༧གོང་ས་མཆོག་གིས་གསར་འགོད་པར་དྲི་ལན་བསྩལ་བ།

༄༅༎བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དེ་རིང་ཕྱི་ཟླ་ ༦ ཚེས་ ༡༤ ཉིན་ ཨའོསི་ཊརེ་ལི་ཡའི་གྲོས་ཚོགས་སུ་ཆིབས་བསྒྱུར་གྲུབ་རྗེས་གསར་འགོད་ལྷན་ཚོགས་ཤིག་གི་ཐོག་ ཨའོསི་ཊརེ་ལི་ཡའི་ངོས་ནས་རང་བྱུང་གཏེར་ཁ་བསྔོག་འདོན་ཤུགས་ཆེ་བྱེད་བཞིན་པ་དང་ རང་བྱུང་གི་ཐོན་སྐྱེད་རྒྱ་ནག་ནང་ཕྱིར་ཚོང་ཤུགས་ཆེ་བྱེད་བཞིན་པ་དེས་ ཨའོསི་ཊརེ་ལི་ཡའི་རང་བྱུང་ཁོར་ཡུག་ལ་གནོད་སྐྱོན་ཚབས་ཆེ་བཟོ་སྲིད་པའི་གནད་དོན་ཐད་ཡིད་ཟབ་བྱེད་དགོས་སྐོར་བཀའ་གནང་འདུག།

ཨའོསི་ཊརེ་ལི་ཡ་ནི་རྒྱ་ནག་ལ་རྡོ་སོལ་དང༌། རང་བྱུང་རྫས་རླངས། རང་བྱུང་ལྕགས་རིགས་ཕྱིར་ཚོང་མང་ཤོས་བྱེད་མཁན་དེ་ཡིན་ཞིང༌། གསར་འགོད་པ་ཞིག་གིས་ ཨའོསི་ཊརེ་ལི་ཡའི་གཏེར་ཁ་བསྔོག་འདོན་ཁེ་ལས་ཚན་པའི་ཆེས་མཐོའི་འགོ་འཁྲིད་ཚོས་ རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་ཞན་པོ་ཡོད་པའི་གནད་དོན་ངོས་འཛིན་གྱིས་ རྒྱ་ནག་དང་ཚོང་ལས་སྤེལ་རྒྱུ་མཚམས་འཇོག་དགོས་མིན་དགོངས་བསྐོར་ཞུས་པར་ ༧གོང་ས་༧སྐྱབས་མགོན་ཆེན་པོ་མཆོག་གིས་ རྒྱ་ནག་ཁེར་རྐྱང་དུ་བུད་ཐབས་བྱེད་པའམ་ཡང་ན་ རྒྱ་ནག་གི་འཕེལ་རྒྱས་སྟངས་འཛིན་སོགས་བྱེད་རྒྱུ་མེད་པའི་བཀའ་ལན་སྩལ་གནང་མཛད་ཡོད་པ་རེད།