རྒྱ་ནག་གིས་མཁའ་དམག་གནམ་གྲུ་གཉིས་ཀྱི་མཚོན་གནམ་གྲུ་བཏང་སྟེ་ཐེ་ཝན་ལ་མུ་མཐུད་དམག་གི་འཇིགས་སྐུལ་བྱས་འདུག

དེ་ནི་ཕྱི་ཚེས་༡༥རེས་གཟའ་མིག་དམར་ཉིན་རྒྱ་ནག་གིས་ཐེ་ཝན་གྱི་བར་སྣང་མཁའ་དབྱིངས་ལ་གནམ་དམག་གི་གནམ་གྲུ་༢༨བཏང་སྟེ་དྲག་ཤུགས་ཀྱི་འཇིགས་སྐུལ་ཤུགས་ཆེ་ཞིག་བྱས་པའི་རྗེས་སུ། རེས་གཟའ་པ་སངས་ཉིན་བསྐྱར་དུ་རྒྱ་ནག་གིས་རང་གི་ཆེས་ཐོན་གསར་གནམ་དམག་གནམ་གྲུ་གཉིས་ཀྱི་མཚོན་གནམ་གྲུ་༧བཏང་སྟེ་ཐེ་ཝན་ལ་མུ་མཐུད་དམག་གི་འཇིགས་སྐུལ་བྱས་ཡོད་པ་རེད།
དམག་དོན་ཉམས་ཞིབ་པ་ཚོས་རྒྱ་ནག་གི་དམིགས་ཡུལ་དེ་ནི་ཐེ་ཝན་ལ་དངོས་སུ་དམག་འཐབ་རྒྱབ་མི་དགོས་པའི་ཐོག་དྲག་ཤུགས་ཀྱི་འཇིགས་སྐུལ་རྫོགས་མཐའ་མེད་པ་བྱེད་པ་བརྒྱུད་མཐར་ཐེ་ཝན་གཞུང་དམངས་གཉིས་འུ་ཐུག་དགོས་པ་ཞིག་བཟོས་ཏེ་སེམས་ཤུགས་གཅོག་རྒྱུའི་དམིགས་ཡུལ་བཟུང་གི་ཡོད་པ་གསུངས་ཀྱི་ཡོད་པ་རེད།
འོན་ཀྱང་ཐེ་ཝན་ངོས་ནས་རང་གི་རང་དབང་སྲུང་སྐྱོབ་ཆེད་དུ་དམག་དོན་ནུས་ཤུགས་ཆེ་རུ་གཏོང་རྒྱུར་གནམ་དམག་གི་གནམ་གྲུས་མཚོན་ཚད་མཐོའི་གོ་མཚོན་མཁོ་འདོན་ཤུགས་ཆེ་རུ་གཏོང་བཞིན་པ་དང་། ཨ་མི་རི་ཀ་བཅས་པའི་མཐུན་གྲོགས་རྒྱལ་ཁབ་ཁག་གིས་ཐེ་ཝན་ལ་རང་གི་དམག་དོན་གོ་མཚོན་བཅས་པའི་ནུས་པ་ཤུགས་ཆེ་རུ་གཏོང་རྒྱུ་དེ་ནི་རྒྱ་ནག་གི་དྲག་པོའི་དམག་གི་འཇིགས་སྐུལ་འགོག་ཐབས་ཀྱི་ཐབས་ལམ་ཡག་ཤོས་དེ་ཡིན་པ་དང་། ཐེ་ཝན་ལ་རྒྱ་ནག་གི་གནོད་འཚེ་མི་ཡོང་བར་རང་གི་སྲུང་སྐྱོབ་བྱ་རྒྱུའི་ཐབས་ལམ་ཡག་ཤོས་དེ་ནི་ Porcupine སྟེ་སེམས་ཅན་ལུས་ལ་གཟེར་མ་མང་པོ་ཡོད་པའི་གཟེ་མོ་དང་མཚུངས་པ་བྱ་དགོས་པ་དང་འདིས་རྒྱ་ནག་གིས་ཐེ་ཝན་ལ་དྲག་པོའི་དམག་འཐབ་བྱེད་པ་ཡིན་ན་རྒྱ་ནག་རང་ཉིད་ལའང་གནོད་འཚེ་གང་ཆེ་ཕོག་རྒྱུ་ཡིན་པ་ངོས་བཟུང་གིས་འཛེམས་གཟོན་ཡོང་རྒྱུ་ཡིན་པའི་སློབ་སྟོན་གནང་གི་ཡོད་འདུག
ཨ་མི་རི་ཀ་དང་ཡོ་རོབ་རྒྱལ་ཁབ་ཁག་གིས་ད་རེས་G-7སྟེ་དཔལ་འབྱོར་ཡར་ཐོན་ཕྱིན་པའི་རྒྱལ་ཁབ་བདུན་གྱི་དབུ་ཁྲིད་རྣམ་པའི་ལྷན་ཚོགས་དང་ཡང་NATO་སྟེ་བྱང་Atlantic དམག་དོན་སྒྲིག་འཛུགས་ཀྱི་ལྷན་ཚོགས་བཅས་པའི་ཐོག་ཐེ་ཝན་ལ་རྒྱབ་སྐྱོར་གྱི་རྣམ་འགྱུར་ཤུགས་ཆེ་གསལ་སྟོན་གནང་ཡོད་པ་དང་ཐེ་ཝན་ངོས་ནས་ཨ་མི་རི་ཀ་དང་ནུབ་ཕྱོགས་རྒྱལ་ཁབ་ཁག་གི་རྒྱབ་སྐྱོར་ལ་ཐུགས་རྗེ་ཆེ་ཞུས་ཡོད་པ་དང་། འོན་ཀྱང་རྒྱ་ནག་གིས་ཐེ་ཝན་གྱི་སྤོབས་པ་བཅོག་ཐབས་སུ་འཇིགས་སྐུལ་བྱ་རྒྱུ་ཤུགས་ཆེ་གཏོང་བཞིན་ཡོད་པ་རེད།།