༧གོང་ས་མཆོག་སུད་སིར་ཞབས་སོར་འཁོད།

༄༅༎སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དེ་རིང་རེས་གཟའ་ཕུར་བུའི་སྔ་དྲོ་སུད་སི་གྲོང་ཁྱེར་ཇི་ནི་ལྦ་དུ་ཞབས་སོར་བདེ་བར་འཁོད་པ་དང༌། ཇི་ནི་ལྦ་དུ་མཛད་འཆར་གཙོ་བོ་ནི། ར་ཤི་ཡའི་མི་རིགས་ཤིག་གིས་གསར་བཞེངས་གནང་བའི་ནང་པའི་དགོན་པ་ཞིག་དབུ་འབྱེད་དང་རབ་གནས་སྕལ་རྒྱུ་ཡིན་པ་རེད།

སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་རྒྱ་གར་རྒྱལ་ས་ལྡི་ལི་ནས་སུད་སི་གྲོང་ཁྱེར་ཇི་ནི་ལྦ་ཡི་གནམ་ཐང་དུ་ཞབས་སོར་འཁོད་པའི་སྐབས། ༧གོང་ས་སྐྱབས་མགོན་ཆེན་པོ་མཆོག་གི་སུད་སི་སྐུ་ཚབ་དོན་གཅོད་ཚེ་བརྟན་བསམ་གྲུབ་ལགས་དང༌། རྒྱ་གར་གཞུང་ཚབ་པ་སྐུ་ཞབས་ན་གེན་རྡར་པར་སའརྡ་ ཇི་ནི་ལྦ་དུ་ནང་པའི་ཆོས་ཚོགས་ཤེས་རབ་ཆོས་འཁོར་གླིང་གསར་བཞེངས་དང་༧གོང་ས་སྐྱབས་མགོན་ཆེན་པོ་མཆོག་ཆོས་ཚོགས་དབུ་འབྱེད་དང་རབ་གནས་སུ་གདན་ཞུ་ཕུལ་མཁན་ར་ཤི་ཡའི་གྲོས་ཚོགས་ཀྱི་འཐུས་མི་སྐུ་ཞབས་རའ་ཕེལ་གི་མ་ལོལྦ་  རི་ཀོན་ཆོས་ཚོགས་ཀྱི་མཁན་པོ། སུད་སི་དང་ལིཀ་ཀྲེན་སི་ཀྲའེན་བོད་རིགས་སྤྱི་མཐུན་ཚོགས་པའི་ཚོགས་གཙོ། ས་གནས་བོད་ཀྱི་བེུད་ཚོགས་པའི་ཚོགས་གཙོ། ས་གནས་བོད་ཀྱི་གཞོན་ནུ་ཚོགས་པ། སུད་སི་དང་ཡོ་རོབ་བོད་རིགས་མཐུན་ཚོགས་ཀྱི་འཐུས་མི་བཅས་ནས་དགའ་བསུའི་ཕེབས་བསུར་བཅར་ཡོད་པ་རེད། དེ་རྗེས་གནམ་ཐང་ནས་ཇི་ནི་ལྦ་བཞུགས་གནས་མགྲོན་ཁང་དུ་ཆིབས་བསྒྱུར་བསྐྱང་བའི་སྐབས། བོད་མི་བརྒྱ་ལྷག་གིས་གྲོ་སོ་ཕྱེ་མར་དང་དཀར་གཙང་གི་མཇལ་དར་བསྣམས་ཏེ་དགའ་བསུའི་ཕེབས་བསུ་ཞུས་ཡོད་པ་རེད། ཕྱི་ཟླ་བརྒྱད་པའི་ཚེས་༡༢ ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་༧གོང་གསལ་གྲོང་ཁྱེར་ཇི་ནི་ལྦ་དུ་ཤེས་རབ་ཆོས་འཁོར་གླིང་ཆོས་ཚོགས་རབ་གནས་གྲུབ་པའི་རྗེས། ཕེརེན་སི་དུ་ཆིབས་བསྒྱུར་བསྐྱང་གནང་གི་ཡོད་པ་རེད།