ཐེ་ལྦན་གྱི་འོས་བསྡུའི་ནང་གོ་མིན་ཏང་ལ་རྒྱལ་ཁ་ཐོབ་པ།

༄༅༎ཐེ་ལྦན་གྱི་ས་གནས་ཀྱི་གལ་གནད་ཆེ་བའི་འོས་བསྡུ་དེར་གོ་མིན་ཏང་ལ་རྒྱལ་ཁ་ཐོབ་པ་དེ་ཡིས་ཐེ་ལྦན་ཕྱོགས་ནས་རྒྱ་ནག་གི་ལྷན་དུ་མཛའ་གྲོགས་ཀྱི་འབྲེལ་ལམ་ཉེ་རུ་འགྲོ་རྒྱུ་ཡིན་པ་སྔོན་དཔགས་བྱེད་ཀྱི་ཡོད་པ་རེད།

རེས་གཟའ་སྤེན་པའི་ཉིན་ཐེ་ལྦན་གྱི་གྲོང་ཁྱེར་ཆེ་ཁག་ལྔའི་སྤྱི་ཁྱབ་པ་འོས་འདེམས་ནང༌། ཐེ་ལྦན་གོ་མིན་ཏང་ལ་གསུམ་གྱི་རྒྱལ་ཁ་ཐོབ་པ་དེའི་རྟགས་མཚན་ནི། འོས་ཤོག་འཕེན་མཁན་མི་དམངས་ཚོས་སྲིད་འཛིན་མའ་དབྱིང་ཅོ་ཡིས་རྒྱ་ནག་དང་མཉམ་ལས་འབྲེལ་ལམ་བྱེད་པའི་སྲིད་ཇུས་ལ་རྒྱབ་སྐྱོར་གྱི་རྣམ་པ་མཚོན་པར་ངོས་འཛིན་བྱེད་པ་མ་ཟད། སྲིད་འཛིན་མའ་དབྱིང་ཅོ་ཡིས་རྒྱ་ནག་ཐོག་ལ་འཛིན་པའི་སྲིད་ཇུས་དེ་མུ་མཐུད་ནས་རྒྱུན་འཁྱོངས་བྱེད་པའི་གོ་སྐབས་སྐྲུན་པ་ཞིག་དང༌། མཚོ་ཁག་གཉིས་ཀྱི་འབྲེལ་ལམ་ཉེ་རུ་འགྲོ་བའི་ཆ་རྐྱེན་སྐྲུན་པར་ངོས་འཛིན་བྱེད་ཀྱི་ཡོད་པ་རེད། དེ་ཡང་ཐེ་ལྦན་རྒྱལ་ཡོངས་མཐོ་རིམ་སློབ་གཉེར་ཁང་གི་ཆབ་སྲིད་སློབ་དཔོན་ཀྲང་ལིང་ཁྲེན་གྱིས། ད་རེས་གྲོང་ཁྱེར་སྤྱི་ཁྱབ་པའི་འོས་འདེམས་ནང་ཐེ་ལྦན་གོ་མིན་ཏང་ལ་རྒྱལ་ཁ་ཐོབ་ཏེ་སྲིད་འཛིན་མའ་དབྱིང་ཅོ་ཡི་དབང་ཆ་སྲུང་སྐྱོབ་བྱེད་པར་ལམ་ལྷོང་བྱུང་བ་དེ་ནི། མ་འོངས་ཕྱི་ལོ་༢༠༡༢ལོའི་ཐེ་ལྦན་གྱི་སྲིད་འཛིན་འོས་བསྡུའི་ནང་བསྐྱར་དུ་མའ་དབྱིང་ཅོ་ལ་སྲིད་འཛིན་གྱི་རྒྱལ་ཁ་ཐོབ་རྒྱུར་རྒྱབ་སྣོན་གོ་སྐབས་ཆེན་པོ་ཞིག་བྱུང་ཡོད་པར་འགྲེལ་བརྗོད་གནང་ཡོད་པ་རེད། འོན་ཀྱང་གནད་དོན་དབྱེ་ཞིབ་པ་ཁག་ཅིག་གིས། ཐེངས་འདིའི་རྒྱལ་ཁ་དེ་ཡིས། མའ་དབྱིང་ཅོ་མ་འོངས་པའི་སྲིད་འཛིན་འོས་འདེམས་ཡོང་རྒྱུར་དཀའ་ངལ་སེལ་བ་ཞིག་མིིན་པ་དང༌། ད་ལྟ་ཐེ་ལྦན་གྱི་གྲོང་ཁྱེར་དང་གྲོང་གསེབ་བར་དབུལ་ཕྱུག་ཁྱད་པར་གྱི་དཀའ་ངལ་དང༌། ལས་མེད་ཀྱི་དཀའ་ངལ་ཆེ་རུ་འགྲོ་བ་དེ་ཡིས། ཁོང་མ་འོངས་པའི་སྲིད་འཛིན་འོས་འདེམས་ཀྱི་འགྲན་བསྡུར་ནང་རྒྱལ་ཁ་ཐོབ་པར་དཀའ་ངལ་དེ་དག་གདོང་ལེན་བྱེད་དགོས་པའི་འགག་རྩ་ཞིག་ཡོང་རྒྱུ་ཡིན་པ་འགྲེལ་བརྗོད་གནང་གི་ཡོད་པ་རེད།