ལྷོ་ཨ་མི་རི་ཀའི་པེ་ར་གུ་ལྦེ་དང་ཐའེ་ལྦན་གྱི་འབྲེལ་བའི་སྐོར།

༄༅༎ལྷོ་ཨ་མི་རི་ཀའི་ཡུལ་གྲུ་པེ་ར་གུ་ལྦེའི་སྲིད་འཛིན་གསར་པས་ཁོང་གི་སྲིད་གཞུང་ནས་ཐའེ་ལྦན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ནང་འཛུལ་ཞུགས་བྱ་རྒྱུའི་ལས་དོན་ལ་རྒྱབ་སྐྱོར་གནང་རྒྱུ་མིན་ལུགས་གསུངས་མིན་ལ་མ་བལྟོས་པར་ ཐའེ་ལྦན་དང་པེ་ར་གུ་ལྦའི་གཉིས་ཀྱི་འབྲེལ་ལམ་ཐད་འགྱུར་བ་གང་ཡང་འགྲོ་རྒྱུ་མིན་ལུགས་ཐའེ་ལྦན་གྱི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཧེན་རི་ཁྲེན་གྱིས་མཚན་ཐོག་ནས་སྤེལ་བའི་གསར་འགོད་གསལ་བསྒྲགས་ཀྱི་ནང་བཀོད་འདུག

པེ་ར་གུ་ལྦའི་སྲིད་འཛིན་གསར་པ་སྐུ་ཞབས་ཕར་ནེན་ཌོ་ལུ་གོས་ སྲིད་འཛིན་གྱི་འོས་བསྡུའི་ལས་འགུལ་སྐབས་ཐའེ་ལྦན་དང་གཞུང་འབྲེལ་བཅད་དེ་ རྒྱ་ནག་སྐམ་ས་ཆེན་པོ་དང་འབྲེལ་ལམ་གསར་འཛུགས་བྱ་རྒྱུ་ཡིན་ལུགས་གསུངས་ཡོད་པ་དང་ གཟའ་ཉི་མའི་ཉིན་བརྙན་འཕྲིན་ལས་ཁང་ཞིག་གི་བཅར་འདྲིར་བཀའ་ལན་གནང་སྐབས་ ཁོང་གི་སྲིད་གཞུང་ནས་དེ་སྔོན་ལོ་མང་རིང་ ཐའེ་ལྦན་མཉམ་འབྲེལ་རྒྱལ་ཚོགས་ཀྱི་ཚོགས་མིའི་ཁོངས་སུ་འཛུལ་ཞུགས་བྱ་རྒྱུའི་ལས་དོན་ལ་རྒྱབ་སྐྱོར་བྱས་ཡོད་ན་ཡང་ འདི་ལོ་ཕྱི་ཟླ་དགུ་པའི་ཚེས་ ༡༦ ནས་འགོ་འཛུགས་བྱ་རྒྱུའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་ ཐའེ་ལྦན་གྱི་ལས་དོན་དེར་རྒྱབ་སྐྱོར་གནང་རྒྱུ་མིན་ལུགས་གསལ་བཤད་གནང་ཡོད་པ་རེད་

འོན་ཀྱང་ཐའེ་ལྦན་གྱི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཧེན་རི་ཁྲེན་གྱིས་གསར་འགོད་གསལ་བསྒྲགས་དེའི་ནང་ སྲིད་འཛིན་ལུ་གོའི་བཀའ་མོལ་དེས་ཕྱོགས་གཉིས་ཀྱི་འབྲེལ་ལམ་ཐད་འགྱུར་བ་གང་ཡང་འགྲོ་རྒྱུ་མིན་པ་དང་ དེ་དོན་ཉེ་སྔོན་ཐའེ་ལྦན་གྱི་སྲིད་འཛིན་མ་ཡིང་ཇུར་སྲིད་འཛིན་ལུ་གོས་ཞལ་བཞེས་གནང་ཡོད་པ་རེད་ཅེས་གསུངས་འདུག

ཐའེ་ལྦན་དང་པེ་ར་གུ་ལྦའི་འབྲེལ་ལམ་གྱི་གནས་བབ་དེ་ རྒྱ་ནག་དང་ཐའེ་ལྦན་དབར་གྱི་འབྲེལ་ལམ་ཡར་རྒྱས་འགྲོ་བཞིན་པའི་བརྒྱུད་རིམ་གྱི་ནང་མཚོན་དོན་གལ་ཆེ་ཞིག་ཆགས་སྲིད་ཅིང་ ཐའེ་ལྦན་གྱི་ཕྱི་སྲིད་བློན་ཆེན་གྱིས་འདི་ལོ་ཕྱི་ཟླ་ལྔ་པའི་ནང་ གལ་ཏེ་རྒྱ་ནག་གཞུང་གིས་པེ་རུ་གུ་ལྦའི་དང་ཐའེ་ལྦན་གྱི་འབྲེལ་ལམ་བཅད་ཐབས་ཀྱི་ལས་དོན་སྤེལ་ཚེ་ ཐའེ་ལྦན་གྱི་ངོས་ནས་དེ་ནི་ རྒྱ་ནག་གཞུང་གི་འགོ་འཁྲིད་ཚོས་ ཐའེ་ལྦན་གྱི་སྲིད་འཛིན་མ་ཡིང་ཇུས་རྒྱ་ནག་སྐམ་ས་ཆེན་པོ་དང་འབྲེལ་ལམ་ཡར་རྒྱས་གཏོང་རྒྱུའི་རེ་བ་དེར་ངོས་ལེན་གནང་གི་མེད་པའི་མཚོན་དོན་ཞིག་ཏུ་ངོས་འཛིན་བྱེད་དགོས་པ་ཞིག་ཆགས་རྒྱུ་ཡིན་པའི་དགོངས་ཚུལ་གསལ་བཏོན་གནང་ཡོད་པ་རེད།