ཨ་རིས་ཐེ་ལྦན་ལ་མཁའ་དམག་གནམ་གྲུ་ཚོང་བསྒྱུར་བྱེད་མིན་སྐོར།

༄༅༎ཨ་མི་རི་ཀའི་ངོས་ནས་ཐེ་ལྦན་གཞུང་གིས་ཐེ་ལྦན་ལ་F-16རྟགས་ཅན་གྱི་མཁའ་དམག་གནམ་གྲུ་ཚོང་བསྒྱུར་ཡོང་བའི་རེ་འདུན་དེ་ཧ་ལམ་རེ་སྟོང་ཞིག་ཏུ་གནས་རྒྱུ་ཡིན་པ་ཐེ་ལྦན་གྱི་དཔོན་རིགས་ཞིག་གིས་བརྗོད་འདུག།

དེ་ཡང་ཐེ་ལྦན་གྲོས་ཚོགས་ཀྱི་ཚོགས་གཙོ་ལྦང་ཅིན་ཕིང་གིས་ཨ་མི་རི་ཀས་ཐེ་ལྦན་ལ་མཁའ་དམག་གནམ་གྲུ་ཚོང་བསྒྱུར་བྱེད་མིན་གྱི་བསམ་བློར་འགྱུར་བ་ཆེན་པོ་ཞིག་ཕྱིན་ཡོད་པ་གསུངས་ཞིང་ འདི་ནི་ཐེ་ལྦན་གྱི་དཔོན་རིགས་ཞིག་གིས་ཡོངས་གྲགས་ཐོག་ནས་ཨ་མི་རི་ཀས་ཐེ་ལྦན་ལ་མཁའ་དམག་གནམ་གྲུ་ཚོང་བསྒྱུར་བྱེད་རྒྱུ་མིན་པའི་ཐག་གཅོད་བྱེད་སྲིད་པའི་སྐོར་གསུངས་པ་ཐོག་མ་དེ་ཡིན་པ་རེད།

འོན་ཀྱང་ཐེ་ལྦན་བདེ་སྲུང་ལྷན་ཁང་གི་མགྲིན་ཚབ་པ་ཌེ་ལྦིདྲ་ལོས་ཐེ་ལྦན་གཞུང་གི་ངོས་ནས་མུ་འཐུད་F༡༦རྟགས་ཅན་གྱི་མཁའ་དམག་གནམ་གྲུ་ཚོང་བསྒྱུར་ཡོང་བའི་འབོད་བསྐུལ་མུ་འཐུད་ཞུ་རྒྱུ་ཡིན་པ་གསུངས་འདུག།

བདེ་སྲུང་གནད་དོན་ཉམས་ཞིབ་པ་ཚོས་ཨ་མི་རི་ཀས་ཐེ་ལྦན་ལ་དགོས་ངེས་F༡༦རྟགས་ཅན་གྱི་མཁའ་དམག་གནམ་གྲུ་ཚོང་བསྒྱུར་བྱེད་རྒྱུ་མིན་པ་བརྗོད་བཞིན་ཡོད་ན་ཡང་ ཨ་མི་རི་ཀའི་ངོས་ནས་ཐེ་ལྦན་གྱི་ད་ཡོད་མཁའ་དམག་གནམ་གྲུ་དེ་དག་ཡར་རྒྱས་གཏོང་རྒྱུ་དང་ ཐེ་ལྦན་གྱི་བདེ་སྲུང་ལ་དགོས་ངེས་ཀྱི་མཚོན་ཆ་ཁག་གཅིག་ཚོང་བསྒྱུར་བྱེད་རྒྱུ་ཡིན་པའི་ཚོད་དཔག་བྱེད་བཞིན་ཡོད་པ་རེད།