆེན་པོ་ནས་ཡིན་པའི་རྒྱ་རིགས་དད་ལྡ་པ་ཁག་ཅིག་དང་། གཞན་ཡང་རྒྱ་རིགས་གཞན་འགའ་ཤས་ནས་ལོ་མང་རིང་གསོལ་འདེབས་ཞུས་པ་བཞིན། བདེ་མཆོག་དྲིལ་བུ་ལྷ་ལྔ་གཙོ་བོར་གྱུར་པའི་བཀའ་དབང་ཁག་གསུམ་དང་། འཕགས་པ་ཀླུ་གྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཆོས་འབྲེལ་དབུ་འཛུགས་བསྐྱངས་གནང་ཡོད་འདུག
ཡང་སྐུ་སྒེར་ཡིག་ཚང་གི་དྲུང་ཆེ་རྔ་པ་ཚེ་རྒྱམ་ལགས་ནས་ངོ་སྤྲོད་གནང་བར་ལྟར་ན། ཐེངས་འདིའི་ཆོས་འབྲེལ་དམིགས་བསལ་ཆགས་ཀྱི་ཡོད་པ་ནི་༧རྒྱལ་བ་རིན་པོ་ཆེར་རྒྱ་ནག་ནང་གི་རྒྱ་རིགས་ཚོགས་པ་འགའ་ཤས་ནས་ལོ་མང་པོའི་གོང་ནས་ཆོས་འབྲེལ་བསྐྱངས་རྒྱུར་གསོལ་འདེབས་ཞུས་ནས་ད་རེས་ཐུགས་གཏན་འཁེལ་བ་ཞིག་ཡིན་པ་མ་ཟད་དུས་རྟག་ཏུ་༧གོང་ས་མཆོག་གིས། ནང་པའི་ལྟ་གྲུབ་ནང་པ་ཚོས་ཤེས་རྟོགས་ཐུབ་པ་དགོས་རྒྱུ་གལ་ཆེར་གཟིགས་ཀྱི་ཡོད་སྟབས། བྱང་ཆུབ་སེམས་འགྲེལ་གྱི་ཆོས་འགྲེལ་ཡང་་སྩལ་རྒྱུ་ཡིན་ལུགས་གསུངས་འདུག