ཧོང་ཀོང་དུ་དམངས་གཙོར་རྒྱབ་སྐྱོར་གྱི་ཁྲོམ་བསྐོར།

༄༅༎ཧོང་ཀོང་དེ་བཞིན་དབྱིན་ཇིའི་མངའ་འོག་ནས་རྒྱ་ནག་ལ་རྩིས་སྤྲོད་བྱས་ནས་ལོ་ངོ་བཅུ་གཉིས་འཁོར་གྱི་ཡོད་པའི་སྐབས་དེར་དེ་རིང་གྲོང་ཁྱེར་ཧོང་ཀོང་གི་སྲང་ལམ་ཁག་ཏུ་མི་དམངས་ཁྲི་འཚོ་འགའ་ཤས་ཀྱིས་དམངས་གཙོར་རྒྱབ་སྐྱོར་གྱི་རྔམ་སྟོན་ཁྲོམ་སྐོར་གཞི་རྒྱ་ཆེན་པོ་ཞིག་བྱས་འདུག

ཧོང་ཀོང་གི་དཔལ་འབྱོར་ཉམ་རྒུད་འགྲོ་གི་ཡོད་པར་གཞུང་ཕྱོགས་ཀྱིས་དོ་སྣང་དེ་ཙམ་བྱེད་ཀྱི་མེད་པར་མང་ཚོགས་ཀྱི་འདོད་བློ་མ་འཚིམས་པ་དང་དེ་བཞིན་གྲོང་ཁྱེར་ནང་ལས་མེད་མི་འབོར་མང་དུ་འགྲོ་གི་ཡོད་པ།ཡོངས་ཁྱབ་འོས་བསྡུའི་ཐོབ་ཐང་སྤྲོད་རྒྱུའི་ཐག་གཅོད་ལ་འགོར་འགྱང་གཏོང་གི་ཡོད་པ་བཅས་རྒྱུ་རྐྱེན་མང་པོ་ཞིག་འཛོམས་པའི་ཐོག་ནས་མི་དམངས་ཁྱོན་འབོར་ཆེན་པོ་དེ་ཙམ་འདུ་འཛོམས་བྱུང་ཡོད་སྐོར་རྔམ་སྟོན་ཁྲོམ་སྐོར་གོ་སྒྲིག་གནང་མཁན་ཚོས་འགྲེལ་བརྗོད་གནང་བཞག

བཟོ་པའི་སྡེ་ཚོགས་ཀྱི་འགོ་ཁྲིད་དང་རྔམ་སྟོན་ཁྲོམ་སྐོར་གོ་སྒྲིག་གནང་མཁན་ལི་ཁྲུག་དབྱན་གྱིས་ཧོང་ཀོང་ནང་གི་ད་ལོའི་དཀའ་ངལ་དེ་ཚོ་དེ་སྔོན་ཉིས་སྟོང་གསུམ་ལོའི་དཀའ་ངལ་དང་གཅིག་པ་ཡིན་སྐོར་གསུངས་འདུག ཉིས་སྟོང་གསུམ་ལོར་ཧོང་ཀོང་ནང་ད་ལྟའི་སྐབས་ཀྱི་གནས་སྟངས་དང་གཅིག་མཚུངས་ས་གནས་ཀྱི་དཔལ་འབྱོར་ཉམ་རྒུད་ཕྱིན་པ་དང་དེ་སྐབས་ཀྱི་ཧོང་ཀོང་ས་གནས་ཀྱི་སྤྱི་ཁྱབ་འཛིན་སྐྱོང་བ་ཐང་ཁྲི་ཧཱ་ལ་མང་ཚོགས་ཀྱིས་དགའ་པོ་དེ་ཙམ་མེད་པ།འཆར་འགོད་བྱས་པའི་རྒྱལ་ཡོངས་བདེ་འཇགས་ཁྲིམས་གཞི་དེ་རྩོད་གཞི་ཅན་ཞིག་ཆགས་པ་སོགས་མང་ཚོགས་ཀྱིས་ཧོང་ཀོང་སྲིད་གཞུང་ལ་ཡིད་ཆེས་མེད་པ་ཆགས་ནས་མང་ཚོགས་ཀྱིས་ངོ་རྒོལ་རྔམ་སྟོན་གཞི་རྒྱ་ཆེན་པོ་ཞིག་བྱས་ཡོད་པ་རེད།

ཉེ་བའི་ཆར་འཛམ་གླིང་གི་དཔལ་འབྱོར་ལ་ཉམ་རྒུད་ཆེན་པོ་ཕྱིན་པའི་གནས་སྟངས་འོག་ཕྱིར་ཚོང་གི་ལས་དོན་རྒྱ་ཆེ་སྤེལ་ཡུལ་དཔལ་འབྱོར་གྱི་ལྟེ་གནས་ཧོང་ཀོང་ནང་དམངས་གཙོའི་ལམ་ལུགས་ལ་རྒྱབ་སྐྱོར་བྱེད་མཁན་སྲིད་དོན་ཚོགས་པ་ཚོས་གཞུང་ལ་སྐྱོན་བརྗོད་བྱེད་ཡག་ཤུགས་ཆེ་རུ་ཕྱིན་ཡོད་པ་རེད།